22 March 2019

નવસારીના સમૃદ્ધ જીવન ગ્રુપના ગફલેબાજ ત્રણ ડિરેક્ટરો છ દિવસના પોલીસ રિમાન્ડ પર


નવસારીના સમૃદ્ધ જીવન ગ્રુપના ત્રણ ઠગબાજ ડિરેક્ટરોને અત્રેની અદાલતે છ દિવસના રિમાન્ડ પર રાખવા હુકમ કર્યો હતો. કંપનીએ ભારતભરમાં વિવિધ નામે થાપણ ઉપર ઊંચા વ્યાજની લાલચે રૂપિયા 3500 કરોડથી વધુ રકમનું કૌભાંડ આચર્યું છે. આ પૈકી ગુજરાતમાં 50 હજારથી વધુ રોકાણકારોને તો ભારતમાં 4 લાખથી વધુ ઈન્વેસ્ટર્સને ફસાવ્યા હોવાનું કોર્ટના ધ્યાન ઉપર મુકાયું હતું.

દેશના વિવિધ રાજ્યોમાં ઓસ્કાર ગ્રુપ ઓફ કંપનીનું કરોડો રૂપિયાનું ભોપાળું બહાર આવ્યું છે. ઓરિસ્સા બેઈઝ આ કંપનીના મુખ્ય ડિરેક્ટર મહેશ મોતેવાર, પુત્ર અભિષેક મહેશ મોતેવાર, પત્ની વૈશાલી મોતેવાર અને ભાણેજ પ્રસાદ પારશ્વાર દક્ષિણ ગુજરાતના નવસારીમાં ઓસ્કાર ગ્રુપની અન્ય એક કંપની શરૂ કરી હતી. સમૃદ્ધ જીવન મલ્ટીસ્ટેટ મલ્ટી પર્પઝ કો. ઓ. સોસાયટીના નામથી શરૂ થયેલી કંપનીમાં સંખ્યાબંધ લોકોએ બેંક કરતા ઊંચા વ્યાજ અને વળતરની અપેક્ષાએ રોકાણ કર્યું હતું. દરમિયાન કંપનીના કોઠાકબાડા વિશે ગંધ આવતા નવસારી સ્થિત પરિસિમા એપાર્ટમેન્ટમાં રહેતા ભરત સુરેશભાઈ ખત્રીએ નવસારી પોલીસ મથકમાં ફરિયાદ કરી હતી.

આ ફરિયાદ ઉપર સીઆઈડી ક્રાઈમના પોલીસ ઈન્સ્પેક્ટર પી. જી. નરવાડેએ તપાસ શરૂ કરી હતી. પી.આઈ. નરવાડેએ ત્રણેય ઠગબાજ ડિરેક્ટરની ધરપકડ કરી હતી. ત્રણેયને અત્રેની પ્રિન્સિપાલ ડીસ્ટ્રીક્ટ એન્ડ સેશન્સ કોર્ટમાં દસ દિવસના રિમાન્ડ મેળવવા રજૂ કર્યા હતા. રિમાન્ડ અરજી ઉપર એપીપી રિન્કુ પારેખે ધારદાર દલીલો કરતા કોર્ટે છ દિવસની કસ્ટડી મંજૂર કરી હતી. દેશવ્યાપી કરોડોના કૌભાંડમાં નવસારી પોલીસ સ્ટેશનમાં રૂપિયા 65.40 લાખની ફરિયાદ નોંધાઈ છે.

કોર્ટમાં ત્રણેયના રિમાન્ડ માટે રજૂ કરાયેલા ગ્રાઉન્ડ
  • આરોપીઓની રોકાણની રકમ ક્યાં સગેવગે કરી તેની પૂછપરછ કરવાની છે.
  • સમૃદ્ધ જીવન સોસાયટીની સ્થાવર જંગમ મિલકતોની તપાસ કરવાની છે.
  • મુખ્ય આરોપીઓ વિશાલ ચૌધરી તથા સંબંધી ડિરેક્ટરો પૂજા રમેશ કામલે, સુવર્ણા મોતેવાર હાલ ક્યાં છે તેનું સરનામું મેળવી તપાસ કરવાની છે.
  • આરોપીઓએ કંપનીના મહત્વના હોદ્દા ઉપર રહી શું લાભ મેળવ્યા છે. આર્થિક લાભ ક્યાં સગેવગે કર્યા છે તેની તપાસ કરવાની છે.
  • સોસાયટીના બેંક એકાઉન્ટ અને આરોપીઓના બેંક ખાતાનું ક્રોસ વેરિફિકેશન કરવા આરોપીની કસ્ટડી જરૂરી છે.
  • આરોપીઓએ અન્ય કઈ કઈ કંપની શરૂ કરી છે? તે કંપનીઓમાં શું કામગીરી કરવામાં આવતી હતી? કંપની શરૂ કરવા માટે આપવામાં આવેલા ફંડિગ વિશે તપાસ કરવાની છે.
  • આરોપી અભિષેક મોતેવારના બેંક ખાતામાં રૂપિયા 85 કરોડના ટ્રાન્જેક્શન બાબતે તથા તેને પાવર ઓફ એટર્નીને આધારે વેચાણ કરેલા ફ્લેટ પેટે મળેલી રકમ ક્યાં સગેવગે કરી છે તેની તપાસ કરવાની છે.
  • આરોપી પ્રસાદ પારશ્વાર સમૃદ્ધ જીવન ગ્રુપની અન્ય ડઝનબંધ કંપનીઓમાં ડિરેક્ટર રહ્યાં હોય આ કંપનીઓ વિશે માહિતી મેળવી આરોપીએ ભજવેલી ભૂમિકા તથા મેળવેલા આર્થિક લાભ વિશે તપાસ કરવાની છે. બેંક એકાઉન્ટમાં તેઓ જ સાઈનિંગ ઓથોરિટી હોય આર્થિક વ્યવહારો કોની કોની સાથે કરવામાં આવ્યા તે વિશે પૂછપરછ કરવાની બાકી છે.
  • આરોપીઓની અન્ય કેટલીક કંપનીઓમાં વૈશાલી મહેશ મોતેવાર તથા મુખ્ય આરોપી મહેશ મોતેવારની બેંક એકાઉન્ટમાં સહી ચાલતી હોય તેમની પણ પોલીસ કસ્ટડીમાં પૂછપરછ જરૂર છે.

21 March 2019

નવસારીમાં મેક ઇન ઇન્ડિયા પીચકારીનો ક્રેઝ, ચાઇનીઝ કરતાં બમણું વેચાણ


હોળી પર્વ નિમિત્તે નવસારી શહેરમાં મોડી સાંજે પીચકારીઓની ખરીદી નીકળતા વેપારીઓએ હાશકારો અનુભવ્યો હતો. ગત વર્ષે અંદાજિત 7 લાખનું ટર્નઓવર થયું હતું. જેમાં ચાઈનીઝ પીચકારીનું પ્રમાણ વધુ હતું પરંતુ આ વખતે મેક ઈન ઈન્ડિયાની પીચકારીની બોલબાલા રહી છે.

નવસારીમાં હોળી પર્વની ધામધૂમથી ઉજવવામાં આવે છે. નાના ભૂલકાઓ દ્વારા દર વરસે પીચકારી ખરીદવામાં આવે છે. આ વરસે પણ બજારમાં નીતનવી આકર્ષક ડીઝાઇન કાર્ટુન ના પાત્રોવાળી પીચકારીઓની ખરીદી કરવામાં આવી રહી છે. જેમાં દરેક ક્ષેત્રમાં ચાઇનીઝ વસ્તુએ પગપેસારો કર્યો છે. હોળીના પર્વમાં પણ હવે ચાઇનીઝ પીચકારીઓનું વેચાણ નવસારીમાં વધું હતું. નવસારી શહેરમાં જથ્થાબંધ વેપાર કરતા ચાર મોટા વેપારીઓ દ્વારા હોલસેલમાં હોળી પર્વે 4થી 5 લાખની પીચકારીઓનું વેચાણ થયું છે.

નવસારી જિલ્લામાં અંદાજે 10 લાખથી વધુનું વેચાણ થયાનું વેપારીઓ જણાવી રહ્યા છે. ચાઇનીઝ પીચકારી પણ મળી રહી છે પરંતુ ચાલુ વર્ષે રાજકીય ઉથલપાથલ અને આતંકવાદી હુમલામાં મસુદને વીટો વાપરી બચાવી લેવાના કારણે ચીન પ્રત્યે લોકોમાં નારાજગી સ્પષ્ટ જોવા મળી રહી છે. તેની અસર નવસારીના ચાઈનીઝ પીચકારીઓ ઉપર પણ જોવા મળી છે. હાલ આ ચાઈનીઝ સામગ્રીની માગ ઘટીને 40 ટકા જેટલી થઈ ગઈ છે એટલે આ વખતે લોકોએ ચાઈનીઝ વસ્તુને જાકારો આપી મેક ઈન ઈન્ડિયાને પ્રાધાન્ય આપ્યું હોવાનું હોળી માર્કેટને જોતા સ્પષ્ટ થયું છે.

ટેંકવાળી પીચકારીની માગ વધુ છે
નવસારીમાં દિલ્હીથી ટેંકવાળી મેક ઇન ઇન્ડિયાવાળી નવી પીચકારી આવી છે, જેની માંગ વધુ છે. 3થી 5 લિટર સુધી પાણીની ટેંકવાળી પીચકારીઓ વેચાઈ રહી છે. રૂ. 120થી 400 સુધીમાં આ પીચકારી મળી રહી છે. ચાઇનીઝ પિચકારીઓમાં પિસ્તોલવાળી પીચકારીનું માર્કેટ ડાઉન છે. -રોનક શાહ, વેપારી, નવસારી

સ્વદેશી વસ્તુ અપનાવવી જોઈએ
આપણે સ્વદેશી વસ્તુ અપનાવવી જ જોઈએ. આજના યુવાનોએ ચાઇનીઝ વસ્તુ ખરીદીને દેશને આર્થિક રીતે નુકસાન કરતા હોય છે. જેથી મોબાઈલ કે પછી કોઈપણ ચીજવસ્તુ ખરીદવી ન જોઈએ. -કિશોરભાઈ નાયક, નવસારી

ચીનની વસ્તુ ખરીદવી ન જોઈએ
જ્યારે પણ દેશમાં આતંકવાદી ઘટના થાય છે ત્યારે પાકિસ્તાનને ચીનનું આડકતરું સમર્થન હોય છે. હાલમાં આતંકીને સમર્થન આપનારા ચીનની વસ્તુ આપણે ખરીદવી ન જોઈએ. જેનો સખ્ત વિરોધ છે. -હરીશ ખત્રી, નવસારી

મેક ઈન ઈન્ડિયાનો ક્રેઝ વધ્યો
શહેરમાં 3થી 4 પીચકારીના હોલસેલ વેપારીઓ છે. તેઓ અંદાજે 3 લાખનો મેક ઈન ઈન્ડિયાનો સ્ટોક દિલ્હીથી મંગાવ્યો છે. તેમાંથી 80 ટકા વેચાઈ ગયો હતો. જ્યારે ચાઈનીઝ પીચકારીનો પણ 1થી દોઢ લાખનો માલ મંગાવ્યો છે પરંતુ તેમાં સાંજ સુધીમાં 40 ટકા જ માલ વેચાયો છે.

20 March 2019

નવસારી અનાજ ગોડાઉન બહાર ટ્રકમાંથી 5 ઘઉંના કટ્ટા ચોરાયા


નવસારીમાં આવેલી દશેરા ટેકરી વિસ્તારમાં આવેલ ગુજરાત રાજ્ય નાગરિક પુરવઠા નિગમ લિ. દ્વારા અન્ય વિસ્તારોમાં વિતરણ કરવા માટે ટ્રકમાં ભરેલા અનાજના જથ્થો પૈકી 5 અનાજની ગુણી (કટ્ટા) ગત રાત્રિએ ટ્રકમાંથી કોઈ ચોરી ગયું હતું. આ અંગે પોલીસને જાણ થતા પોલીસે ત્રણ જેટલા શકમંદોની અટક પણ કરી હોવાની માહિતી જાણવા મળી છે.

નવસારીનાં દશેરા ટેકરી વિસ્તારમાં ગુજરાત રાજ્ય નાગરિક પુરવઠા નિગમ લિ. આવેલી છે. ગતરોજ ચીખલીનાં ઈજારદાર રતન શાહ નામના ઇસમની ઈજારો ધરાવતી ટ્રકમાં માલ ભરીને ગોડાઉનના કેમ્પસમાં મૂકી હતી. તેમાં ગતરાત્રિ દરમિયાન અજાણ્યા ઈસમોએ ટ્રક પર ચઢીને પાંચ અનાજની ગુણો ચોરી હતી. ટ્રકનું કરતા આ વાતની જાણ થઇ હતી.

આ બાબતે સોમવારે રાત્રિના સમયે લોકોએ પોલીસને જાણ પણ કરી હતી. નવસારી પોલીસે ઘટનાસ્થળે પહોંચી 3 સ્થાનિક ઈસમોને શંકાનાં આધારે ઝડપી લીધા હતા. જોકે આ અંગે કોઈ પોલીસ ફરિયાદ નોંધાઈ ન હોવાનું પોલીસ મથકેથી માહિતી મળી છે.

19 March 2019

નવસારીમાં ટ્રાફિક પોલીસને સમસ્યા હલ કરવામાં નહીં પણ નાણાંમાં જ રસ


નવસારી શહેરમાં ટ્રાફિક પોલીસને ટ્રાફિક સમસ્યા હલ કરવા કરતાં નાણાં ઉઘરાવવામાં રસ વધુ રસ જણાય છે. સુરત અને વલસાડના પાસિંગવાળી ગાડીને પકડીને મોટી રકમની માંગણી કરે છે. તે ન અપાય તો આર.ટી.ઓ. મેમો અથવા જેલમાં મૂકી દેવાની ધમકી અપાય છે અને વાહનચાલક વિરોધ કરે તો તેને ૩૩૦ કલમ હેઠળ જેલનાં સળિયા પાછળ ધકેલી દેવાય છે.

નવસારીના પોલીસવડા ડો. ગિરીશ પંડયા શહેરમાં ટ્રાફિક સમસ્યાને કંટ્રોલમાં રહે તે માટે અમૂક ટ્રાફિક પોઇન્ટ પર ૧ જમાદાર, ૨ કોન્સ્ટેબલ, ૪ ટ્રાફિક બ્રિગેડ ફરજ પર મૂક્યા છે, છતાં પણ ટ્રાફિકની સમસ્યા યથાવત રહી છે.

ટ્રાફિક પોઇન્ટ પર પોલીસ સ્ટાફ ઊભા રહે છે અને સુરત અને વલસાડ પાસિંગનાં વાહનો પકડીને તેની પાસે કાગળો માંગીને કોઇને કોઇ રીતે વાંક કાઢીને મોટી રકમનો મેમો ફાડી દેવાની વાત કરે છે. અને જો મેમો નહીં ભરવો હોય તો અમને આટલી રકમ આપો તેવી માંગણી કરતા હોવાની રાવ ઊભી થઇ છે અને વાહનચાલક કાયદાની વાત કરે ત્યારે તેના ઉપર સરકારી કામમાં અવરોધ ઊભો કર્યાનો ગુનો દાખલ કરવાની ધમકી આપે છે. તો પણ ન ફાવે ટ્રાફિક પી.એસ.આઇ.ને ખોટી વાત કહી તેઓને ઉશ્કેરીને કેસ પણ કરાવી દે છે. ડી.એસ.પી. ડો. ગિરીશ પંડયાનો ટ્રાફિક સમસ્યા હલ કરવાનો હેતુ પોલીસ કર્મચારીઓએ કમાવવાનો માર્ગ બનાવી દીધો છે. વાહનચાલકાએે ક્યાં તો ન કરેલી ભૂલના નાંણા ચૂકવવા પડે છે. અથવા જેલમાં જવા તૈયાર રહેવું પડે છે. પોલીસ પ્રજાનો મિત્ર છે એવું કહેનારા ડી.એસ.પી. યોગ્ય ચેકિંગ કરે તો ચોક્કસ સરકારી તિજોરીમાં થતી આવક કરતા પોલીસને ગજવે જતી રકમ કદાચ વધી જાયતો નવાઇ નહીં.

નવ પોઈન્ટ વચ્ચે ઓછું અંતર: ક્યાંક તો લૂંટાવું જ પડે
નવસારી શહેર નાનું છે પણ ટ્રાફિક પોઇન્ટ વધુ છે. નવસારી શહેરમાં પ્રવેશ કરતા જ સ્વામી વિવેકાનંદ સર્કલ પાસે એક પોઇન્ટ ત્યાર બાદ ૧૦૦ મીટર ન થાય ત્યાં લાઇબ્રેરી સર્કલ પાસે બીજો પોઇન્ટ ત્યાર બાદ લૂન્સીકુઇ સર્કલ પાસે ત્રીજો પોઇન્ટ, એસ.પી. ઓફિસ પાસે પાંચમો પોઇન્ટ, નગરપાલિકા પાસે છઠ્ઠો પોઇન્ટ, ટાવર પાસે સાતમો પોઇન્ટ, ગોલવાડ પાસે આઠમો પોઇન્ટ, વિરાવળ પાસે નવમો પોઇન્ટ આમ દરેક પોઇન્ટ વચ્ચે ૧૦૦ મીટરથી પણ ઓછું અંતર છે. તેના કારણે વાહનચાલક કોઇપણ એક પોઇન્ટ પર રોજ લૂંટાતો આવ્યો છે. ટ્રાફિકની સમસ્યા હલ કરવા માટે ૧૦ જમાદાર, ૨૦ પોલીસ જવાન, ૪૦ ટ્રાફિક બ્રિગેડના જવાનો રોકાઇ છે. તેની સામે ટ્રાફિક સમસ્યા તો યથાવત છે ને ફાયદો પ્રજાને નથી પોલીસકર્મીઓને જ છે. આટલો સ્ટાફ જો રાત્રી પેટ્રોલિંગમાં વપરાઇ તો ચોરી થવાની ઘટના પર અંકુશ આવે તેમ છે.

NRIની કરોડોની 10 વીઘા જમીન પચાવી પાડવાનો કારસો


જલાલપોર તાલુકાના માણેકપોર ટંકોલી ગામે આવેલી માણેકપોરના એનઆરઆઈની અંદાજિત 4 કરોડની 10 વીઘા જેટલી જમીન પોતાના નામે કરી લેવા ખોટા સોગંદનામુ અને ખોટા દસ્તાવેજો તૈયાર કરી મૃતકોને પણ જીવિત બતાવી તે જમીન પચાવી પાડવાનો કારસો રચનારા 9 સામે મરોલી પોલીસ મથકમાં ફરિયાદ નોંધાઈ છે. આ ઘટનાને પગલે પોલીસે તપાસ શરૂ કરી છે.

જલાલપોર તાલુકાના માણેકપોર ટંકોલીના મૂળ વતન અને હાલ ન્યુઝીલેન્ડ રહેતા એનઆરઆઈ ઈબ્રાહીમ અહમદ દાદાભાઈની ખાતા નં. 272, બ્લોક સરવે નંબરની જમીન 51,143,159,204 તથા 206વાળી આશરે 10 વીઘા જેટલી જમીન આવેલી છે. આ બાબતે હાલ વહીવટ કરતા ઈકબાલ યુસુફ ભામજી (રહે. ટાંકી ફળિયા, માણેકપોર ટંકોલી, જલાલપોર)ને ગત સપ્ટેમ્બર 2018મા તેમના મહોલ્લામાં રહેતા પિયુષ આહીર અને અહમદ મહમદ દાદાભાઈ નામના ઈસમો આવ્યા હતા અને જણાવ્યું કે તેના મિત્ર ઈબ્રાહીમ મોતારાના વડીલોપાર્જીત જમીનનું પેઢીનામુ કર્યું છે. તેમાં તેઓ બંને સાક્ષી તરીકે રહ્યા હતા. ઈકબાલ ભામજીને આ ઘટના અંગે જાણ થતા તેણે આ બાબતે ન્યુઝીલેન્ડ ખાતે રહેતા તેમના મિત્ર ઈબ્રાહીમ દાદાભાઈને માહિતગાર કર્યા હતા. મામલતદારમાં તપાસ કરતા બારડોલી ખાતે રહેતા યુસુફ તરાજીયાએ પેઢીનામુ બનાવ્યું હતું.

આ અંગે ન્યુઝીલેન્ડ ખાતે જમીનના વારસદારોને જાણ કરી તેમણે યુસુફ તરાજીયાને આવા કોઈ પાવર ઓફ એટર્ની આપી હતી કે કેમ તેની પૃષ્ટિ કરી હતી પરંતુ જમીનના વારસદારોએ આ અંગે નન્નો ભણી દઈ યુસુફ તરાજીયાને ઓળખતા પણ ન હોવાનું જણાવ્યું હતું, જેથી જમીનના વહીવટદાર ઈકબાલભાઈએ જલાલપોર મામલતદારમાં વાંધા અરજી કરી હતી. 17મી જાન્યુઆરીએ જમીનના મૂળ માલિકો ન્યુઝીલેન્ડથી ઈબ્રાહીમ દાદાભાઈ અને સાઉથ આફ્રિકાથી ઈબ્રાહીમ મોતારા નવસારી આવ્યા હતા અને જલાલપોર મામલતદારને વાંધા અરજી આપી અને 22 જાન્યુઆરીએ ઈ ધરામાં એન્ટ્રી નં. 1607 કઢાવતા તે 18મી જાન્યુઆરીએ નામંજૂર થયાની હકીકત સામે આવી હતી.

જલાલપોર મામલતદારની કચેરીએ જઈ બારડોલીના યુસુફ સાદીક તરાજીયાએ રજૂ કરેલુ પેઢીનામુ, પાવર ઓફ એટર્ની, જમીનના મૂળ માલિકનો મરણ દાખલા તથા 7-12ની નકલ અને નમૂના નં. 8ના ઉતારાની નકલો મેળવતા ઈકબાલભાઈ ભામજીને સત્યતાની જાણ થઈ હતી, જેમાં ખોટા દાખલાઓ, પાવર ઓફ એટર્ની રજૂ કરી હતી . આ સમગ્ર ઘટનામા છેતરપિંડી સામે આવતા આજરોજ મરોલી પોલીસ મથકે જમીનના પાવરદાર ઈકબાલ ભામજીએ યુસુફ તરાજીયા , ઈસ્માઈલ ટંકોલીયા, મોહમદ રાજા, અમીદ આદમ, અબ્દુલ સમદ મોતારા, અહમદ ઈબ્રાહીમ મોતારા, અહમદ ઈસુપ મોતારા અને ઝેબુનીશા મોતારા વિરૂદ્ધ છેતરપિંડી કર્યાની ફરિયાદ નોંધાવી હતી.

સાક્ષીઓએ વાંધો લેતા કૌભાંડ બહાર આવ્યું
ખાતા નં. 272વાળી 10 વીઘાની જમીનના માલિક વિદેશ હોય તેની જાણકારી બારડોલીના જમીનદલાલ યુસુફ તરાજીયાને થઈ હતી. તેના કાગળીયા માણેકપોર ટંકોલીના તલાટી પાસે મેળવ્યા હતા અને તેણે બોગસ પેઢીનામા, દાખલા, વારસો બનાવીને જલાલપોર મામલતદાર કચેરીએ નોંધ કરવા આપી હતી અને 1607 નંબરની 7-12ના ઉતારામાં કાચી નોંધ પણ મામલતદાર કચેરી દ્વારા થઈ હતી પરંતુ પેઢીનામામાં સાક્ષી રહેલા બે ઈસમોએ વાંધો લેતા આ કૌભાંડ બહાર આવ્યું હતું.

એનઆરઆઈઓએ ફ્રોડથી બચવા રાખવાની તકેદારી  - એક્સપર્ટ વ્યુ પ્રતાપસિંહ મહિડા, એડવોકેટ

  • એનઆરઆઈએ સ્થાવર મિલકતના રેકર્ડ ઉપર નજર રાખવા કે તેનું ધ્યાન રાખવા માટે સંબંધીઓ કે ગ્રુપના વ્યક્તિ સાથે કોન્ટેકટમાં રહેવું. 
  • સમયાંતરે રેકર્ડની નકલ કઢાવતા રહેવું. 
  • જો કોઈ રેકર્ડમાં હિલચાલ કે તજવીજ જણાય તો તેનાથી તાત્કાલિક પગલાં ભરવા, જે તે સંબંધિત વ્યક્તિનો સંપર્ક કરવો. 
  • પેપર નોટીસ આપી આ જમીન કે મિલકત અંગે કોઈપણ વ્યવહાર થાય તો એનઆરઆઈ માલિકે પોતાનું સરનામુ અને કોન્ટેક્ટ આપી વેરીફાઈ કરી લેવા તાકિદ કરવી. 
  • એનઆરઆઈએ પોતાની તમામ મિલકત અંગે તલાટીને લેખિતમાં જાણ કરી. કોઈપણ વ્યવહાર કરતા પહેલા ધ્યાન દોરવા અનુરોધ કરવું અને ગામમાં હોય તો તલાટી, સિટીમાં મિલકત હોય તો સિટી સર્વેમાં નોંધ કરાવવી. 
  • પાવર એટર્ની હોય તો પણ તલાટી કે સિટી સર્વે, સબરજીસ્ટ્રારને તેની જાણ કરવી. 
  • સરકારે પણ એનઆરઆઈ મિલકત બાબતે વેરીફિકેશન માટેની જોગવાઈઓ અમલમાં લાવવી જોઈએ. 
  • એનઆરઆઈની પ્રોપર્ટીનો તલાટી, સિટી સર્વે અને સબ રજીસ્ટ્રારમાં અલાયદો રેકર્ડ બનાવવામાં આવે તે જરૂરી છે. 


પેઢીનામામાં ગામના જ બે શખ્શોએ સહી કરી
માણેકપોર ટંકોલી ખાતે આવેલી ખાતા નં. 272વાળી જમીનના માલિકો વિદેશ સ્થાયી થયા હતા અને મને મિત્રના નાતે દેખરેખ રાખવા જણાવ્યું હતું. પેઢીનામામાં ગામના જ બે ઈસમોએ સહી કરી હતી. તેમણે મારા ઘરે આવી જાણ કરી અને ત્યારબાદ જમીન પચાવી પાડવાનો કૌભાંડ બહાર આવ્યું. -ઈકબાલ ભામજી, હાલ જમીનના પાવરદાર

18 March 2019

બાળકીનું અપહરણ કરનાર ગણતરીના કલાકોમાં ઝડપાયો


નવસારીનાં દશેરા ટેકરી વિસ્તારમાં ગત સાંજે 4.30 કલાકનાં સુમારે એક આઠ વર્ષીય બાળકીનું અપહરણ થયું હોવાની વાત વાયુવેગે ફેલાઈ હતી. જેમાં શ્રમજીવી પરિવાર પરપ્રાંતીય હોય તેમની ઓળખાણ ઓછી હોવા છતાં તેમણે સ્થાનિક અગ્રણીઓની મદદ લઇને પોલીસ મથકનો સંપર્ક થયો અને માત્ર બે કલાકની પોલીસની મહેનત રંગ લાવી અને અપહરણ કરનાર યુવાનને બીલીમોરા ખાતે તેના નિવાસસ્થાનેથી પોલીસે ઝડપી પાડી આ બાળકીનો કબજો મેળવ્યો હતો. નવસારીનાં દશેરા ટેકરી વિસ્તારમાં ખુલ્લી જગ્યામાં ઝુપડું બાંધી શ્રમજીવી પરિવાર તેના ચાર સંતાનો સાથે રહે છે. તેઓ મજુરી કામે ગતરોજ રાબેતા મુજબ ગયા હતા. તે દરમિયાન નજીકમાં આવેલા એક પાર્ટી પ્લોટમાં કામ કરતા 28 વર્ષીય ઇસમે આ પરિવારની 8 વર્ષીય બાળાને બિસ્કીટ અપાવવાના બહાને બાઈક પર લઇ ગયો હતો, જે પરત આવ્યો ન હતો.

સાંજના છ વાગ્યે બાળકીનાં માતાપિતા મજુરી કામેથી પરત આવ્યા ત્યારે તેમની દીકરીને ન જોતા તેની આજુબાજુનાં વિસ્તારોમાં શોધખોળ કરી હતી પરંતુ તે મળી આવી ન હતી. તેઓએ આસપાસ શોધખોળ કરતા રહીશોએ સ્થાનિક અગ્રણીઓ પાસે જવાનું કહ્યું તેમને આ બાળકી ગુમ થયાનો સોશ્યલ મીડિયામાં મેસેજ વાયરલ કર્યો અને ત્યારબાદ તેમને નવસારી શહેર પોલીસ મથકે ફરિયાદ કરવા લઇ ગયા હતા. તે દરમિયાન રાત્રિના 9 વાગ્યા હતા. પોલીસે ફરિયાદ નોંધી અને જિલ્લા પોલીસવડાને વિગતે જણાવ્યું અને પોલીસે તે વિસ્તારનાં સીસીટીવી ફૂટેજ જોવાનું શરુ કર્યું હતું.

સીસીટીવી ફૂટેજ જોતા એક સ્થળે બાઈક પર પાછળ છોકરી ને એક યુવાન બેસાડીને લઇ જતા હોવાનું બાળકીનાં પિતાએ તેમની દીકરી હોવાનું જણાવ્યું અને આ યુવક પણ નજીકમાં આવેલ પાર્ટી પ્લોટમાં મજુર તરીકે કામ કરતો હોવાનું અને છેલ્લા ઘણા વખતથી ત્યાં જ રહેતો હોવાનું જણાવ્યું હતું. પાર્ટી પ્લોટના માલિકે આ યુવાનનું નામ છના તલાવીયા (ઉ.આ. 28, રહે. બીલીમોરા) હોવાનું જણાવ્યું હતું. નવસારી પોલીસે બીલીમોરા પોલીસનો સપર્ક કરી યુવાનનું વર્ણન તથા સરનામું મોકલતા પોલીસ તુરંત યુવાનનાં ઘરે પહોંચી હતી. પોલીસે અપહરણ કરનાર છના તલાવિયાની અટક કરી બાળકીનો કબજો મેળવ્યો હતો. આમ પોલીસે માત્ર બે કલાકના સમયગાળામાં અપહૃત બાળકીને હેમખેમ તેના માતાપિતાને સોંપી હતી.

રાત્રિના સમયે પોલીસ એક્શનમાં આવી ન હોત
નવસારીમાં 8 વર્ષીય બાળકીનું અપહરણ થયાને બે કલાક માં પોલીસે તેનો કબજો મેળવવામાં સફળતા મેળવી હતી. જો રાત્રિના સમયે પોલીસ એક્શનમાં ન આવતે તો બાળકી કોઈ મોટી દુર્ઘટનાનો શિકાર થઇ હોત એવી ચર્ચા પણ શહેરભરમાં થઇ હતી. અપહરણ કરનાર યુવાન 28 વર્ષીય અને અપરીણિત હોય તેનો સ્વભાવ સારો ન હોવાનું પણ લોકોએ જણાવ્યું હતું.

નવસારી પોલીસની કામગીરી સારી
નવસારી પોલીસ ગત રોજ બાળકીના અપહરણ ની ઘટના નોંધાઈ અને માત્ર બે કલાકના ગાળામાં શોધી આપીને અપહરણકર્તાને પકડી લાવ્યા એ સારી વાત છે. આજે પોલીસના માથે સારી કામગીરીના લેબલ નથી લાગતા ત્યારે આ ઘટનાની સફળતા બદલ પોલીસ વિભાગની કામગીરીના વખાણ કરીએ તેટલા ઓછા છે, કારણ કે પોતાનું વ્હાલું સંતાન ખોવાઈ જાય ત્યારે વળી ની વેદના શું હોય છે સૌને ખબર છે અને માત્ર બે કલાકમાં પોલીસે બાળકી ને તેના માતા પિતા ને સોંપી એ દૃશ્ય ભૂલી શકાય તેમ નથી.

સીસીટીવી ચેક કરતાં સફળતા મળી 
પોલીસ મથકે રાત્રિના સમયે ફરિયાદ નોંધાઇ હતી અને પોલીસની બે ટીમો બનાવીને અપહરણ થયેલા વિસ્તાર તથા અન્ય જગ્યાએ શોધખોળ હાથ ધરાવી હતી. અપહરણ થયું તે વિસ્તારમાં સીસીટીવી કેમેરા ચેક કર્યા અને અમોને મોટી સફળતા મળી અને તુરંત જ બીલીમોરા પોલીસને ખબર કરી અને અપહરણ કરનારના ઘરેથી હેમખેમ બાળકીનો મેળવ્યો હતો. -ડો.ગિરીશ પંડ્યા. પોલીસવડા, નવસારી જિલ્લા

અડધા વિજલપોરનો વેરો બાકી, 4.5 કરોડમાંથી માંડ 2.3 કરોડ રૂપિયા પાલિકાની તિજોરીમાં પડ્યા


વિજલપોર પાલિકામાં ઘરવેરો, લાઈટવેરો, પાણીવેરો, સફાઈ વેરો, ગટરવેરો અને શિક્ષણ ઉપકર મળી કુલ ચાલુ વર્ષનું વેરામાંગણુ 2.68 કરોડ જેટલુ છે અને પાછલી બાકી રૂ. 1.84 કરોડ મળી કુલ માંગણું 4.52 કરોડ રૂપિયાનું છે. શહેરમાં અંદાજે 25700 જેટલા મિલકતધારકો છે. જેમાં રહેણાંક, કોમર્શિયલ, ઔદ્યોગિક તમામ પ્રકારના મિલકતધારકોનો સમાવેશ થાય છે. આ મિલકતધારકો પૈકી કુલ 4.52 કરોડ રૂપિયાના માંગણા થકી 2.33 કરોડ રૂપિયાની જ વસૂલાત 15 માર્ચ સુધીમાં જમા થઈ છે. બીજા શબ્દોમાં કહીએ તો કુલ માગણા સામે 51.54 ટકાની જ વસૂલાત જમા થઈ છે.

રાજ્યમાં મોખરાનું સ્થાન પણ મેળવ્યું હતું
વિજલપોર પાલિકાનો વેરાનો ટ્રેકરેકર્ડ કાયમ ખરાબ રહ્યો નથી. આજથી ચારેક વર્ષ અગાઉ જ્યારે પાલિકામાં સીઓ તરીકે વિજય પરીખ હતા ત્યારે આજે પાલિકાએ 90 ટકાથી વધુ વેરા વસૂલાત કરી સમગ્ર રાજ્યની ‘બ’ વર્ગની પાલિકામાં મોખરાનું સ્થાન મેળવ્યું હતું.

આ છે કારણો | દર વર્ષ કરતાં ઓછી વસૂલાત પાછળ આ વખતે નવું શું
  • નપાલિકાનું તંત્ર વેરો ભરાવવા બાબતે લોકજાગૃતિ કેળવવામાં સદંતર નિષ્ફળ નિવડ્યું. 
  • અન્ય પાલિકાઓમાં વેરા વસૂલાત માટે રીતસરની ઝૂંબેશો ચલાવવામાં આવે છે, જે વિજલપોરમાં અદૃશ્ય 
  • જાગૃત કેળવવાની તો દૂર વેરા ન ભરનારા લોકો સામે કોઈ પણ જાતની કડકાઈ દાખવવાનો પ્રયાસ પણ ન કરાયો 
  • નગરપાલિકાના વેરા ખાતામાં માંડ 25 ટકા જ સ્ટાફ છે જે દિશામાં સત્તાધિશોએ કોઈ જ કામગીરી કરી નથી. 
  • શહેરના મહત્તમ રહેવાસીઓ કામદાર વર્ગના છે અને હાલમાં ઔદ્યોગિક મંદીને કારણે આર્થિક મુશ્કેલીમાં છે. 
  • આકારણી તો કરી દેવામાં આવી છે પરંતુ વેચાયેલા નહીં હોય તેવા ઘણાં ફલેટનો વેરો ભરવામાં આવ્યો નથી. 

કરોડોની ગ્રાંટ મળે છે તેથી બેદરકારી?
વિજલપોર પાલિકામાં સતત બીજા વર્ષે વેરાની વસૂલાત ખુબ જ નબળી રહી છે. અહીં ઉલ્લેખનીય છે કે, કરોડો રૂપિયાની ગ્રાંટ સરકારમાંથી આવે છે તે પણ પૂરતી વપરાતી નથી, જેથી મુદ્દો એ છે કે શું પાલિકાનું ધ્યાન વેરા વસૂલાત તરફ નથી ? જોકે સ્વભંડોળની મુખ્ય આવક પણ વેરો જ છે એ ભૂલવું ન જોઈએ.

ગત વર્ષે પણ 53 ટકા જ વસૂલાત કરાઈ હતી
પાલિકાની ગત 2017-18ના વર્ષની વસૂલાત પણ ખુબ ઓછી 53 ટકા જ થઈ હતી. જોકે, ગત વર્ષે પાલિકાની સામાન્ય ચૂંટણી હોઈ મહત્તમ સ્ટાફ ચૂંટણીની કામગીરીમાં ઘણો સમય રહ્યો હોઈ ઓછી વસૂલાત થયાનું જણાવાયું હતું.

પાલિકા તંત્ર નીતિ બદલે તે આવશ્યક છે 
છેલ્લા ત્રણ વર્ષથી નગરપાલિકા વેરા વસૂલાતમાં ઢીલી નીત અપનાવી રહી છે. કારણ એ આપવામાં આવે છે કે શહેરમાં જગ્યા ન હોવાથી આવકની ફીકર નથી. પાલિકા આ નીતિ બદલે તે જરૂરી છે. એક જાગૃત નાગરિક

તમામ બાકીદારોના નળ-પાણીના જોડાણો કપાશે
શહેરમાં વેરો નહીં ભરનારા તમામ બાકીદારોને ઘરે ઘરે ફરીને વેરાની નોટિસ આપવા આવશે. ત્યાર બાદ પણ જેનો વેરો બાકી હશે તેવા મિલકતધારકોના ઘરના નળ, ડ્રેનેજ કનેક્શન કાપવામાં આવશે. આગામી દિવસોમાં કડક કાર્યવાહી કરવામાં આવશે. જગદીશ મોદી, પ્રમુખ, વિજલપોર પાલિકા

17 March 2019

આર્મીમેનના મોત પ્રકરણમાં એપા.ના પ્રમુખ અને ઉપપ્રમુખ સામે ફરિયાદ


નવસારીમાં ગત 25મી ઓક્ટોબરે તીઘરા ખાતે આવેલા પાલ્મ સ્પ્રિંગ બી એપાર્ટમેન્ટમાં પોતાનાં ઉપરી અધિકારીને સરકારી ટપાલ આપીને પરત આવતા આર્મીમેનનું પાંચમાં માળની લીફ્ટ અચાનક ખુલી પડી જવાથી ગંભીર ઈજા પહોંચતા સારવાર દરમિયાન મોત થયું હતું. આ ઘટનામાં મૃતકની પત્નીએ શનિવારે આ એપાર્ટમેન્ટના સંચાલકોને લીફ્ટ ખરાબ હતી છતાં પણ લીફ્ટ રિપેર ન કરાવી બેદરકારી બદલ તેમના પતિનું મોત થયું અંગેની ફરિયાદ શનિવારે શહેર પોલીસ મથકે કરવામાં આવી હતી.

તીઘરા ખાતે આવેલા પાલ્મ સ્પ્રિંગ-બી એપાર્ટમેન્ટમાં ગત 25મી ઓકટોબર 2018ના રોજ પોતાનાં ઉપરી અધિકારીને સરકારી ટપાલ આપીને પરત આવતા આર્મીમેન રાજકુમાર યાદવનું પાંચમાં માળે લીફ્ટ અચાનક ખુલી જતા નીચે પડી ગયા હતા. આ અકસ્માતમાં તેમનું ગંભીર ઈજા ને સારવાર દરમિયાન મોત નીપજ્યું હતું. પોલીસે આ ઘટનાની આકસ્મિક મોત થયાની નોંધ કરી વધુ તપાસ હાથ ધરી હતી.

મૃતક આર્મીમેન રાજકુમાર યાદવની પત્ની અનીતા યાદવ (રહે.કાલી પહાડી, મધ્યપ્રદેશ, હાલ ઝાંસી)એ શનિવારે શહેર પોલીસ મથકે પાલ્મ સ્પ્રિંગ બીના પ્રમુખ અને ઉપપ્રમુખ વિરૂદ્ધ બેદરકારી બદલ તેમના પતિનું મોત નીપજ્યા અંગેની ફરિયાદ નોંધાવી હતી. તેમણે ફરિયાદમાં જણાવ્યું હતું કે ગત 25 ઓક્ટોબરે તેમના પતિ રાજકુમારનું મોત આકસ્મિક નહીં પરંતુ એપાર્ટમેન્ટના સંચાલકોની બેદરકારીને લીધે થયું હતું તેવું તેમના પતિનાં આર્મીના સ્ટાફ દ્વારા જાણવું મળ્યું હતું. જેમાં પાલ્મ સ્પ્રિંગ-બી એપાર્ટમેન્ટમાં આવેલી લીફ્ટ ખામીયુકત હતી અને લીફ્ટ ચાલુ હોય ત્યારે પણ લીફ્ટનો દરવાજો અચાનક ખુલી જતો હતો.

લીફ્ટ બગડેલી હતી છતાં પણ એપાર્ટમેન્ટના પ્રમુખ અશ્વિન ચંડેલ અને ઉપપ્રમુખ સમીર શાહ દ્વારા કોઈપણ વ્યક્તિનો જીવ જાય તેવી શક્યતા હોવાનું જાણવા છતાં તેને રીપેરીંગ કરાવી ન હતી. તેના કારણે તેમના પતિ રાજકુમાર યાદવનું પાલ્મ સ્પ્રિંગ બી એપાર્ટમેન્ટના પાંચમાં માળેથી લીફ્ટનો દરવાજો ખુલી જતા લીફ્ટના ખાડામાં પડતા ગંભીર ઈજાને પગલે મોત થયું હોવાનું ફરિયાદમાં જણાવ્યું હતું. ઘટનાની તપાસ પોસઈ કરી રહ્યા છે. 

પ્રમુખ - ઉપપ્રમુખની અટક કરી કાર્યવાહી
લીફ્ટ ન રીપેર કરાવવાની ભૂલ સંચાલકો દ્વારા કરવામાં આવી હોવાની ફરિયાદ મળી હતી. જેથી એપાર્ટમેન્ટના પ્રમુખ-ઉપપ્રમુખની શનિવારે ફરિયાદનાં આધારે અટક કરી વધુ તપાસ હાથ ધરી છે. - ડી.એચ.વાઘેલા, પીએસઆઈ, તપાસકર્તા અધિકારી નવસારી શહેર

16 March 2019

નવસારીના કડીયાવાડમાં તસ્કરો ઘરમાંથી ગેસ સિલીન્ડર, મિકસર જ્યુસર ચોરી ગયા


નવસારીના કડીયાવાડના બંધ ઘરમાંથી કોઇ અજાણ્યો ચોર ચોરી કરી નાસી ગયો હતો. પરંતુ આ બનાવ અંગે નવસારી ટાઉન પોલીસ મથકે કોઇ ફરિયાદ નોંધાઇ ન હોવાનું જાણવા મળ્યું હતુ.

ઘટના સ્થળેથી મળતી માહિતી મુજબ, નવસારીના કડિયાવાડ મિસ્ત્રી મહોલ્લામાં જમનાબેન ભાણાભાઇ પટેલ રહે છે, ગત રવિવારે પુત્રી કિંજલબેન સાસરેથી પિયરે આવ્યા હતા. અને ગત ૧૪મી ગુરૂવારે કિંજલબેન ઘરના જાળીયાને તાળુ મારી તેમની માતા જમનાબેનને તેમના સાસરે લઇ ગયા હતા. દરમિયાન મોડી રાત્રે કોઇ અજાણ્યા ચોરે તેમના ઘરના જાળીયાને મારેલુ તાળુ કોઇ સાધન વડે તોડી ઘરમાં પ્રવેશ કર્યો હતો. ત્યારબાદ તે ચોરે ઘરના કબાટમાંથી રોકડા ૭૦,૫૦૦ રૂપિયા, બે ગેસ સિલીન્ડર, મિક્ષર જ્યુસર અને આશરે ૨ તોલાની બે નંગ સોનાની બંગડી તેમજ કબાટમાં મુકેલા સ્ટેટ બેંકનો એટીએમ કાર્ડ ચોરી કરી નાસી ગયો હતો.

શુક્રવારે વહેલી સવારે તે અજાણ્યા ચોરે જમનાબેનના એ.ટી.એમ. કાર્ડનો ઉપયોગ કરી પહેલા ૧૦ હજાર રૂપિયા, ૫ હજાર રૂપિયા અને અંતમાં ૫૦૦ રૂપિયા મળી કુલ ૧૫,૫૦૦ રૂપિયા ઉપાડી લીધા હતા. એ.ટી.એમ.માંથી પૈસા ઉપાડતા જ જમનાબેનના ફોન પર પૈસા ઉપાડ્યા હોવાના મેસેજ ગયા હતા. જોકે તે બાબતે જમનાબેને ધ્યાન આપ્યુ ન હતુ. જ્યારે સવારે પાડોશીઓ જમનાબેનનું ઘર ખુલ્લુ જોઇ અને ઘરનો સામાન અસ્ત વ્યસ્ત જોતા જમનાબેનનો સંપર્ક કર્યો હતો. જેથી જમનાબેન અને તેમની પુત્રી કિંજલબેન તાત્કાલિક નવસારી કડિયાવાડ આવી ગયા હતા.

જ્યાં તેઓએ ઘરની તપાસ કરતા રોકડા રૂપિયા, ગેસ સિલીન્ડર, મિક્ષર જ્યુસર અને સોનાની બંગડીઓ ગાયબ જણાતા ચોરી થઇ હોવાનું ધ્યાને આવ્યું હતુ. આ ઘટના અંગે મોડી સાંજ સુધી પોલીસ મથકે કોઇ ફરિયાદ નોîધાઇ ન હોવાનું જાણવા મળ્યુ હતુ.

15 March 2019

નવસારી જિલ્લામાં પબ-જી અને મોમો ચેલેન્જ મોબાઇલ ગેમ્સ રમવા પર પ્રતિબંધ


ડિજીટલ ઇન્ડિયામાં રમકડાઓોનું સ્થાન મોબાઇલે લીધુ છે, જેમાં કિશોર અને યુવાનો મોબાઈલ ગેમ્સના રવાડે ચડી જાય છે. જેમાં પબ-જી અને મોમો ગેમ્સના કારણે તેમના વ્યવહારોમાં બદલાવ જાવા મળવાની સાથે તેઓ હિંસક વલણ અપનાવતા હોવાનુ તારણ સામે આવતા જ નવસારી જિલ્લા વહીવટી તંત્ર પણ ચિંતિત બન્યુ છે. સાથે જ જિલ્લા કલેક્ટરે પબ-જી અને મોમો ચેલેન્જ ગેમ્સ ઉપર પ્રતિબંધ ફરમાવતુ જાહેરનામુ બહાર પાડ્યુ છે. જાહેરનામાનો ભંગ કરીને કોઇપણ ઉપરોક્ત બંને ગેમ્સ રમતા જણાશે, તો તેમની સામે કાયદાકિય પગલા લેવાની જાગવાઇ પણ કરવામાં આવી છે.

ડિજીટલ યુગ અને ઇન્ટરનેટની દુનિયામાં મોબાઇલે વિશ્વને નાનુ કરી નાંખ્યુ છે. મોબાઈલમાં અભ્યાસથી લઇને મનોરંજન તેમજ એકાઉન્ટથી લઇને ધંધાકિય એપ્લીકેશનો દિવસેને દિવસે વધતી જાય છે. ખાસ કરીને નાના બાળકો, કિશોરો અને યુવાનો મોબાઇલ ગેમ્સ પાછળ ઘેલા બનતા હોય છે. જેમાં ઘણી ગેમ્સ એવી છે, જે થોડા સમયમાં કિશોરો અને યુવાનોમાં એટલી પ્રચલિત બની છે, કે ગેમ્સના સારી અસરને બદલે માઠી અસરો સમાજમાં જાવા મળી રહી છે. ખાસ કરીને હાલમાં કિશોરો અને યુવાનોમાં પબ-જી અને મોમો ચેલેન્જ નામની ગેમ્સ એટલી જામી છે કે તેઓ કલાકોના કલાકો એની પાછળ કાઢી નાંખતા હોય છે.

જેના કારણે એમના અભ્યાસ પર અસર થવાની સાથો સાથ તેમના વર્તન, વાણી અને વિકાસ પર પણ માઠી અસર થઇ રહી છે. બંને ગેમ્સના કારણે તેમનામાં હિંસક વૃત્તી વધી રહી હોવાનું તારણ પણ જાણકારોએ કાઢ્યુ છે. જેથી નવસારી જિલ્લા કલેક્ટર અને મેજીસ્ટ્રેટ ડો. એમ. ડી. મોડિયાએ જાહેર સલામતી અને સુરક્ષાને ધ્યાને રાખીને પબ-જી અને મોમો ચેલેન્જ નામની બંને મોબાઇલ ગેમ્સ નવસારી જિલ્લામાં રમવા પર પ્રતિબંધ ફરમાવતુ જાહેરનામુ બહાર પાડ્યુ છે.

જો કોઇ ગેમ્સ રમતું જણાય, તો પોલીસ મથકે જાણ કરો
જિલ્લા કલેક્ટર અને મેજીસ્ટ્રેટે નવસારીજનોને અપીલ કરી છે કે આ બંને ગેમ્સ કોઇ રમતુ જણાય, તો તાત્કાલિક નજીકના પોલીસ મથકે લેખિત અથવા મૌખિક રૂપે જાણ કરવી. જ્યારે જાહેરનામાનો ભંગ કરનાર સામે ફોજદારી અધિનીયમ ૧૮૬૦ ની કલમ ૧૮૮ અને ગુજરાત પોલીસ એક્ટની કલમ ૧૩૫ હેઠળ કાયદાકિય કાર્યવાહી કરવામાં આવશે. જાકે આ જાહેરનામામાંથી ગુનાના તપાસ  કામગરીરી અને શૈક્ષણિક સંશોધનના સંદર્ભે થતી કામગીરીને બાકાત રાખવામાં આવી છે.

અકસ્માત મુદ્દે નવસારી કમલમ સમરાંગણ બન્યું, કાર્યકરો વચ્ચે છુટ્ટા હાથની મારામારી


નવસારીમાં ગુરૂવારે નવસારી લોકસભા -25 માટે નવસારી નાં ભાજપ કાર્યાલય કમલમ ખાતે સંભવિત ઉમેદવારો તેમના સમર્થકો સાથે આવ્યા હતા જેમાં સાંજના સુમારે સુરતની ચાર વિધાનસભા વિસ્તારનાં સમર્થકો સંભવિત ઉમેદવારો સાથે આવ્યા હતા, જેમાં કોઈ બાબતે બીલીમોરા શહેર ભાજપ પ્રમુખ તથા સુરતનાં સમર્થક સાથે કોઈ બાબતે બોલાચાલી થતા બીલીમોરા શહેર ભાજપનાં પ્રમુખે સુરતનાં યુવાનને લાફો ઝીંકી દઈ લાતો મારી હતી. જોકે આ બાબતે વધુ સંઘર્ષ થાય તે પહેલા જ નવસારી ભાજપનાં અગ્રણીઓએ બંને યુવાનોને છુટા પાડી મામલાનું સમાધાન કરાવ્યું હતું. જોકે આ ઘટનાનાં ભાજપના કાર્યકરોમાં ઘેરા પ્રત્યાઘાત પડ્યા હતા.

ગુરૂવારે લોક્સભા બેઠક નવસારી માટે 7 વિધાનસભાના સંભવિત ઉમેદવારોએ તેમના સમર્થકો સાથે સવારથીજ ઉમટયા હતા, જેમાં સાંજ સુધીમાં શાંત વાતાવરણમાં રજૂઆત કરવામાં આવી હતી. સાંજે લીંબાયત વિધાનસભાનાં સમર્થકો પણ આવ્યા હતા. જેમાં સુરતનાં કૃપેશ નામનો સમર્થક તેની કાર લઇને કમલમ ખાતે આવતો હતો ત્યારે રસ્તા પરથી પૂર્વ ધારાસભ્ય લક્ષ્મણ પટેલ પસાર થતા હતા. એ સમયે કારચાલકે કાર પૂરઝડપે લાવી લક્ષ્મણભાઈને અડફેટે લેવા જતો હતો ત્યારે લક્ષ્મણભાઈ ત્યાંથી ખસી જતા અકસ્માતથી બચી ગયા હતા.

આ બાબતે બીલીમોરા ભાજપનાં શહેર પ્રમુખ પ્રજ્ઞેશ પટેલને ખબર પડતા સુરતના કાર ચાલક કૃપેશ નામના યુવાનને વાત કરતા કૃપેશે પણ વળતો જવાબ આપતા પ્રજ્ઞેશે યુવાનને લાફો ઝીંકી દઈને લાત પણ ઉગામી હતી. આ ઘટના બાદ સુરતના સમર્થકો આવતા મામલો વધુ વણસે તે પહેલા નવસારી ભાજપનાં અગ્રણીઓ ભુરાભાઈ તથા નરેશ પટેલ, મિરલ પટેલે આવીને બંને યુવાનોને છુટા પાડ્યા હતા. જોકે કમલમ ખાતે બનેલી ઘટના નગરજનોમાં ચર્ચાનો વિષય બની હતી.

અકસ્માતની સ્થિતિ ઉભી થતા બોલાચાલી થઇ
ભાજપ કાર્યલય ખાતે અમે હાજર હતા ત્યારે અજાણ્યો યુવાન કાર લઇને ઝડપથી ધસી આવ્યો હતો ત્યારે અકસ્માત થાય તેવી સ્થિતિ ઉભી થઇ હતી. તેને કહેવા જતા જીભાજોડી થતા તેને તે બાબતે કહેવા જતા થોડી માથાકૂટ થઇ હતી. જોકે બાદમાં બધું સમુસુતરું પાર પડ્યું હતું એટલે વિવાદનો કોઈ પ્રશ્ન નથી. - પ્રજ્ઞેશ પટેલ, પ્રમુખ, બીલીમોરા શહેર ભાજપ

14 March 2019

મેળામાં વેચવા લાવેલો સામાન ઘરમાં આગ લાગતાં ખાક


નવસારીમાં આવેલી તીઘરા નવી વસાહત ખાતે રહેતા દેવીપુજકનાં બંધ ઘરમાં બપોરના સુમારે આકસ્મિક આગ લાગતા ધુમાડાનાં ગોટે ગોટા જોઈને ઘટનાસ્થળે લોકો ધસી આવ્યા હતા. સ્થાનિકોએ ભેગા મળી આગ ઉપર કાબૂ મેળવવાનો પ્રયત્નો કર્યા હતા. જોકે ફાયર બ્રિગેડ ઘટનાસ્થળે આવે તે પહેલા જ દેવીપૂજક પરિવારના ઘરમાં લાખો રૂપિયાનો સરસામાન બળીને ખાક થઇ ગયો હતો. ઘટનાની જાણ દેવીપુજક પરિવારને થતા તેઓ ઘરે આવતા નુકસાનગ્રસ્ત ઘરને જોતા તેઓ હતપ્રત બની ગયા હતા.

નવસારીનાં તીઘરા નવી વસાહત ખાતે યોગેશ સુરેશ દેવીપૂજક તેમની પત્ની તથા સંતાનો સાથે રહે છે. તેઓ ચાદર,પડદા, મચ્છરદાની, ફ્રિઝ, ટી.વી કવર સહિત વસ્તુઓ લાવીને છૂટક વેચાણ કરે છે.

આગામી રવિવારે વાંસકૂઈ ખાતે ગોળીગઢ બાપાના મંદિરે મેળો ભરાવાનો હોય તેઓએ છૂટક છૂટક અંદાજે રૂ. 4.50 લાખનો સામાન એકત્ર કર્યો હતો. બુધવારે યોગેશ તેમની પત્ની સાથે સુરત ખાતે તેમના સંબંધીને મળવા ગયા હતા અને ઘર બંધ હોય બપોરે લગભગ 12.45 વાગ્યાનાં સુમારે તેમના ઘરમાં અકસ્માતે આગ લાગી હતી. ધીરે ધીરે આગ ઘરમાં પ્રસરી જતા બધો સમાન આગની ચપેટમાં આવી ગયો હતો અને તમામ સામાન બળી ગયો હતો. લોકો આગને કાબુમાં લે તે પહેલા જ લાખો રૂપિયાનો સરસામાન સાથે રોકડા રૂ. 50 હજારની ચલણી નોટ બળી ગઈ હતી. ફાયર બ્રિગેડ ઘટનાસ્થળે ધસી આવી આગ પર કાબૂ મેળવ્યો હતો. આગ લાગ્યા બાદ એક કલાકનાં સુમારે ઘરના માલિક હંસાબેન અને યોગેશભાઈ ઘટનાસ્થળે આવીને જોતા ઘરમાં થયેલા નુકસાનથી રડી પડ્યા હતા અને તેમના પરિવારજનો પણ ચિંતામાં ગરકાવ થતા સ્થાનિકોએ તેમને સાંત્વના આપી હતી.

હે દાદા ! મેં કયો ગુનો કર્યો બધી મહેનતની કમાણી હતી
નવી વસાહત ખાતે રહેતા જેમના ઘરમાં આગ લાગી હતી તે ઘરનાં માલિક યોગેશ દેવીપુજક સુરત હતા ત્યારે ઘરમાં આગ લાગી હતી. તેની જાણ તેમના સગાઓએ ફોન કરી હતી. એક કલાક બાદ યોગેશ તેમની પત્ની હંસા સાથે ઘરે આવ્યો હતો ત્યારે પોતાની મહેનતથી સજાવેલા ઘરને નુકસાન પામેલી હાલતમાં જોઈ હતપ્રત બની ગયો હતો અને બોલી જવાયું હે દાદા ! ને કયો ગુનો કરેલો જેની સજા મને મળી આ બધું મારી મહેનતની પરસેવાની કમાણી હતી તેમ બોલતા આંખે પાણી આવી ગયા હતા.

હિંદુ મુસ્લિમો એક થયા
બુધવારે આગને બુઝાવવા હિંદુ મુસ્લિમો એક થયા હતા જેમાં મુસ્લિમ પાડોશી તાજુદ્દીન શેખે આગ લાગ્યાની જાણ મહોલ્લાવાસીઓને કરી હતી અને હિંદુ મુસ્લિમ યુવાનો એક થઇને આગ બુઝાવવા સાથે આવ્યા હતા.

આગથી થયેલું નુકસાન
રૂ. 4.50 લાખનો વેચાણ માટે લાવેલ સમાન (ચાદર, સોફા કવર,પડદા, ફ્રિઝ, કવર-મચ્છરદાની), સ્ટીલનો કબાટ બળી ગયો જેમાં પાકીટમાં મુકેલા રોકડા રૂ. 50 હજાર, એલઈડી ટીવી કિંમત અંદાજે રૂ.15 હજાર, નવું ફ્રિઝ કિંમત રૂ. 18 હજાર સહિત ઘરનું રાચરચીલું બળી ગયું, ઘરના પતરા તૂટી ગયા, રસોડામાં સમાન બળી ગયો.

ઘરમાં ગેસનો બાટલો ભરેલો હતો
તીઘરા નવી વસાહત ખાતે 40થી 50 ઘરો એકબીજા સાથે જોડીને છે. આગ લાગી તે પહેલા આ ઘરમાં ગેસનો બાટલો ભરેલો હતો. આગ લાગતા લોકોએ ઘરનું બારણું તોડીને પહેલા ગેસનો બાટલો સલામત રીતે બહાર કાઢી મુક્યો હતો. જો આગમાં આ બાટલો ફાટ્યો હોત તો બધા ઘરો સ્વાહા થઇ ગયા હોત એવી ચર્ચા પણ થતી હતી.

યોગેશભાઈને ત્યાંથી ધુમાડો ઉઠ્યો
બુધવારે બપોરે 12.50 વાગ્યાનાં સુમારે હું ઘરમાં બેસેલો હતો ત્યારે બાજુમાં રહેતા યોગેશભાઈને ત્યાંથી ધુમાડો ઉઠ્યો હતો. જેની જાણ મને થતા જોયું તો તેમનું ઘર બંધ હતું. તેથી બહાર જઈને લોકો તથા યોગેશના સસરા જીતુભાઈને જાણ કરી અને આગ બુઝાવવાનો પ્રયાસ કર્યો હતો અને ફાયર બ્રિગેડને જાણ કરી હતી. -તાજુદીન શેખ, પ્રત્યક્ષદર્શી,પાડોશી

મહિલાઓ આગને બુઝાવવા આક્રમક બની
તીઘરા ખાતે લાગેલી આગમાં ઘરનું બારણું બંધ હોય પુરુષો આગ વધુ પ્રસરે નહીં તે માટે યોગેશભાઈનું બંધ ઘરનું બારણું તોડવાનો પ્રયત્ન કરતા હતા. એ સમયે મહિલાઓ ઉર્મિલા, માયાબેન, રીઝવાનાબેન, અફરોઝબેન, ગીતાબેન તથા અન્ય મહિલાઓએ નજીકમાં રહેતા બાબુ કોન્ટ્રાક્ટર નામના ઇસમને ત્યાં પાણીનો બોર ચાલુ કરાવીને હાથમાં જે સાધન આવ્યું તેનાથી પાણી ભરી ભરીને આગ લાગેલા સ્થળે જઈ આગ બુઝાવવાના કામમાં લાગી હતી. નવસારી ફાયર બ્રિગેડ આવે તે પહેલા આગ ઠારવાનો પ્રયાસ કર્યો હતો.

ગુરૂહરિના દર્શનથી હરિભક્તો હિલોળે ચડ્યા


બ્રહ્મસ્વરૂ પ. પ્રમુખસ્વામી મહારાજના આધ્યાત્મિક અનુયાયી સંત શિરોમણી પ્રગટ ગુરૂહરિ પ્રગટ બ્રહ્મસ્વરૂપ પૂ. મહંતસ્વામી મહારાજ મંગળવારે રાત્રે 7.40 કલાકે નવસારી આવી પહોંચતા સંતવૃંદ અને હરિભક્ત ભાઈઓ-બહેનો બાળકો આનંદના હિલોળે ચડ્યા હતા.

પૂ. મહંતસ્વામી પધારતા નવસારી મંદિરના મહંત પૂ. આચાર્યસ્વામી પણ ભાવવિભોર બની નાચી ઉઠયા હતા. પૂ. આચાર્યસ્વામી, પૂ. પુરૂષોત્તમચરણ સ્વામી, પૂ. ડો. પૂર્ણકામસ્વામી તથા પૂ. આત્મસ્વરૂપ સ્વામીએ પૂ. મહંત સ્વામીને પુષ્પમાળા અર્પણ કરી અભિવાદન કર્યું હતું. પ્રગટ બ્રહ્મસ્વરૂપ મહંત સ્વામી મહારાજે પ્રથમ ભગવાન સ્વામિનારાયણની આરતી ઉતારી હતી. સૌ હરિભક્તોએ આરતીમાં જોડાઈને ધન્યતા અનુભવી હતી. પૂ. મહંતસ્વામીએ દીપ પ્રગટાવીને તથા સાહિત્ય ઉપર પુષ્પ વર્ષાવી અક્ષરપત્રિકાની પ્રસ્તુતિ કરાવી હતી.

નિજનિવાસે પધારતા પૂ. મહંતસ્વામીએ નવનિર્મિત સંત આશ્રમનું રિબિનની ગાંઠ છોડીને તથા પુષ્પો છાંટીને ઉદઘાટન કર્યું હતું. શ્રીજી મહારાજની પરાવાણીના ગ્રંથ વચનામૃતનું દ્વિશતાબ્દી વર્ષ ચાલી રહ્યું છે તેમ જણાવી પૂ. કૃષ્ણપ્રિયદાસસ્વામીએ ભગવાન અને સંતની સેવા કરનારાના જીવનમાં સુખ-શાંતિ છવાય જાય છે તેમ કહ્યું હતું.

નવસારી મંદિરના કોઠારી પૂ. પૂર્ણકામ સ્વામીએ નિર્માણાધીન નૂતન મંદિરના બાંધકામ અંગે વિગતવાર વાતો કરી હતી. તેમણે અક્ષરપત્રિકા દ્વારા જનસંપર્ક કેવી રીતે કરવો અને સત્સંગનો વ્યાપ, પ્રસાર-પ્રચાર વધારવા શું શું કરવું જોઈએ તેની વિગતવાર સમજ આપી હતી.

13 March 2019

દૂષિત પાણીની બોટલો લઈ દરગાહ રોડની સ્ત્રીઓનો પાલિકાએ હલ્લાબોલ


નવસારીના દરગાહરોડ વિસ્તારની મહિલાઓ મંગળવારે બપોર બાદ દુષિત, ડહોળુ પાણીની બોટલો લઈ પાલિકા કચેરીએ પહોંચી હતી ત્યાં પાલિકા દ્વારા અપાતું પાણી ગંધાતુ હોવાની બૂમરાણ મચાવી હતી.

નવસારીના દરગાહ રોડ તથા તેની નજીકના કેટલાક વિસ્તારમાં પાલિકા દ્વારા અપાતું પાણી દુષિત અને ડહોળુ આવતું હોવાની ફરિયાદ ઘણાં સમયથી છે.

જોકે તેનો ઉકેલ પાલિકા લાવી શકી નથી. આજે મંગળવારે દરગાહ રોડ વિસ્તારમાં આવેલા તાડફળિયુ વિસ્તારની કેટલીક મહિલાઓ નવસારી પાલિકા કચેરીએ પહોંચી હતી. તેઓએ પાલિકા દ્વારા અપાતા દૂષિત પાણીની બોટલો ભરી લાવી બતાવી હતી. નવસારી પાલિકા કચેરીએ આવેલી મહિલાઓના જણાવ્યા મુજબ ઘણાં સમયથી તેમના વિસ્તારમાં પાલિકા દ્વારા અપાતું પાણી દૂષિત આવે છે. છેલ્લા 10-15 દિવસથી તો ‌વધારે પ્રમાણમાં ગંધાતુ પાણી આ‌વે છે. કલાક -સવા કલાક પાલિકા પાણી આપે છે. તેમાં ઘણો સમય ખરાબ પાણી આવતું હોય જવા દેવુ પડે છે. પીવા, રાંધવા યા અન્ય રીતે પણ આ પાણી વાપરી શકાતું નથી. વેરો ભરતા હોવા છતાં પીવાલાયક પાણી ન અપાતું હોવાનું જણાવ્યું હતું. પાલિકા ભલે થોડો સમય પાણી આપે પરંતુ તેટલો સમય પણ સારુ પાણી આપી શકતી નથી.

નવસારી નગરપાલિકા કચેરીએ પહોંચેલી મહિલાઓને પ્રથમ પાણી વિભાગમાં જવાબદાર અધિકારી ન મળતા ગુસ્સે ભરાઈ હતી. જોકે બાદમાં સિટી ઈજનેર રાજુ ગુપ્તા પાસે જઈ પાણી અંગેની આપવિતી વર્ણવી હતી. નવસારીના ચારેક વોર્ડમાં પાલિકા દ્વારા આપવામાં આવતા પાણીની સમસ્યા લાંબા સમયથી જોવા મળી રહી છે પાલિકા આ પગલાં લે તે જરૂરી છે.

શહેરના અનેક વિસ્તારોમાં આ સમસ્યા
દૂષિત અને ડહોળા પાણીની સમસ્યા માત્ર દરગાહ રોડના તાડ ફળિયાની નથી સમગ્ર ચારપુલ, દરગાહ રોડ વિસ્તારની છે. દરગાહ રોડ ઉપરાંત ઘેલખડી વિસ્તારની અનેક રહેણાંક વસાહતો, દાંડીવાડ, કાશીવાડી વગેરે વિસ્તારમાં પણ પાલિકા દ્વારા અપાતું પાણી શરૂઆતમાં ખરાબ આવતા ઢોળી દેવું પડે છે.

વેરો ભરીને પણ પાણી ખરીદવા મજબૂરી
અમારા વિસ્તારમાં ઘણાં સમયથી પાણીની સમસ્યાની ફરિયાદ છે છતાં હલ કરાતી નથી. પાણી એટલું ખરાબ આવે છે કે પીવા તો ઠીક રાંધવા માટે પણ વાપરી શકાય એમ નથી. અમારે નાછૂટકે પૈસા ખર્ચી વેચાતુ પાણી લેવુ પડે છે. અસરગ્રસ્ત મુસ્લિમ મહિલા, દરગાહ રોડ, નવસારી

નવી લાઈનનું કામ શરૂ કરાયું છે
દરગાહ રોડ વિસ્તારમાં પાણીની સમસ્યા હલ કરવા નવી લાઈન નાંખવામા આવી રહી છે. જેનું કામ પણ શરૂ કરી દેવાયુ છે. લાઈન નંખાયા બાદ સમસ્યા હલ થવાની આશા છે. કાંતિભાઈ પટેલ, પ્રમુખ, નવસારી પાલિકા

ડિવાઈન સ્કૂલ આસપાસ દીપડા જેવું પ્રાણી દેખાતાં ફફડાટ, જંગલખાતાનો નન્નો


નવસારીના દાંતેજ ગામની હદમાં ડિવાઈન સ્કૂલ નજીક દીપડાએ સિક્યુરિટી ગાર્ડ ઉપર હુમલો કર્યાની વાતે ભારે ચકચાર મચી ગઈ હતી. જોકે દીપડાએ હુમલો કર્યો ન હતો પરંતુ કોઈક સિક્યુરિટી ગાર્ડને મારમારીને ફરાર થઈ ગયું હતું. આ ઘટના અંગે વિજલપોર પોલીસે નોંધ લઈ વધુ તપાસ હાથ ધરી છે.

નવસારીને અડીને આવેલા દાંતેજ ગામની હદમાં ડિવાઈન સ્કૂલના ગાર્ડ ઉપર દીપડાએ હુમલો કર્યાની વાત નવસારી પંથકમાં ફેલાઈ ગઈ હતી. જેને લઈ દીપડો દાંતેજ ગામ સુધી પહોંચી ગયાની વાતો વહેતી થતા લોકો માટે આ ચર્ચાનો વિષય બની ગયો હતો. છેલ્લા કેટલાક સમયથી નવસારીના જલાલપોર, એરૂ એગ્રીકલ્ચર યુનિવર્સિટી અને ધારાગીરી, નાની ચોવીસી સહિતના વિસ્તારોમાં દીપડો અવારનવાર દેખાતો રહ્યો છે. હવે દાંતેજમાં દીપડો દેખાયાની વાતે ચર્ચા જાગી છે. જોકે તે અંગે હજી સુધી પુષ્ટિ મળી નથી પરંતુ સ્કૂલના સીસીટીવી કેમેરામાં દીપડા જેવો આકાર ધરાવતું પ્રાણી જણાય આવે છે. સિક્યુરિટી ગાર્ડ ઉપર થયેલા હુમલાનો સમય પણ મળસ્કે જ જણાતા દીપડાએ હુમલો કર્યો હોવાની વાત જોરશોરથી ઉઠી હતી.

હુમલો નહીં, જાતે પડી ગયો હોવાનું નિવેદન
દાંતેજ ગામની હદમાં આવેલી ડિવાઈન સ્કૂલના ગેટ ઉપર સિક્યુરિટી ગાર્ડ તરીકે નોકરી કરતા ઉમેશભાઈ બાબુભાઈ રાણા (ઉ.વ. 55, વિજલપોર, ગ્રીનપાર્ક સોસાયટી, તા. જલાલપોર) ફરજ ઉપર હતા. તે વખતે સોમવારે મળસ્કે બેભાન અવસ્થામાં મળી આવ્યો હતો. તેને કોઈક એક-બે જણાંએ માર માર્યાનું અને જાતે પડી ગયાનું પોલીસ સમક્ષ નિવેદન આપ્યું હતું. જોકે પોલીસે હાલ આ ઘટનાની નોંધ લઈ તપાસ શરૂ કરી છે. વધુ તપાસ જમાદાર સુનિલસિંહ કરી રહ્યા છે.

રાણી બિલાડા જેવું પ્રાણી હોઈ શકે છે
નવસારી પંથકમાં દીપડાની વસતિ છે એ હકીકત છે પરંતુ દાંતેજ નજીક હાલ દીપડો હોવાની પુષ્ટિ થઈ નથી. સીસીટીવી ફૂટેજ પણ જોવામાં આવ્યા છે પરંતુ તેમાં જે દેખાય છે તેમાં રાણી બિલાડા જેવું પ્રાણી જણાય છે. આ દીપડો કે તેનું બચ્ચુ નથી. -વાય.એસ. પઠાણ, આરએફઓ, નવસારી

12 March 2019

નવસારીમાં શૈલેષપાર્કમાં બંગલામાંથી રૂ. 4.80 લાખની ચોરી, અન્યમાં પ્રયાસ


નવસારીમાં ચોરીનો સિલસિલો યથાવત રહેતા ચોરોને પોલીસનો કોઈ ડર ન હોય તેવું લાગી રહ્યું છે. ગત અઠવાડિયે તા.5 માર્ચે બાપુનગર ખાતે ઓમ એપાર્ટમેન્ટમાં ચોથા માળે રહેતા પ્રશાંતભાઈ નામના ઇસમને ત્યાંથી ભરદિવસે રૂ. 3 લાખની ચોરી થઇ હતી. આ ચોરીના બનાવને હજુ 6 દિવસ થયા ત્યાં તો ગત રાત્રિએ છાપરારોડ વિસ્તારમાં શૈલેષપાર્ક ખાતે રહેતા અનાવિલ પરિવારને ત્યાંથી રૂ. 4.80 લાખની ચોરી થયાની ઘટના નોંધાતા પોલીસ પેટ્રોલિંગના ચોરટાઓ ધજાગરા ઉડાવી રહ્યા છે.

નવસારીના છાપરા રોડ ખાતે આવેલી શૈલેષપાર્ક સોસાયટીમાં માતૃ છાયા બંગલામાં પૂર્વીબેન તેના પતિ પ્રશાંતભાઈ તથા પરિવાર સાથે રહે છે. તેણી પરમેશ ડાયમંડમાં નોકરી કરવા સવારે 9 વાગ્યે જાય છે. ગત 10મીએ તેમના ભાઈનું ઘર તિઘરા ખાતે બદલવાનું હોય પૂર્વીબેન રાત્રિના સમયે ભાઈને ત્યાં ગયા હતા. તેમના ઘરે વૃદ્ધ સાસુ સસરા ઘરે ઉપરના માળે સૂતા હતા.

બીજા દિવસે 11મીએ સવારે 9 વાગ્યે પોતાના ઘરે જતા જોયું તો તેમના બેડરૂમનો કબાટ તૂટેલો હતો અને સામાન વેરવિખેર પડેલો હતો. ઘરનાં પાછળનો દરવાજો જોતા તે તૂટેલો જણાયો હતો. જેથી તેમણે ગ્રામ્ય પોલીસને જાણ કરી હતી. તેમણે જોયું તો ઘરના પાછળના દરવાજાને ગીરમીટ જેવા હથિયાર વડે બે હોલ કરી કાણા પાડીને કોઈ ચોર ઇસમોએ ઘરમાં પ્રવેશ કર્યાનું જણાયું હતું.

તેમના બેડરૂમના કબાટમાં મુકેલી સોનાની બંગડી નંગ 6 કિંમત રૂ. 1.40 લાખ, સોનાની માળા કિંમત રૂ. 60 હજાર, સોનાનું લુઝ કિંમત રૂ. 20 હજાર, સોનાનો સેટ રૂ. 80 હજાર, 10 જોડી સોનાની બુટ્ટી કિંમત રૂ. 40 હજરા, સોનાનું મંગળસૂત્ર રૂ. 80 હજાર, બે નાની સોનાની ચેઈન રૂ. 20 હજાર, નાના લોકેટ 4 નંગ 40 હજાર મળી કુલ 24 તોલા કિંમમત રૂ. 4.80 લાખની ચોરી અજાણ્યા ઈસમો કરી ગયાની ફરિયાદ નોંધાવી હતી.

ઉપરાંત આજ ફરિયાદમાં તેમની સોસાયટીમાં રહેતા અર્પિત કંસારાને ત્યાંથી પણ ચોરીનો પ્રયાસ થયાનું જણાવ્યું હતું. વધુ તપાસ ગ્રામ્ય પી.આઈ. એલ.કે.પઠાણ કરી રહ્યા છે.

એક મહિનામાં 7 જગ્યાએ ચોરીના બનાવ
નવસારીમાં છેલ્લા એક માસમાં 7 જેટલી ચોરીના બનાવો નોંધાયા છે. શહેરીજનોને ચોરીનો ડર સતાવી રહ્યો છે. પોલીસ સબ સલામત હોવાનું ગાણું ગઈ રહ્યા છે ત્યારે લોકોએ જાતે જ પોતાના ઘરની રખેવાળી કરે તેવું વાતાવરણનું નિર્માણ થયુ છે.

પેટ્રોલિંગ કડક કરવામાં આવ્યું છે
છાપરા રોડ ખાતે આવેલા બે બંગલામાં ચોરી થઇ હતી, જેમાં રાત્રિના સમયે પાછળનાં ભાગેથી ચોરોએ પ્રવેશ કરીને ચોરીને અંજામ આપ્યો છે. જેમાં એક બંગલામાંથી રૂ. 4.80 લાખના સોનાના દાગીનાની ચોરી થઇ છે. જયારે બીજા બંગલામાં માત્ર ચોરીનો પ્રયાસ કર્યાનું પોલીસ તપાસમાં જણાયું છે. આખી સોસાયટીમાં માત્ર એક જ બંગલામાં સીસીટીવી કેમેરા છે તે હજુ બહારગામ હોય તેના ફૂટેજ જોવાના બાકી છે. આ ચોરોએ બંગલાનાં પાછળના ભાગેથી પ્રવેશ કરીને ચોરીને અંજામ આપ્યો છે. આ ઘટના ગ્રામ્ય અને શહેર વિસ્તારની હદમાં આવેલી છે અહીં પહેલી ચોરીની ઘટના નોંધાઈ છે.પોલીસ ની પેટ્રોલિંગ કડક કરી દેવાશે. -એલ.કે.પઠાણ, પીઆઈ, ગ્રામ્ય પોલીસ તપાસકર્તા

11 March 2019

નવસારીને મળશે 2.60 કરોડનું ઓપન ઓડિટોરિયમ


નવસારી શહેરના લોકોને વરસો બાદ આખરે પોતાનો ઓપન ઓડિટોરિયમ મળી શકશે. પાલિકા કચેરીથી થોડે દૂર દુધિયા તળાવ વિસ્તારમાં પાલિકા સંચાલિત રંગવિહાર ઓપન ઓડિટોરિયમ લગભગ તૈયાર થઈ ગયો છે. 1200થી 1500 લોકોની કેપેસિટીવાળો આ ઓડિટોરિયમ બનાવવામાં આવ્યો છે. નવસારી પાલિકા સંચાલિત દુધિયા તળાવ વિસ્તારમાં રંગવિહાર ઘણા સમયથી પડતર હાલતમાં હતો. આ સ્થળે પાલિકા સંચાલકોએ નવો જ ઓપન ઓડિટોરિયમ બનાવવાનો નિર્ણય કર્યો હતો.

આશરે અઢી વર્ષ અગાઉ આ ઓપન ઓડિટોરિયમનું કામ શરૂ કરવામાં આવ્યું હતું જે હવે લગભગ પૂર્ણતાને આરે છે. થોડું ઈલેક્ટ્રિફિકેશન, સાઉન્ડ વગેરેનું કામ જ બાકી હોવાનું જાણવા મળ્યું છે. આ ઓપન ઓડિટોરિયમ પાછળ અંદાજે 2.58 કરોડ રૂપિયાનો ખર્ચ થયો છે, જે ગ્રાંટમાંથી કરવામાં આવ્યો છે. ઓડિટોરિયમમાં 1200 ખુરશીઓ મૂકવાની ક્ષમતા છે. જેમાં અગાઉ 300 ભારતીય બેઠક રખાય તો કેપેસિટી 1500 સુધીની લઈ જવાની ક્ષમતા છે. હાલમાં વાહનોની વધેલી સંખ્યાને જોતાં પાર્કિંગ માટે પણ મોટી જગ્યા ફાળવાઈ છે.

હાલ તો આ ઓડિટોરિયમને ઓપન (ઉપરનો ભાગ ખુલ્લો) રખાયું છે. જેને લઈને ઉનાળા તથા ચોમાસામાં ખાસ કરીને તેની ઉપયોગીતા સીમિત થઈ જાય એમ છે. જોકે, હાલ આ ઓડિટોરિયમને એ રીતે બનાવાયો છે કે ભવિષ્યમાં બંધ કરવાની વિચારણા થાયતો પણ થઈ શકશે. ઓડિટોરિયમ બનવામાં ધારણા કરતા થોડો વિલંબ થયો છે. અહીં ઉલ્લેખનીય છે કે નવસારી પંથકમાં ઓડિટોરિયમ હોલ તો છે પરંતુ મોટા ભાગના ખાનગી છે પાલિકાનો આ ઓપન ઓડિટોરિયમ બનતા શહેરીજનોને ‘પોતાનું’ ઓડિટોરિયમ મળી શકશે.

હવે થોડું જ કામ બાકી છે
ઓપન ઓડિટોરિયમનું ઘણું કામ પૂર્ણ થઈ ગયું છે. હવે ઈલેકટ્રીફિકેશન, ફિનિસિંગ જેવું જ થોડુ જ કામ બાકી છે. ભાડુ નિર્ધારણ સહિતની નીતિ તો પાલિકાની ચૂંટાયેલી પાંખ નક્કી કરશે. રાજુ ગુપ્તા, સિટી ઈજનેર, નવસારી પાલિકા

મિનિમમ ભાડું રખાય તો સારું
ઓપન ઓડિટોરિયમ જે રીતનો બનાવાયો છે તેનુ ભાડું નજીવું જ રાખવું જરૂરી છે અને તો સામાન્ય વર્ગને ઉપયોગી થઈ શકશે. બીજુ કે ઓડિટોરિયમને ‘ઓપન’ નહીં પરંતુ ઉપરથી બંધ કરાય તો સારું રહેશે! ભરત શાહ (મહેક), કલારસિક, નવસારી

ભૂતકાળમાં રંગવિહાર ધમધમતો હતો
નવસારી શહેરમાં 1970ના અરસામાં રંગવિહાર (જૂનું) બન્યું હતું. તે વખતે શહેરમાં કોઈ ઓડિટોરિયમ ન હોય ખુબ ઉપયોગીતા હતી. ત્યારબાદ ટાટા હોલ પણ બન્યો. જોકે, ત્યારબાદ પણ રંગવિહારની ઉપયોગીતા થતી જ રહી હતી. 25થી 28 વર્ષ પ્રમાણમાં સારું ચાલતું હતું.

જૂના રંગવિહારમાં પાલિકા કચેરીથી ઢોરનો તબેલો
નવસારીના 70ના અરસામાં બનેલા જૂના રંગવિહારની અનેકવિધ ઉપયોગ થયો હતો. અહીં પાલિકા કચેરી ચાલી અને જનરલ બોર્ડ પણ થયા હોવાનું પાલિકાના પૂર્વ પ્રમુખ એ. ડી. પટેલ જણાવે છે. ત્યારબાદ તો અહીં ક્રમશ: કાર્યક્રમો ઓછા થતા ગયા અને બાદમાં ઢોર બંધાયા, પાલિકાનું ભંગારનું ગોડાઉન બન્યું અને મજૂરોનું નિવાસસ્થાન પણ બન્યું હતું.

ઓપન ઓડિટોરિયમની ઉપયોગીતા, લાભ
  • સાંસ્કૃતિક કાર્યક્રમો થઈ શકશે. 
  • નાટક, જાદુ સહિતના મનોરંજક કાર્યક્ર માટે 
  • સેમિનાર, માર્ગદર્શક શિબિરો વગેરે થઈ શકે. 
  • લગ્ન, બર્થડે વગેરેની પાર્ટી પણ થઈ શકે. 
  • સ્કૂલ, કોલેજોના વાર્ષિક કાર્યક્રમો માટે ઉપયોગીતા, 
  • સરકારી કાર્યક્રમો, ઉદઘાટન કાર્યક્રમો વગેરે થઈ શકે. 
  • રાજકીય પક્ષો, ખાનગી કંપનીઓ માટેના કાર્યક્રમો માટે ઉપયોગી 
  • પાલિકા સંચાલિત હોય નફાનો મુખ્ય ઉદ્દેશ ન હોય રાહતદરનું ભાડુ નક્કી થવાની શક્યતા.

10 March 2019

નવસારીમાં ગ્રીડ પ્રવેશદ્વાર પાસે વીજતારમાં ફોલ્ટ સર્જાઇ આગ ફાટી નીકળતાં 3 લારી ખાક


નવસારીના ગ્રીડ ખાતે આવેલા અહિંસા દ્વારની બાજુમાં આવેલી લારીઓમાં અચાનક આગ લાગી હતી. આગની લપેટમાં ત્રણ જેટલી લારીઓ આવી ગઈ હતી, જોકે સદનસીબે કોઈ જાનહાનિ થઇ ન હતી. નવસારી નગરપાલિકાના ફાયરની ટીમે તાત્કાલિક આવી આગ પર કાબુ મેળવતા મોટી દુર્ઘટના ટળી હતી.

નવસારીના ગ્રીડ પ્રવેશદ્વાર પાસે શનિવારે બપોરે આશરે 3 વાગ્યાનાં સુમારે જીઇબીના વીજતારમાં ફોલ્ટ થવાને કારણે સ્પાર્ક થતા આગના તણખા નીચે ઉગેલા વૃક્ષમાં પડતા તે સળગી ગયા હતા અને આગે વિકરાળ સ્વરૂપ લીધું હતું. બહારની સાઈડે આવેલી 3 દુકાનોની પ્લાસ્ટિકની તાડપત્રી સળગવા લાગી હતી, જેથી દુકાન પાસે ઉભેલા લોકોએ તાત્કાલિક દુકાનોમાં ગોઠવેલા ટેબલો હટાવી લીધા હતા અને નવસારી ફાયર બ્રિગેડને ફોન કરી જાણ કરી હતી. અચાનક આગ લાગતા અફરાતફરીનો માહોલ સર્જાયો હતો.

ફાયરબ્રિગેડના બળવંતભાઈ પટેલ તથા સ્ટાફે 3 ફાયર ફાયટર સહિત ગ્રીડ ખાતે ધસી ગયા હતા. આગ પર પાણીનો મારો ચલાવી આગને ઠારી દીધી હતી. જ્યાં આગ લાગી હતી તેની બાજુમાં ડીજીવીસીએલ કચેરી આવેલી છે, જેથી આગ ઉપર કાબૂ મેળવી લેવાતા મોટી દુર્ઘટના ટળી હતી. આ આગ લાગવાથી આ માર્ગ અડધો કલાક વાહન વ્યવહાર માટે બંધ થઇ ગયો હતો. જોકે ફાયર બ્રિગેડે આગ ઠારી દેતા લોકોએ હાશકારો અનુભવ્યો હતો.

રજૂઆતો બાદ નવસારીને બાન્દ્રા- ભાવનગર ટ્રેનનું સ્ટોપેજ


નવસારી રેલવે સલાહકાર સમિતિ તથા સાંસદ સી.આર.પાટીલ તથા સ્થાનિક ધારાસભ્યો દ્વારા કેટલાક સમયથી સુપર ફાસ્ટ ટ્રેનોના સ્ટોપેજ બાબતે પશ્ચિમ રેલવે વિભાગના અધિકારીઓને વારંવાર રજૂઆત કરવામાં આવતી હતી. જેમાં ગતરોજ બાંદ્રા- ભાવનગર ટ્રેનનું સ્ટોપેજ નવસારી મળતા રાત્રિના સમયે આ ટ્રેનને આવકારવા રેલવે સમિતિના સભ્યો આવીને ટ્રેનનાં કર્મચારીઓનું સ્વાગત કરવામાં આવ્યું હતું. આ ટ્રેનને કારણે જૈન સમાજના તીર્થયાત્રીઓને, સૌરાષ્ટ્રવાસીઓ તથા સૌરાષ્ટ્રના યાત્રાધામોના દર્શને જતા નવસારીના લોકોને ઘણો લાભ થશે. આ ટ્રેનની માંગ છેલ્લા 6 માસથી કરવામાં આવતી હતી.

છેલ્લા છ માસથી નવસારી રેલવે સલાહકાર સમિતિના સભ્યો જયદીપ દેસાઇ, સંજય શાહ, આસીફ બરોડાવાલા, સંતોષ લોટાણી, જીગીશ શાહ તથા અન્ય સભ્યો દ્વારા રેલવે વિભાગને ભાવનગર બાંદ્રા સુપર ફાસ્ટ ટ્રેન સ્ટોપેજની માંગ કરતા હતા. રજૂઆતને પગલે આ ટ્રેનનું સ્ટોપેજ મંજુર થયું છે. રેલવે પ્રશાસન દ્વારા 8માર્ચથી રાત્રિના 12 વાગ્યાનાં સુમારે નવસારી સ્ટેશને ભાવનગર બાંદ્રા સુપર ફાસ્ટ ટ્રેન ઉભી રહી હતી. રાત્રિના રેલવે કમિટીના સભ્યોએ સુરતથી પધારેલા સી.એમ.આઈ.જાદવનું સ્વાગત કર્યું હતું. રેલવે સ્ટેશન માસ્તર ઉદયસિંહ સહિતે ટ્રેનના ડ્રાઈવરનું સ્વાગત કર્યું હતું. નવસારી રેલવે સ્ટેશને ટ્રેન ભાવનગર બાંદ્રા સુપર ફાસ્ટ ટ્રેન દરરોજ ઉભી રહેશે. નવસારીમાં ટ્રેન હવે રાત્રિના 12.43 બાંદ્રા(અપ)થી આવશે અને ભાવનગર (ડાઉન )થી મળસ્કે 4.11 વાગ્યે નવસારી ઉભી રહી બાન્દ્રા જવા રવાના થશે.

અન્ય ટ્રેનના સ્ટોપેજની માંગ બે વર્ષથી થાય છે
નવસારીમાં ગત રાત્રિના સમયે ભાવનગર બાંદ્રા સુપર ફાસ્ટ ટ્રેનનું સ્ટોપેજ મળતા હવે દરરોજ ટ્રેન નવસારીમાં ઉભી રહેશે ત્યારે રેલવે કમિટીના સભ્યોએ આ સિવાય બીજી ટ્રેનોમાં બાંદ્રાથી જયપુર ટ્રેન જેને કારણે રાજસ્થાનથી સુરત આવતા ડાયમંડ તથા જ્વેલરીના વેપારીઓને લાભ મળી શકે એમ છે અને બીજી ટ્રેનની માંગમાં બાંદ્રાથી અજમેર (ઉદયપુર) સુપર ફાસ્ટ ટ્રેનનાં કારણે નવસારીનાં લોકો શ્રીનાથજી જવા માટે કોટા માર્બલના વેપારીઓ નવસારી આવવા માટે સુરત કે અન્ય સ્થળોએ ટ્રેન ના સ્ટોપેજો કરે છે. તેને બદલે આ ટ્રેન નવસારી ઉભી રહેતા લાભ થશે.

આ ટ્રેન શરૂ થતાં કોને લાભ થશે
નવસારી માં જૈન સમાજ ની અને સૌરાષ્ટ્રવાસીઓની સારી વસ્તી છે જેઓ સૌરાષ્ટ્ર જવા માટે સુરતથી ટ્રેન પકડે છે ભાવનગર બાંદ્રા સુપર ફાસ્ટ ટ્રેન ઉભી રહેતા હવે નવસારીના જૈન સમાજને ધર્મતીર્થ પાલીતાણા જવા, સૌરાષ્ટ્રવાસીઓને ભાવનગર તથા આસપાસના વિસ્તારોમાં જવા માટે અને સોરાષ્ટ્રમાં આવેલા તીર્થસ્થાનોના દર્શન કરવા સામાન્ય મુસાફરો પણ જઈ શકશે.

9 March 2019

પગથી પેપર લખી ધો. ૧૨ બોર્ડની પરીક્ષા આપતી નવસારીની સૈફલ જાગાણી


જીવનમાં ઘણી મુશ્કેલીઓ હોય, પરંતુ જેને આકાશ આંબવુ છે એ કોઇપણ ભોગે આકાશ પોતાનુ કરીને જ રહે છે. આવુ જ કંઇક નવસારીની સૈફલ જાગાણીએ કરી બતાવ્યું છે. જન્મથી જ હાથે દિવ્યાંગ સૈફલની ભણવા પ્રત્યેની ધગશને કારણે, તેણે પગને જ પોતાના હાથ બનાવ્યા અને આજે કોઇની પણ મદદ વિના સૈફલ ધોરણ ૧૨ની પરીક્ષા આપી રહી છે. જેનું આજે વિશ્વ મહિલા દિવસે જિલ્લા શિક્ષણાધિકારીએ પરીક્ષા પુરી થયા બાદ સન્માન કરીને સફળતાની શુભેચ્છાઓ પાઠવી હતી.

જન્મથી જ હાથે દિવ્યાંગ જન્મેલી સૈફ્લ જાગાણી હાથે લખી શકતી ન હોવાથી બાળપણમાં શિક્ષણથી વંચિત રહી. પરંતુ એની માતાએ પોતાની દિકરીને સમાજમાં પાછળ ન પડે એ રીતે પ્રોત્સાહત કરી અને દરેક પરિસ્થિતિમાં એના પડખે ઉભી રહી. સૈફલ મોટી થતા એણે એના પગને પોતાના હાથ બનાવ્યા અને પગથી જ લખવાનુ શીખી, જેને કારણે એણે સીધો ધોરણ-૭માં પ્રવેશ લઇ પરીક્ષા આપી અને પાસ પણ થઇ. જાકે ધોરણ ૯ માં પ્રવેશ લેવા માટે સૈફલના માતા-પિતા અચકાતા હતા. પરંતુ નવસારી નગર પાલિકા સંચાલિત નવસારી નગર પાલિકા હાઇસ્કૂલના આચાર્યએ દિવ્યાંગ સૈફલનો ભણવા પ્રત્યેનો ઉત્સાહ અને ધગશ જાઇ અને ધોરણ ૯ માં પ્રવેશ આપ્યો હતો. સાથે જ એને શાળામાં લખવામાં કોઇ સમસ્યા ન નડે એ માટે અલગ બેઠક વ્યવસ્થા પણ કરી આપી હતી.

જેને પગલે સૈફલે ધોરણ ૧૦ પાસ કર્યુ અને આજે ધોરણ ૧૨ સામાન્ય પ્રવાહમા આર્ટસની પરીક્ષા આપી રહી છે. શુક્રવારે પ્રથમ ઇતિહાસ વિષયનુ પેપર નવસારીની ચોવીસી હાઇસ્કૂલમાં હતું અને સૈફલ પરીક્ષા આપવા પહોંચી હતી. પગથી સુંદર અક્ષરોએ પેપર લખતી સૈફલને જાઇ સૌ કોઇ અચંબિત હતા. આ વાતની જાણ નવસારી જિલ્લા શિક્ષણાધિકારી આર. એમ. ચૌધરીને થતા તેમણે તરત જ આજના વિશ્વ મહિલા દિવસે ચોવીસી હાઇસ્કૂલમા પહોચ્યા હતા. જયાં પરીક્ષા પુર્ણ થયા બાદ દિવ્યાંગ સૈફ્લને મળી, એને ફૂલ અને ભેટ આપીને એને સન્માનિત કરી હતી. સાથે જ પરીક્ષામાં સફ્ળતા માટે શુભેચ્છાઓ પણ આપી હતી.

વિશ્વ મહિલા દિવસે અને પોતાનુ પ્રથમ પેપર પુર્ણ થયા બાદ જિલ્લા શિક્ષણાધિકારી તેમજ પોતાની શાળાના આચાર્યને જાઇને સૈફ્લ થોડી આશ્ચર્યમાં પડી હતી. સાથે જ તેણે સહજતાથી ફૂલ અને ભેટ સ્વિકારી જિલ્લા શિક્ષણાધિકારી અને શિક્ષકોના આશિર્વાદ મેળવ્યા હતા. જયારે શિક્ષણ પ્રત્યેની એની સફ્ર વિશે વાતો કરી હતી અને આગળ પણ ભણવાની ઇચ્છા દર્શાવી હતી. જાકે સૈફ્લને સંગીતમાં વધુ રસ હોવાથી આગળ એમાં જ કારકિર્દી બનાવવાની કામના વ્યક્ત કરી હતી.

નવસારીમાં 'સરબતિયા લેક ફ્રંટ'ને આજે ખુલ્લો મુકાશે


નવસારી શહેરના બીજા લેકફ્રંટ એવા 'સરબતિયા લેકફ્રંટ'ને શનિવારે લોકો માટે ખુલ્લુ મુકવામાં આવશે.

નવસારી શહેરમાં દોઢેક વર્ષ અગાઉ શહેરનું પ્રથમ લેકફ્રંટ 'દુધિયા તળાવ લેકફ્રંટ' બનાવવામાં આવ્યું હતું, જેનો હજારો લોકો લાભ લઈ રહ્યા છે. બાદમાં લુન્સીકૂઈ મેદાનની સામે આવેલા સરબતિયા તળાવ ફરતે પણ લેકફ્રંટ બનાવવાનું કામ શરૂ કરવામાં આવ્યું હતું. જે મોટાભાગનું કામ પૂર્ણ થઈ ગયું છે. સરબતિયા લેકફ્રંટ માટે અંદાજે દોઢ કરોડ રૂપિયાનો ખર્ચ કરવામાં આવ્યો છે. આ લેકફ્રંટમાં વોકવે સુવિધા, સિટિંગ, સેલ્ફી પોઈન્ટ, આકર્ષક એન્ટ્રી પોઈન્ટ, ટ્રી પ્લાન્ટેશન વગેરે અનેક સુવિધા ઉભી કરવામાં આવી છે. શહેરના આ બીજા લેકફ્રંટને શનિવારે સવારે નવસારીના ધારાસભ્ય પિયુષ દેસાઈ લોકો માટે ખુલ્લુ મુકશે.

અહીં ઉલ્લેખનીય છે કે શહેરની પશ્ચિમે જલાલપોરમાં થાણાં તળાવ લેકફ્રંટ પણ પૂર્ણતાને આરે છે તથા પાલિકાએ શાકમાર્કેટની સામે ટાટા તળાવ લેકફ્રંટ બનાવવાનો નિર્ણય પણ લીધો છે. આમ મહાનગરોની સરખામણી એ ખુબ નાના નવસારીમાં ચાર-ચાર લેકફ્રંટો થઈ જશે.

પ્રથમ વખત વર્ટિકલ ગાર્ડન
સરબતિયા લેકફ્રંટમાં અનેક સુવિધા તો છે પરંતુ તેની એન્ટ્રી આકર્ષક છે. દક્ષિણ બાજુએ એન્ટ્રીની દિવાલ ઉપર ગાર્ડન બનાવાયું છે. જેને વર્ટીકલ (હેગીંગ ગાર્ડન) પણ કહેવામાં આવે છે. શહેરમાં જાહેર સ્થળે આ પ્રથમ વખત બનાવાયું છે.

8 March 2019

જિલ્લા કોંગ્રેસ મંત્રી પર કરોડોની જમીન વિવાદને લઈ હુમલો કરાયાની શક્યતા


નવસારી કોગ્રેસ મંત્રી પર જમીનના કબજા બાબતે હુમલો કરાયો હોવાની શહેરભરમાં ચર્ચા ચાલી રહી છે. જોકે પોલીસે એ વાતને હાલ કોઈ સમર્થન આપ્યું નથી પરંતુ કરોડો રૂપિયાની જમીનને લઈ વિવાદ વધતા કાવતરુ રચી હુમલો કરાયાની શક્યતા છે.

નવસારીમાં દરગાહ રોડ ઉપર કાર મુકીને કોંગ્રેસ મંત્રી ફારુક પઠાણ સાંજના સમયે ઘરે જઈ રહ્યા હતા. એ સમયે ઘરથી 60 ફૂટના અંતરે જ બે યુવાનો પૈકી અલફાસએ તેને આંતરીને તેને ચપ્પુના ઘા ઉપરાછાપરી ઘા ઝીંકી દીધા હતા. જેને પગલે ફારુક પઠાણ લોહીલુહાણ હાલતમાં ઢળી પડ્યો હતો. હુમલાખોર અલફાસ તથા તેના સાથીદાર સાજીદ (બંને રહે. સુરત) ઘટનાસ્થળેથી બાઈક ઉપર ભાગી છૂટ્યા હતા. જોકે સ્થાનિક યુવાનોએ તેમનો પીછો કરી ઈંટ મારી એકને નીચે પાડી દીધો હતો. હુમલાનો ભોગ બનનાર ફારૂક પઠાણને તાત્કાલિક સારવાર અર્થે પારસી હોસ્પિટલમાં ખસેડાયો હતો. તે બાદ ઝડપાયેલા આરોપીને ઈજા થતા સારવાર માટે ખસેડવાની ફરજ પડી હતી.

જે પૈકી ફારૂક પઠાણ હાલ હોસ્પિટલમાં સારવાર હેઠળ છે. જ્યારે લોકોએ ઝડપી પાડેલા સાજીદ લોખંડવાલાને વધુ સારવાર માટે સુરત હોસ્પિટલમાં ખસેડાયો હતો. અત્રે ઉલ્લેખનીય છે કે હુમલો કરનાર મુખ્ય આરોપી અલફાસ (રહે. સુરત) ઘટનાસ્થળેથી ભાગી જવામાં સફળ રહ્યો હતો. જેની પોલીસ તપાસ કરી રહી છે. હુમલાનો ભોગ બનનાર ફારૂક પઠાણે જણાવ્યું હતું કે આ હુમલો જમીનના કબજાને લઈને થયો હોવાની શક્યતા છે. કરોડો રૂપિયાની જમીનને લઈ કેટલાક લોકો દ્વારા છેલ્લા ઘણાં સમયથી મને ટાર્ગેટ કરી ધમકી આપવામાં આવી હતી.

મહિના પહેલાં મારી હત્યાનો પ્લાન હતો
જમીન વિવાદને લઈ અવારનવાર ધમકીઓ ફારૂક પઠાણને મળતી હતી. જમીન ખાલી કરવા મુદ્દે વિવાદ ચાલી રહ્યાની શહેરભરમાં ચર્ચા ચાલી રહી છે ત્યારે ફારૂક પઠાણનું કાસળ કાઢી નાંખવા એક મહિના પહેલા પ્લાન ઘડી કાઢ્યો હોવાનું પણ ફારૂક પઠાણે વાતચીતમાં જણાવ્યું હતું કે રૂ. 20 કરોડથી વધુ કિંમતની જમીનના મામલા અન્વયે વિવાદ ચાલી રહ્યો હોય હાલ તેના સંદર્ભે જ હુમલો કરાયાની શંકા ફારૂક પઠાણે વ્યક્ત કરી હતી. જોકે તેણે આ સંદર્ભે પોલીસને હજુ સુધી કોઈ નિવેદન આપ્યું નથી.

મુખ્ય આરોપી ઝડપાય તો હકીકત બહાર આવશે
હુમલો કરનાર શખ્સ પૈકી એકને ઝડપી લેવાયો હતો. એક ફરાર છે. ફરાર આરોપીની નવસારી પોલીસે એક ટીમ બનાવી તપાસ શરૂ કરી છે. હુમલા પાછળનું કારણ હજુ સુધી જાણી શકાયું નથી. ઝડપાયેલા આરોપીને હેમરેજ થવાને કારણે હાલ તેની પૂછતાછ શક્ય બની નથી. મુખ્ય આરોપી ઝડપાયા બાદ જ હકીકત બહાર આવશે. - ડી.એચ. વાઘેલા, પોસઈ, નવસારી ટાઉન (તપાસ અધિકારી)

7 March 2019

બાગમાં જર્જરિત અજગર નવો ન બનાવાતાં તર્કવિતર્ક


નવસારીમાં ‘અજગરવાળા બાગ’ તરીકે પ્રખ્યાત ચાંદનીચોક વિસ્તારના બાળ ક્રિડાંગણનું રૂ. 46 લાખથી વધારેના ખર્ચે નવિનીકરણ થઈ રહ્યું છે ત્યાં અનેક જગ્યાએથી તૂટી ગયેલા અજગરને સંપૂર્ણ નવો ન બનાવવાનો આશ્ચર્યજનક નિર્ણય લેતા વિવાદ સર્જાયો છે.

નવસારી શહેરમાં ચાંદની ચોક વિસ્તાર નજીક બાળ ક્રિડાંગણ ગાર્ડન છે.આ ગાર્ડનનું મુખ્ય આકર્ષણ અજગરની પ્રતિકૃતિવાળી લપસણી છે જેથી બાગ ‘અજગરવાળા બાગ’ તરીકે પણ ઓળખાય છે. ઘણાં વરસો થયા હોય પાલિકાએ આ બાગનું નવિનીકરણ કરવાનો નિર્ણય કર્યો હતો અને અંદાજે 46 લાખથી વધુના ખર્ચે નવિનીકરણનું કામ શરૂ પણ કરી દેવાયું છે.

જોકે બાદમાં ચોંકાવનારી માહિતી એ મળી કે લગભગ આખા બાગની કાયાપલટ કરાઈ રહી છે પરંતુ બાગની ઓળખ સમા ‘અજગર’ રાખવામાં તો આવશે પરંતુ સંપૂર્ણ નવો ન મુકાય! સ્થળ ઉપર બાગની સ્થિતિ જોતા અજગરની પ્રતિકૃતિમાં ઠેર ઠેરથી પ્લાસ્ટર ઉખડી ગયું છે, મસમોટા કાણા પડ્યા છે તો સળિયા પણ દેખાવા લાગ્યા છે.

પાલિકાના સૂત્રો એમ કહે છે કે મોટાભાગના અજગરનું રિનોવેશન કરાશે ! જોકે સંપૂર્ણ નવો ન મુક્યાનું જણાવે છે. અહીં પ્રશ્ન એ છે કે જ્યાં લાખોનો ખર્ચ કરાય છે ત્યાં સંપૂર્ણ અજગર નવો કેમ નહીં? જો જૂના અજગરની માત્ર મરામત જ કરાય અને દુર્ઘટના બને તો જવાબદાર કોણ?

સંપૂર્ણ નવો અજગર બનાવાય એવી રજૂઆત
હાલ તો સંપૂર્ણ અજગર નવો બનાવવાનું નક્કી કરાયું નથી. સંપૂર્ણ નવો જ અજગર બનાવાય એવી રજૂઆત મેં પાલિકામાં કરી છે. - શીલાબેન દેસાઈ, ચેરમેન, બાગ સમિતિ, નવસારી પાલિકા

સ્વચ્છતામાં નવસારી 2017માં દેશમાં 25મા ક્રમે 2018માં 88મા અને હવે 101મા ક્રમે ધકેલાઇ ગયું


આજથી બે વર્ષ અગાઉ 2017માં સમગ્ર દેશમાં 25માં ક્રમે અને પશ્ચિમ ભારતની 'અ' વર્ગની પાલિકામાં પહેલા ક્રમે રહેલી નવસારી પાલિકા સ્વચ્છતા સર્વેક્ષણ 2019માં ખૂબ જ પાછળ રહી દેશમાં 101માં ક્રમે રહી છે. 2017માં જ્યારે વેસ્ટર્ન રિજનની 'અ' વર્ગની પાલિકામાં પ્રથમ ક્રમ મેળવ્યો ત્યારે નવસારીની પાલિકાના પદાધિકારીઓ - અધિકારીઓ દિલ્હી જઈ ઈનામ મેળવ્યું હતું. અને કોલર ઉંચા કર્યા હતા. જોકે ઈનામ મળતા જવાબદારી વધી જાય છે એ નાની વાત નવસારી પાલિકા ભૂલી ગઈ હતી અને સ્વચ્છતાના ધારા ધોરણ ન જાળવતા બીજા વર્ષે 2018માં 88માં ક્રમે અને ચાલુ વર્ષ 2019માં 101માં ક્રમે પછડાઈ છે. આ વાતે સાબિત કર્યું છે કે શહેર વધુ સ્વચ્છ નહીં પરંતુ ગંદુ બન્યું છે. સરકારે સર્વેક્ષણ માટે કરેલા ધારાધોરણમાં પાલિકા ખરી ઉતરી શકી નથી.

નવસારી નગરપાલિકા સ્વચ્છતા સર્વેક્ષણમાં પાછળ ધકેલાઈ કેમ તેનાં જવાબદાર પરિબળો
  1. શહેરને કચરાપેટી (લોખંડની) મુક્ત કરવાની એક ગાઈડલાઈન છે. અનેક વિસ્તારમાંથી કચરાપેટી ઉઠાવાઈ તો છે પરંતુ હજુય અંદાજે 15 જગ્યાએ કચરાપેટી યથાવત છે જે ઉભરાય છે અને ઢોર ફેંદે છે. 
  2. કચરાનું વર્ગીકરણ કરી ભીના કચરામાંથી ખાતર બનાવવાનું હોય છે. નવસારીમાં ખાતર બનાવવા માટે બંદર રોડ ઉપર પ્લાન્ટ નાંખવાની તજવીજ ચાલે તો છે પરંતુ સર્વેક્ષણ વખતે પ્લાન્ટની મશીનરી નંખાઈ નથી અને ખાતર બનાવાતું નથી. 
  3. શહેરમાં જાહેર સ્થળો, માર્ગોની લગોલગ કચરો નાંખવા લેટરબીન પ્રોજેકટ છે. જેમાં 100 મીટરના અંતરે માર્ગો નજીક મોટા ડસ્ટબીનો મુકવાના છે પરંતુ લોકોના વિરોધ યા અન્ય કારણો 60 ટકા ડસ્ટબીનો મુકાયા નથી અને પાલિકામાં પડ્યા રહ્યા છે. 
  4. સૂકા ભીના કચરાનું વર્ગીકરણ : પાલિકા મોટાભાગના શહેરમા ઘરેઘરેથી કચરો ઉઘરાવે તો છે પરંતુ સૂકો-ભીનો સાથે જ લેતી આવી છે. અલગ અલગ કચરો લેવા મિલકતધારકોને ડસ્ટબીનો આપવાની ત્રણેક મહિનાથી શરૂઆત કરી છે પરંતુ હજી 55થી 60 ટકા જ વિતરણ થઈ શક્યું છે. જેથી ઘણાં સૂકો-ભીનો કચરો અલગ આપતા નથી. 

2017માં પ. ભારતમાં નં. 1 હતું
2017માં નવસારીનો સમગ્ર પશ્ચિમ ભારતમાં 1 લાખથી 3 લાખ સુધીની વસતિ ધરાવતા શહેરોમાં (મહાપાલિકા નહીં) પ્રથમ નંબર આવ્યો હતો અને દેશમાં તમામ શહેરોમાં 25મો નંબર હતો. આ વખતે પશ્ચિમ ભારતની અલગ કેટેગરીનું પરિણામ બહાર આવ્યું યા જાણી શકાયું નથી.

ખામીઓ સુધારવામાં આવશે
સ્વચ્છતામાં દેશમાં 100મો અને રાજ્યમાં 10મો નંબર આવ્યો છે. જે ખામીઓ રહી ગઈ છે જે સુધારવામાં આવશે. - હિંમતભાઈ પટેલ, ચેરમેન, સેનેટરી કમિટી, નવસારી પાલિકા

પાલિકા અને લોકો બંને જવાબદાર
શહેરમાં આમ તો સ્વચ્છતા સારી છે પરંતુ કેટલાક વિસ્તારમાં સ્વચ્છતા બાબતે લોકોમાં પણ જાગૃતિ નથી અને પાલિકાની કામગીરી પણ નબળી છે, જેમાં સુધારો લાવવો જોઈએ. નવસારીનો નંબર પાછળ જવામાં એક કારણ એ પણ હોઈ શકે કે આપણાથી પછાત શહેરોમાં સુધારો આવ્યો હોઈ શકે. - કેરસી દેબુ, પારસી અગ્રણી, નવસારી

જે કામ કરવું જોઈએ તે શાસકો કરતા નથી
સ્વચ્છતા મુદ્દે પાલિકાના શાસકોએ જે કામ કરવું જોઈએ તે કરતા નથી. પશ્ચિમ વિસ્તારમાં તો સ્વચ્છતાનો કોન્ટ્રાકટ અપાયો છે અને તે નિષ્ફળ ગયો છે. પશ્ચિમ વિસ્તારમાં સ્વચ્છતાના અનેક પ્રશ્નો છે. - પિયુષ ઢીમ્મર, વિપક્ષ સભ્ય નવસારી નગરપાલિકા

6 March 2019

ભરબપોરે ભરચક વિસ્તારમાં બારીમાંથી ઘરમાં પ્રવેશી રૂપિયા 93 હજારની ચોરી


નવસારી શહેર સહિત સમગ્ર જિલ્લામાં ગત સોમવારે 5 સ્થળોએ ચોરીની ઘટના નોંધાઈ હતી. એક સપ્તાહ બાદ નવસારી શહેરમાં ગીચ વિસ્તાર એવા દરગાહનો વાડો, લંગરવાડની સામે રહેતા અને સલુન ચલાવતા મુસ્લિમ પરિવારને ત્યાં રૂ. 93 હજારની મત્તાની ચોરીનો બનાવ નોંધાયો હતો. જેમાં ચોર ઈસમોએ ગ્રીલની બારી પર ચડીને પ્રથમ માળે ખુલ્લી બારીમાંથી પ્રવેશ કરી ચોરીને અંજામ આપી ત્યાંથી જ ઉતરી ગયાની ઘટના નોંધાઈ હતી.

નવસારીના લંગરવાડ સામે દરગાહના વાડા વિસ્તારમાં રહેતા ઈરફાન ઈમ્તિયાઝ ખલીફા તીઘરા જકાતનાકા ખાતે હેર આર્ટ દુકાનમાં કામ કરે છે. ગતરોજ તેમના ભાણેજના લગ્ન હોય 10 વાગ્યાના સુમારે ખડસુપા ગામે ગયા હતા અને ત્યાંથી બપોરે 4.30 વાગ્યાના સુમારે આવ્યા હતા. તેઓએ ઘરનુ તાળુ ખોલી ઘરમાં જોયું તો લાકડાના કબાટમાં ચાવી રહી ગઈ હોય અને બેગમાં મુકેલા સોનાના દાગીના જોવા મળ્યા ન હતા. ઘરમાં તપાસ કરી તો મકાનના માળ ઉપર આવેલી બારી ખુલ્લી હોય અજાણ્યા ચોર ઈસમ મકાનમાં પ્રવેશી તેમના કબાટમાં મુકેલી બેગમાંથી સોનાની 14 નંગ વીટી, સોનાની 4 લેડીઝ વીટી, 3 સોનાની ચેઈન, કાનમાં પહેરવાની સોનાની એક જોડી ડુલ, નાકમાં પહેરવાની જડ, બે જોડી સોનાની એરિંગ, સોનાનું બ્રેસલેટ કુલ કિંમત રૂ. 80 તથા રોકડા રૂ. 13 હજાર મળી કુલ રૂ. 93 હજારની મત્તાની ચોરી કરી ગયાની ફરિયાદ નોંધાઈ હતી.

કપડા સૂકવવા બારી ખુલ્લી રહી ગઇ હતી
ચોરીની ઘટનામાં ભરચક વિસ્તાર હોવા છતાં ચોરોએ દિનદહાડે ઘરની બાજુની આવેલી ગલીમાંથી ગ્રીલવાળી બારી ઉપર ચડીને કપડા સુકવવા માટે બારી ખુલ્લી રાખી હતી, તેમાંથી પ્રવેશ કરીને સોનાના દાગીના-રોકડની ચોરી કરી હતી.