19 June 2019

RTO સાથે ટ્રાફિક પોલીસ પણ ભળી, 5 દિવસમાં નિયમભંગના 94 કેસ


નવસારીમાં અમદાવાદવાળી ન થાય તે માટે નવસારી આરટીઓ અને નવસારી જિલ્લા ટ્રાફિક પોલીસે સ્કૂલવર્દીનું કામકાજ કરતી સ્કૂલ ઓટો અને વાહનચાલકો વિરૂદ્ધ ઝૂંબેશને વધુ સક્રિય બનાવી હતી. આરટીઓએ તો ટ્રાફિક નિયમોનો ભંગ કરી ગેરકાયદે સ્કૂલવર્દીનું કામ કરનારા 18 વાહનચાલકોના તો લાયસન્સ જ કેન્સલ કરી નાંખતા ભારે હોબાળો મચી ગયો છે. છેલ્લા પાંચ દિવસમાં આરટીઓએ કડકાઈ દાખવી કુલ 94 કેસ કર્યા છે અને રૂ. 30 હજારથી વધુનો દંડ વસૂલ કર્યો છે. હાલ 300થી વધુ વાહનો સ્કૂલ વર્દી મારી રહ્યાનો અંદાજ છે.

અમદાવાદમાં સ્કૂલવર્દી ઈકોમાથી ત્રણ બાળકો કારચાલકની ભૂલને કારણે રોડ ઉપર પટકાયા હતા. ઈકોચાલકને તેનો અંદાજ પણ ન હતો. એ પછી પોલીસે તેની ધરપકડ કરી હતી અને જામીન ઉપર તેનો છૂટકારો થયો હતો. કારમાં તેણે 22 જેટલા વિદ્યાર્થીઓ બેસાડ્યા હતા. નીતિનિયમોને નેવે મુકી વર્દી મારનારા આ વાહનચાલકની ભૂલને પગલે અન્ય વિદ્યાર્થીઓના જીવ પણ જોખમમાં મુકાયા હતા. આ ઘટના વાયરલ થતા સમગ્ર રાજ્યભરમાં આરટીઓ અને પોલીસે કવાયત શરૂ કરી દીધી હતી.

નિયમ કરતા વધુ બાળકો બેસાડનારા વાહનચાલકો સાથે આરટીઓએ લાલ આંખ કરી હતી અને દંડ ફટકારવાનું શરૂ કર્યું હતું. ઉપરાંત વાહન જપ્ત કરવાની કામગીરી પણ કરી હતી. જેને લઈ વર્દી મારનારા વાહનચાલકોની મુશ્કેલી વધી હતી. જિલ્લાની વાત કરીએ તો નવસારી આરટીઓએ દિશાનિર્દેશ પ્રમાણે છેલ્લા 5 દિવસમાં કડકાઈ દાખવી કુલ 94 કેસ કર્યા છે. ટ્રાફિક નિયમોનો ભંગ કરનાર અને ઠાંસીઠાંસીને બાળકોને મુસાફરી કરનારા કેટલાય વાહનચાલકોની મુશ્કેલી વધી છે.

નવસારી શહેરમા આજે આરટીઓની સાથે નવસારી ટ્રાફિક પોલીસ પણ કામગીરીમાં જોડાતા સ્કૂલવર્દી મારનારા વાહનચાલકો ફફડી ઉઠયા હતા. કેટલાય સ્કૂલોમાં તો વાહનચાલકોએ બંધ પાળીને સ્થિતિની સમીક્ષા કર્યા પછી જ વાહન દોડાવવાનો નિર્ણય કર્યો હતો. બીજી તરફ સ્કૂલ વાહન નહીં આવતા બાળકના માતાપિતાની સ્થિતિ વધુ કપરી બની હતી. સમય કાઢીને બાળકોને સ્કૂલ સુધી મુકવા જવાની ફરજ પડી હતી. જોકે આ રોજબરોજ કામગીરી જોતા નોકરિયાત વર્ગને આ પરિસ્થિતિમાં સૌથી વધુ અસર થવાની શક્યતા છે.

જ્યારથી આરટીઓએ આ વાહન ચેકિંગની કામગીરી શરૂ કરી છે ત્યારથી જ વાહનચાલકો સાથે બાળકોના માતપિતાની મુશ્કેલીમાં પણ વધારો થયો છે. જોકે નવસારી આરટીઓ દ્વારા આગામી દિવસોમાં પણ આ કામગીરી કરાવવાની હોવાથી વાહનચાલકોની મુશ્કેલીનો અંત ક્યારે આવશે એ બાબતને લઈ વિમાસણમાં મુકાઈ ગયા છે. આરટીઓ દ્વારા અપાતા મસમોટી કિંમતના મેમો એ સ્કૂલ વર્દીના વાહનચાલકોની મુશ્કેલીમાં વધારો કરી દીધો હતો.

વાલીઓ ઉપર સ્કૂલવર્દીનો બોજો વધવાની શક્યતા
નવસારીમાં ખાનગી સ્કૂલમાં મોટાભાગે મોટી સ્કૂલોને બાદ કરતા રિક્ષા અને વાન દ્વારા જ વિદ્યાર્થીઓ આવાગમન કરે છે. હાલ વાલીઓ પાસેથી વિદ્યાર્થી દીઠ અંદાજિત 500થી લઈ રૂ. 800 સુધી કિ.મી. આધારે મિનિમમ ચાર્જ વસૂલાય છે ત્યારે હવે ટેક્સી-મેક્સી પાસિંગ ઉપરાંત વીમો વધતા રૂ. 50 હજાર જેટલો અંદાજ વાર્ષિક ખર્ચ થાય છે. જેથી હવે વાલીઓ ઉપર તેનો બોજો વધે તેવી શક્યતા છે.

નિયમનો ભંગ કરાતા કાર્યવાહી કરાઈ
નવસારીમાં આજે સવારે ગ્રીડરોડ, ગણદેવી રોડ ઉપર આવેલી શાળાએ તથા ટ્રાફિક પોઈન્ટ ઉપર નવસારી આરટીઓ અને નવસારી ટ્રાફિક પોલીસે સૌ પ્રથમ કામગીરી હાથ ધરી ટ્રાફિક નિયમનનો ભંગ કરનારા વાહનચાલકોને દંડ ફટકાર્યો છે. આજદિન સુધીમાં 94 કેસો થયા છે અને 30 હજારથી વધુનો દંડ કરાયો છે. - કે.એસ. વ્યાસ, એઆરટીઓ, નવસારી

18 June 2019

નવસારીમાં સોશ્યલ મીડિયા પર ફેઈક આઈડી બનાવી મહિલાને પજવતા કુરિયર સર્વિસના યુવકને માર મરાયો


સોશ્યલ મીડિયા પર ફેઈક એકાઉન્ટ બનાવીને મહિલા સાથે દોસ્તી કરવાને અને તેને છેડવાની કોશિશ આજરોજ કુરીયર બોયને ભારે પડી ગઈ હતી. જેમાં આ મહિલાએ તેના પતિને વાત કરતાં પતિએ છટકું ગોઠવી તેને દેવીનાપાર્ક સોસાયટી નજીક બોલાવતા તેણે ત્યાં આવી મહિલાની છેડતી કરવાનો પ્રયાસ કરતાં લોકોએ તેને બરાબરનો ઝૂડી કાઢતા હોસ્પિટલ ભેગો કરવાનો વારો આવ્યો હતો.


સોશ્યલ મીડિયા પર અંકિતા પટેલના નામનું ફેઈક એકાઉન્ટ બનાવી મહિલાઓ સાથે દોસ્તી કરવાની વાત કરી મહિલાની છેડતી નવસારીના કુરીયર બૉયને ભારી પડી ગઈ હતી. નવસારીના ઝવેરી સડક ખાતે રહેતો યુવાન કુરિયર બોય તરીકે કામગીરી કરે છે. જેણે સોશ્યલ મીડિયા પર અંકિત પટેલ કે અંકિતા પટેલના નામનું ફેઈક એકાઉન્ટ બનાવ્યું હતું. અને તેના દ્વારા મહિલાને પરેશાન કરતો હતો.

આ યુવાન દ્વારા એક પરિણીત મહિલાની સાથે ચેટીંગ કરીને તેને વારંવાર પરેશાન કરતો હતો. જે બાબતે મહિલા કાઠુ ન આપતા યુવાને તેને એકલી મળવા બોલાવી હતી. મહિલાએ તેના પતિને આ બાબતે વાત કરતા પતિએ મિત્રો સાથે મળીને છટકું ગોઠવી તેને દેવીનાપાર્ક ચર્ચની સામે બોલાવ્યો હતો. જ્યાં મહિલા ગાડી લઈ જતાં આ યુવાન તેની ગાડીમાં બેસી ગયો હતો. જે રીતે તે ગાડીમાં બેસી ગયો તે જોતાં રહીસોએ જણાવ્યુ કે તેણે આ રીતે ઘણી મહિલાને હેરાના કરી હશે.

જો કે આ બાબતે મહિલાના પતિ તથા કેટલાક લોકો ત્યાં હાજર હૉય તેમણે આ યુવાનને પકડીને બરાબરનો મેઠીપાક આપ્યો હતો. જે બાદ તેણે પોતાની ભૂલ કબુલી લીધી હતી. એટલું જ નહી કેટલાક  આગેવાનોએ બચાવી લેવાની ફણા કાળાકુલી કરવી પડી હતી. જો કે ઉશ્કેરાયેલી ભીડે આ યુવાનને માર મારતા તેને હોસ્પિટલ ભેગો કરવો પડ્યો હતો.

યુવકના મોબાઈલમાં ઘણા ફેઈક એકાઉન્ટ નીકળ્યા.!
મહિલાને ફેઈક એકાઉન્ટ દ્વારા દોસ્તી કરવાનો જાંસો આપી છેડતી કરતાં યુવાનને આજે લોકોના હાથમાં આવતા ભારે માર ખાવો પડ્યો હતો. જો કે કેટલાક આગેવાનોએ આ યુવાનનો મોબાઈલ જોતાં તેમાં ત્રણ થી ચાર ફેઈક એકાઉન્ટ હોવાનું સામે આવ્યું હતું. જો કે આ બાબતે પોલીસને પણ જાણ કરાઈ હતી.

નવસારીમાં બે બાઈકને ટક્કર મારી કાર હોસ્પિટલની બાજુના દરવાજામાં ભટકાઈ


નવસારીમાં પરમાર હોસ્પિટલ સામે આવેલા સર્કલ પાસે સોમવારે મોડી સાંજે 8.30ના સુમારે એક કાર (નં. GJ-21-CA-8560)ની મહિલા ચાલકે વાહન ઉપરનો કાબૂ ગુમાવી દીધો હતો. જેને પગલે કારે બે બાઈકને અડફેટે લીધી હતી અને પરમાર હોસ્પિટલના આંગણામાં મુકેલા જનરેટરમાં અથડાઈને બાજુમાં આવેલા લોખંડના દરવાજામાં ભટકાઈ હતી.

સદનસીબે હોસ્પિટલની બહાર લોકોની સંખ્યા નહીંવત હોવાથી મોટી જાનહાનિ ટળી હતી. કાર ચાલક મહિલા નવસારીના દેવીના પાર્ક વિસ્તારની હોવાની માહિતી સાંપડી છે. આ અકસ્માતમાં કારચાલક મહિલાને ઈજા પહોંચતા તેને સારવાર અર્થે ખાનગી હોસ્પિટલમાં ખસેડાઈ હતી. આ અકસ્માતમાં એકટીવા તથા શાઈન બાઈકને નુકસાન થયું હોવાની માહિતી સાંપડી છે.

કારચાલક મહિલાએ ભૂલથી બ્રેકને બદલે એક્સીલેટર પર પગ મુકાય જતા આ ઘટના ઘટી હોવાનું ચર્ચાય રહ્યું છે. મોડી સાંજે આ કારને ક્રેઇન મારફતે બહાર કાઢવામાં આવી હતી. કારચાલક મહિલા સહિત તેમની સાથે બેસેલી અન્ય મહિલા અને બહારની સાઈડે એક વ્યક્તિને ઈજા પહોંચી હોવાનું જાણવા મળ્યું છે.

અચાનક કારે મોપેડને અડફેટે લીધી
અમે અમારી દુકાન પાસે ઉભા હતા ત્યારે સામેથી અચાનક એક કાર આવીને પહેલા એક બાઈકને ત્યારબાદ એક મોપેડને અડફેટે લીધી હતી. એ પછી કાર સીધી હોસ્પિટલના જનરેટરમાં અથડાઈ હતી. આ ઘટનાને પગલે કારમાં બેઠેલી બે મહિલાઓને બહાર કાઢી સારવાર અર્થે ખસેડાઈ હતી. - મહેશ સોનકર, ફર્સ્ટ પર્સન

17 June 2019

ભાર્ગવ સોલંકી ફોટોગ્રાફી કલામાં નવસારીનું ગૌરવ બન્યો


નવસારીના છાપરા રોડ ખાતે રહેતા શિક્ષક દંપતીના એન્જિનિયર પુત્ર ભાર્ગવ સોલંકીએ અભ્યાસની સાથે ઈતર પ્રવૃત્તિમાં ફોટોગ્રાફીના શોખમાં પણ આગળ વધીને આજે નવસારી નું ગૌરવ બની રહ્યો છે જેમાં તે નવસારી, સુરત સહિત શહેરોમાં જઈને નવયુવાનો સમક્ષ ફોટોગ્રાફી વિશે નોલેજ શેર કરી ફોટો વોક કરાવી રહ્યો છે. નવસારીનો આ યુવાન પ્રથમ હશે કે જેના વિવિધ એન્ગલોથી વિરાટ આકાશગંગામાં પોતાના કેમેરા અને લાગણી વડે અદ્દભુત ફોટોગ્રાફી કરી હતી. તેમના આ ફોટોની પ્રશંસા પણ થઈ હતી.

નવસારીના છાપરા રોડ ખાતે રહેતા જગદીશ સોલંકી અને ચંદ્રાવતીબહેન રહે છે બન્ને શિક્ષક તરીકે નવસારીની વિવિધ શાળાઓમાં ફરજ બજાવી રહ્યા છે, ત્યારે બે પુત્રી અને એક પુત્ર જેમાં બન્ને પુત્રીઓના લગ્ન થયાં છે અને તેમના પુત્ર ભાર્ગવ સોલંકી (ઉવ 25) વિજ્ઞાન પ્રવાહમાં આગળ વધ્યો અને મિકેનિકલ એન્જિનિયરિંગની ડિગ્રી લીધી સાથે સાથે ગ્રાફિક ડિઝાઈન અને સિનેમેટ્રોગ્રાફીનો કોર્સ પણ કર્યો અને આજે ભાર્ગવ સોલંકી ક્રિએટીવ ફિલ્ડમાં ટીચિંગ પણ કરાવી રહ્યો છે.

ભાર્ગવ એક સોલો ટ્રાવેલર પણ છે. તે જાતે અલગ અલગ જગ્યાએ જઈને બધી જગ્યાઓને પોતાના કેમેરામાં કેપ્ચર કરી નાખે છે. હાલમાં ભાર્ગવ સુરત અને નવસારી ખાતે આવેલ ન્યુ એજ ફોટોગ્રાફી ગ્રુપમાં નોલેજ શેર કરીને અન્ય યુવાનોને પણ પ્રેણા આપી રહ્યો છે. ભાર્ગવ સોલંકી એ સુરત મહાનગર પાલિકા દ્વારા આયોજિત એસ્ટ્રો ફોટોગ્રાફી પ્રદર્શનમાં ભાગ લીધો હતો. આ પ્રદર્શનમાં 5 ફોટા પસંદ પામ્યા હતા.

આ પ્રદર્શન દરમ્યાન એસ્ટ્રોનોમી વિષય અંતર્ગત આકાશગંગા, સૂર્યમંડળ, સૂર્યમંડળના સભ્યો. રાત્રી આકાશ, સ્ટાર્ટરેલને લગતા ફોટોગ્રાફ પ્રદર્શિત કરવામાં આવ્યા છે. આ પાંચ ફોટો આ સાથે છે.

1 .ધી સીટી વિથ સ્ટાર્સ
નવસારી માં ભાર્ગવે એમની છત પર થી પાડેલ આકાશ ગંગા (મીલ્કીવે ) અર્ધ ગોળાકાર સ્વરૂપે દેખાય છે આ ફોટો ત્રણ દિવસ ની રાહ જોયા પછી રાત્રી ના 2 થી 5 વાગ્યા ના સમયે પાડ્યો છે.

2. સ્કુલ ઓફ સ્ટાર્સ
આ ફોટો ડાંગ જિલા ની એક આશ્રમ શાળા માંથી રાત્રી ના સમયે કેપ્ચર કર્યો છે 6 કલાક ની મહેનત બાદ 237 પૈકી આ અદભુત ફોટો આવ્યો હતો

૩.સ્ટાર્ટ એટ ધ વર્લ્ડ એન્ડ..
આ ફોટો માં ધ્રુવ ના તારા ને કેન્દ્રિત કરી ને નવસારી ના કાંઠા વિસ્તાર માછીવાડ ગામે દરિયા કિનારે રોકી 8 કલાક ની મહેનત બાદ 350 ફોટા પાડ્યા હતા ધ્રુવ નો તારા એક બોટ સાથે ગોઠવી ને ફોટા પાડી એક ફ્રેમ બનાવી અદભુત ફોટા નું સર્જન કર્યું છે.

4.બીટ ઓફ ધ સ્ટાર
આ ફોટા માં મિલ્કી વે નો મુખ્ય ભાગ પોતાની ગાડી માં બીટ જોડે ફ્રેમીંગ કરી છે આ ફોટા માટે સાંજે 6 વાગ્યા થી રાત્રી ના 3 વાગ્યા ની રાહ જોવા પડી હતી .

5.લેક ઓફ ધ સ્ટાર
આ ફોટા માટે ડાંગ નાં જંગલ માં રાત્રી રોકાણ કર્યું છે અને તારા ની ભ્રમણ દિશા જોઈ અને 8 કલાક ની મહેનત બાદ આ ફોટો કેપ્ચર કર્યો હતો.

આકાશગંગા પ્રત્યેની લાગણી મને શોખ તરફ ખેંચી લાવી
મને અભ્યાસની સાથે ફોટો ગ્રાફી નો પણ શોખ હતો જેમાં મારા માતાપિતાએ સંપૂર્ણ સહયોગ આપ્યો છે. મને આકાશગંગા સાથે નાનપણથી જ લાગણી છે. તેને હું મારો શોખ બનાવીને આગળ વધવા માંગું છું. મારા જેવા યુવાનો પણ આ ક્ષેત્રમાં આગળ વધે. - ભાર્ગવ સોલંકી.

16 June 2019

પાલિકાના શોપિંગ સેન્ટર પર ગેરકાડે ડોમ


નવસારી નગરપાલિકાની માલિકી હક્ક ધરાવતું શોપિંગ સેન્ટરમાં ગેરકાયદે ડોમ બની ગયું અને પાલિક આ વેપારીનાં ખોળે બેસી ગઈ હોય તેવું સ્પષ્ટ પ્રતીત થાય છે. મૌખિક મંજૂરીથી ડોમ બનાવ્યાની વાત વાગોળતો વેપારી થોડા સમયા પછી માલિકી હક્ક ભોગવશે. પાલિકા સમયસર આ ડોમ ન હટાવે તો આજુબાજુની દુકાનો માટે ખતરારૂપ સાબિત થશે.

નવસારી પાલિકામાં બેઠેલા અધિકારીઓની આપખુદીની હદ થાય છે. પાલિકા સંચાલિતા શોપિંગ સેન્ટર ઉપર એક વેપારીએ ટેરેસ પર જમ્બો ડોમ ઊભો કર્યો છે.

આ બાબતની રજૂઆત પાલિકામાં આજુબાજુનાં દુકાનદારોએ કરી હતી, તેના જવાબમાં પાલિકા ઈજનેરે એવું જણાવ્યુ હતું કે એમની નીચે દુકાન અને ગોડાઉન આવેલું છે તેમાં પાણી ગળે છે, એટલે તેમણે સ્વખર્ચે પથરાનો શેડ બનાવ્યો છે, એની કોઈ પરમીશન આપી નથી. મૌખિક વાત થઈ હોવાની ચર્ચા છે. દુકાનદારની ગ્રાઉન્ડ ફ્લોર પર ત્રણ દુકાન છે. બીજા માળે ચાર દુકાના છે. તેનો ઉપયોગ એ ગોડાઉન તરીકે કરતાં આવ્યા છે.

પ્રથમ તો એક વેપારીને આટલી બધી દુકાનો ફાળવવામાં આવી છે. તે કેવી રીતે? તેમજ દુકાનમાં પાણી ગળે છે તો શેડ અથવા ડોમની જગ્યાએ તેઓ વોટર પૃફિંગ કરાવી શકે પણ જમ્બો ડોમ ઊભો કરવાનું કારણ શું? આ પ્રશ્ન આજુબાજુનાં દુકાનદારોને સતાવી રહ્યો છે. ભવિષ્યમાં આ ડોમનો ઉપયોગ તેઓ ગોડાઉન તરીકે કરશે એ વાત નિશ્ચિત છે. પાલિકામાં વ્યવહાર પદ્ધતિથી જો આ પરમીશન આપી હોય તો સુરત જેવી પરિસ્થિતિ સર્જાયા તેવી દહેશત નકારી શકાય તેમ નથી.

ડોમ બાંધવાની કોઈ પરવાનગી અપાઈ નથી
પાલિકાનાં શોપિંગ સેન્ટરના એક બ્લોકની ઉપર ડોમ તાણી દેવાની પરવાનગી આપી છે કે કેમ તે બાબતે પાલિકાનાં ઈજનેર આર. કે. ગુપ્તાને પૂછતા તેમણે જણાવ્યું હતું કે આવી કોઈ પરવાનગી આપી નથી. પાલિકાનાં માર્કેટ ઈન્સ્પેકટરને મોકલી તેની તપાસ કરાવું છું.

નગરમાં ઠેર ઠેર ડોમ છતાં તંત્ર આંધળું
શોપિંગ સેન્ટર સિવાય નવસારી નગરમાં અનેક જગ્યાએ હાનિકારક ડોમ બનાવવામાં આવ્યા છે, જેવા કે સેન્ટ્રલ બેન્કની સામે ફટાકડાના મોટા વેપારીએ ડોમ બનાવી દીધો છે. તેનો ઉપયોગ ફટાકડાનાં ગોડાઉન તરીકે કરવામાં આવે તો મધ્ય બજારમાં મોટી હોનારત થવાનો ભય નકારી શકાય તેમ નથી. આજે રીતે નવસારી નામાંકીત હોસ્પિટલોમાં પણ ડોમ દેખાઈ આવ્યા છે. તો પાલિકા કેમ આંખે પાટા બાંધીને બેઠી છે. પાલિકા પ્રજાની જાન સાથે ખેલી રહ્યાનાં અનેક દાખલાઓ પ્રજા સમક્ષ આવ્યા છે. પાલિકામાં અનેક વખત ફરિયાદ પણ થઈ છે. પણ હાલ તેઓ મસ્ત નિંદ્રામાં પોઢ્યા હોય તેમ લાગે છે. સુરત જેવી ઘટનાનું પુનરાવર્તન થાય તો મોટી જાણ હાની થવાની સંભાવના નકારી શકાય તેમ નથી.

વાયુની અસર, નવસારી GIDCમાં વીજળી ડૂલ રહેતા ઉદ્યોગોને રોજનો 50 લાખનો ફટકો


દરિયામાં સક્રિય થયેલા વાયુ વાવાઝોડાની આડઅસર નવસારી કબીલપોર જીઆઈડીસીમાં ઈન્ડસ્ટ્રીઝ ઉપર જોવા મળી રહી છે, જેના પગલે પ્રોડકશન ઘટ્યું છે અને વિવિધ ફેકટરીઓ, કંપનીઓમાં નુકસાનીનો આંક વધી રહ્યો છે. જીઆઈડીસી વિસ્તારમાં ઈન્ડસ્ટ્રીઝ ધરાવનારા અવારનવાર વીજ કાપથી ત્રાસી ગયા છે.

જનરેટર પણ જવાબ આપી દેતા હોવાથી નાછૂટકે કામ ઉપર બ્રેક લાગી રહી છે. સમયસર વર્ક ઓર્ડર પૂર્ણ કરવામાં કંપનીના સંચાલકોને મુશ્કેલી વેઠવી પડી રહી છે. આ ઉપરાંત કર્મચારી હોવા છતાં કામગીરીનહીં કરાતા નુકસાન થઈ રહ્યું છે. આ ઉપરાંત જીઆઈડીસી વિસ્તારમાં જ આવેલી 30થી પૌવા મિલની સ્થિતિ પણ આવી જ છે. અવારનવાર પાવર કટ થવાથી 50 ટકા માલ ફેકટરીમાં ભીંજાયેલી હાલતમાં જ રહેતા બગડી રહ્યો છે અને તેનું મોટુ નુકસાન થઈ રહ્યું છે.

અધુરામાં પુરું 50 ટકા માલ બગડી જવાની સાથે કર્મચારીઓને કારણ વગર બેસાડી રાખવા પડી રહ્યા છે. તેના કારણે રોજિંદા 50 લાખથી વધુનું નુકસાન થઈ રહ્યાનો અંદાજ કાઢવામાં આવી રહ્યો છે. જો વહેલી તકે આ પાવર કટના પ્રશ્નનું નિરાકરણ નહીં આવે તો જીઆઈડીસીમાં આવેલી મોટાભાગની ઈન્ડસ્ટ્રીઝમાં વધુ નુકસાનની ભીતિ છે. જેને લઈ વીજ કંપની દ્વારા આ બાબતે યોગ્ય કામગીરી કરવામાં આવે એવી માગ પણ જીઆઈડીસીના કેટલાક વેપારીઓએ કરી છે.

એક અઠવાડિયાથી નુકસાન થઇ રહ્યું છે
કબીલપોર જીઆઈડીસીમાં 30થી વધુ પૌવા મિલ આવેલી છે. અવારનવાર વીજકાપ થતા પૌવાનો માલ મશીનરીમાં પ્રોસેસમાં રહી જાય છે અને મશીન બંધ થતા તેનું નુકસાન થઈ રહ્યું છે. રોજિંદા એક ફેકટરીમાં નુકસાન છેલ્લા એકાદ અઠવાડિયાથી થઈ રહ્યું છે. જે અંદાજે બધી મિલોની વાત કરીએ તો આ આંક 50 લાખ ઉપર પહોંચી જાય છે. - બાબુભાઈ, પ્રમુખ, પૌવા મિલ એસો. નવસારી

હજારો લોકોને રોજીરોટી અહીંથી મળે છે એનું વીજ કંપનીના અધિકારીઓએ ધ્યાન રાખવું જોઈએ
ઈન્ડસ્ટ્રીઝને બચાવવા સરકાર ધમપછાડા કરી રહી છે પરંતુ નવસારીમાં રોજિંદા લાખોનું નુકસાન વીજપાવર ન મળવાને કારણે થઈ રહ્યું છે. જો પૂરતી વીજળી સમયસર નહીં મળે તો ઈન્ડસ્ટ્રીઝને નુકસાન થવાનું જ છે. એ સામન્ય વાત વીજ કંપનીના અધિકારીઓના ધ્યાને કેમ નથી આવતી એ સમજાતું નથી. હજારો કર્મચારીઓને અહીંથી રોજીરોટી મળે છે ત્યારે આ બાબતનો ખ્યાલ રખાવો જોઈએ. - મનોજભાઈ ખટવાણી, પ્રમુખ, જીઆઈડીસી એસો. પ્રમુખ, કબીલપોર-નવસારી

વીજ કંપની દ્વારા ફોલ્ટ શોધી કામગીરી કરાઈ જ રહી છે
વાવાઝોડાના કારણે મુશ્કેલી સર્જાય રહી છે. ફોલ્ટ વધી રહ્યા છે. તેના કારણે પાવર ડુલ થઈ રહ્યો છે. કર્મચારીઓ સમસ્યાનું નિરાકરણ કરવા પ્રયત્નશીલ છે. જોકે હાલ વાવાઝોડુ વધતા સ્થિતિ હતી. આવી તકલીફ ન થાય તે માટે કામગીરી ચાલી રહી છે. - જે.એમ. રાઠોડ, ડે. એન્જિનિયર, વીજ કંપની ગ્રીડ

વીજ કંપની ઈન્ડસ્ટ્રીઝનું ધ્યાન નહીં રાખે તો મુશ્કેલી સર્જાશે
જ્યારથી 'વાયુ' વાવાઝોડાની વાત સંભળાઈ છે એ વખતથી નવસારી વીજ કંપનીમાં પણ તેની અસર થઈ ગઈ હોય તેવુ લાગી રહ્યું છે. અવારનવાર વીજકાપથી ઈન્ડસ્ટ્રીઝને નુકસાન થઈ રહ્યું છે. જવાબદાર વ્યક્તિ જ નથી કે જે ઈન્ડસ્ટ્રીઝની તકલીફને સમજી શકે. લાખોનું નુકસાન થઈ રહ્યું છે તેની જવાબદારી કોની ? આવી જ રીતે વીજધાંધિયા રહેશે તો ઈન્ડસ્ટ્રીઝ ખતમ થશે. સરકાર ઈન્ડસ્ટ્રીઝને બચાવવા મથામણ કરી રહી છે ત્યારે અહીં લાલિયાવાડી થઈ રહી છે. - ઓમપ્રકાશ અગ્રવાલ, વેપારી, નવસારી

15 June 2019

પત્નીના આડા સબંધના વહેમમાં પતિએ પબ્લિસિટીના માલિકની કાર સળગાવી


નવસારીમાં કલા પબ્લીસીટીમાં નોકરી કરતી પરિણીતાના પતિએ કલા પબ્લીસિટીના માલિકની એક કાર સળગાવી દીધી હતી. તેમજ બાજુમાં આવેલી ત્રણ મારૂતીવાન અને ત્રણ ટેમ્પાના કાચ તોડતા સીસીટીવી કેમેરામાં કેદ થયો હતો. જે કેમેરાના ફુટેજના આધારે પોલીસે નોકરી કરતી પરિણીતાના પતિની ધરપકડ કરી આગળની તજવીજ હાથ ધરી છે.

મળતી માહિતી મુજબ, મુળ મોરબી તાલુકાના ગુજરાત હાઉસીંગ બોર્ડ સામે અને હાલ નવસારીના મહારાણી શાંતાદેવી રોડ ગાંધીનગર સોસાયટીમાં રહેતા રમેશભાઇ અમરસીંગ લીખીઆ નવસારીમાં કલા પબ્લીસીટી નામની જાહેરાત એજન્સી ચલાવે છે. રમેશભાઇ મારૂતી ઇકો વાન, મારૂતીવાન , આઇસર ટેમ્પો (નં. જીજે-૨૧-ટી-૩૦૫૫), મારૂતીવાન (નં. જીજે-૨૧-બીસી-૫૪૧૩), મારૂતીવાન (નં. જીજે-૨૧-વી-૭૨૨૨), અશોક લેલન ટેમ્પો (નં. જીજે-૨૧-વી-૯૦૧૩) અને ટેમ્પો (નં. જીજે-૨૧-વી-૩૩૩૪) નો તેમના ધંધામાં ઉપયોગ કરવા માટે વપરાશ કરે છે.

ગત ૧૨મીએ રાબેતા મુજબ ઓફિસ બંધ કરી ઇકો વાન, ૩ મારૂતીવાન અને ૩ ટેમ્પા ઓફિસના આગળના ભાગે મુક્યા હતા. દરમિયાન મોડી રાત્રે મારૂતી ઇકો કારમાં આગ લાગતા કાર સળગી ગઇ હતી. જે બાબતે રમેશભાઇને જાણ થતા રમેશભાઇ તાત્કાલિક તેમની ઓફિસ પાસે પહોîચ્યા હતા. સાથે ફાયર વિભાગને પણ જાણ થતા ફાયર વિભાગે ઘટના સ્થળે પહોîચી આગ પર પાણીનો મારો ચલાવી કાબુ મેળવ્યો હતો. તેમજ ઇકો કારની બાજુમાં પાર્ક કરેલી ત્રણ મારૂતીવાન અને ૨ ટેમ્પાના આગળ, પાછળ અને સાઇડના કાચ તુટેલા નજરે પડ્યા હતા.

જેથી રમેશભાઇએ ઓફિસમાં લગાવેલા સીસીટીવી કેમેરા જોતા તેમાં નવસારીના માણેકલાલ રોડ અંબીકા નગરમાં રહેતી અને રમેશભાઇ ઓફિસમાં નોકરી કરતી ઉર્મિલાબેનનો પતિ અમીત પ્રજાપતિ હોવાનું જાણવા મળ્યુ હતુ. આ બનાવ અંગે રમેશભાઇએ અમિત વિરૂદ્ધ નવસારી ટાઉન પોલીસ મથકમાં ફરિયાદ નોધાવતા પોલીસે અમિતની ધરપકડ કરી હતી. પોલીસને પ્રાથમિક તપાસમાં અમિતની પત્ની ઉર્મિલાબેનના રમેશભાઇ સાથે આડા સંબંધ હોવાનો વહેમ રાખી અમિતે રમેશભાઇની કાર અને ટેમ્પાના કાચ તોડ્યા હોવાનું જાણવા મળ્યું હતું.

14 June 2019

નવસારીના ગાર્ડા ચાલમાં રાત્રીના સમયે અજાણ્યાઓનો પથ્થરમારો


નવસારી રેલવે સ્ટેશન વિસ્તારમાં આવેલી ગાર્ડાચાલમાં છેલ્લા બે દિવસથી રાત્રી દરમિયાન અજાણ્યા શખ્સો દ્વારા પથ્થરમારો કરવામાં આવી રહયો છે. આ બનાવથી સ્થાનિકોમાં ભયનો માહોલ ફેલાયો છે. આ ઘટના અંગે પોલીસને પણ જાણ કરવામાં આવી છે. છતાં આ પથ્થર મારા પાછળ કોણ છે અને કયા કારણસર આ પથ્થર મારો થાય છે તે તપાસમાં પોલીસ જોતરાઇ છે.

બનાવની વિગત એવી છે કે, નવસારી રેલ્વે સ્ટેશન પાસે ગાર્ડાચાલ આવેલી છે. જેમાં ૧૦૦૦ થી વધુ લોકો વસવાટ કરે છે. ખાસ કરીને અહીં મુસ્લિમ સમાજ, અનુચિત જાતિ અને અનુસુચિત જનજાતિ સમાજની વસ્તી વધુ છે. તેમજ અહીં વસતા લોકોની આર્થિક પરિસ્થિતિ પણ નબળી છે. આ વિસ્તારમાં છેલ્લા બે દિવસથી રાત્રી દરમિયાન અજાણ્યા શખ્સો દ્વારા ભારે પથ્થર મારો કરવામાં આવી રહયો છે. જેના પગલે કેટલાક મકાનોની છતને નુકસાન થયુ છે. તો કેટલાક લોકોને ઇજા થઇ હોવાનું જાણવા મળ્યુ છે.

પથ્થર મારાના બનાવ અંગે સ્થાનિકોએ પોલીસને જાણ કરી છે. પોલીસે પણ આ વિસ્તારમાં જઇ પરિસ્થિતિનું તાગ મેળવવા માટેના પ્રયાસો હાથ ધર્યા છે. આ પથ્થર મારો કોણ અને શા માટે કરી રહાય છે તેની તપાસ  હાથ ધરી છે. સાથે તે વિસ્તારના દુકાનોમાં લાગેલા સીસીટીવી કેમેરાના ફુટેજના આધારે પોલીસે આગળની તપાસ હાથ ધરી છે.

13 June 2019

નવસારી જિલ્લામાં સંખ્યા ઘટતા 12 સરકારી શાળા બંધ


નવસારી જિલ્લામાં ભાર વિનાના ભણતર અને સર્વ શિક્ષા અભિયાનના ગુલબાંગ વચ્ચે કેટલીય શાળાઓમાં વિદ્યાર્થીઓની સંખ્યામાં ઘટાડો થતા ધો. 1થી 5ની 10 પ્રા. શાળા અને ધો. 6થી 8ની 12 શાળામાં વર્ગો બંધ કરવાની નોબત આવી છે. ઉપરાંત કરાડી અને મોગાર ગામે ધો. 1થી 8માં 25 વિદ્યાર્થીઓ કરતા પણ ઓછી સંખ્યા ધ્યાને આવતા બે શાળા બંધ કરવાનો નિર્ણય કરાયો છે. એ શાળાના વિદ્યાર્થીઓને અન્ય શાળામાં ખસેડવામાં આવશે. 190 જેટલા બાળકો ઉપર તેની અસર જોવા મળશે. વધુમાં જિલ્લામાં ચાલુ વર્ષે પ્રાથમિક શાળામાં 12921 વિદ્યાર્થીઓને પ્રવેશ આપવામાં આવશે.

નવસારી જિલ્લામાં ચાલુ વર્ષે પણ પ્રવેશોત્સવની તૈયારીઓને આખરી ઓપ આપવાની પ્રાથમિક શાળામાં જોશભેર કામગીરી શરૂ કરી દેવામાં આવી છે. સરકાર દ્વારા દર વર્ષે શાળામાં નવો પ્રવેશ મેળવતા વિદ્યાર્થીઓના હિતને ધ્યાનમાં રાખી આ કાર્યક્રમનું આયોજન કરે છે પરંતુ છેલ્લા કેટલાક સમયથી સરકારી પ્રાથમિક શાળામાં વિદ્યાર્થીઓની ઘટતી જતી સંખ્યા ચિંતાનો વિષય બન્યો છે. સરકાર અનેકવિધ સુવિધાઓ આપવામાં આવતી હોવા છતાં વાલીઓ બાળકોને ખાનગી શાળામાં પ્રવેશ આપવા તત્પરતા દાખવી રહ્યા છે. જેને લઈ નવસારી જિલ્લાની સરકારી પ્રા.શાળામાં સંખ્યાનો ઘટાડો થઈ રહ્યો છે.

ગત વર્ષની વિદ્યાર્થીઓની સંખ્યાને આધારે સરકાર દ્વારા ધો. 1થી 5ની 10 જેટલી પ્રા.શાળા બંધ કરી દેવાનો હુકમ કર્યો છે. આ ઉપરાંત 12 જેટલી શાળામાં ધો. 6થી 8માં પણ વિદ્યાર્થીઓની સંખ્યા ઘટતા તે વર્ગ બંધ કરી દેવાની સૂચના આપવામાં આવી છે. વધુમાં કરાડી (જલાલપોર) અને મોગાર (નવસારી)ની પ્રા.શાળામાં વિદ્યાર્થીઓની સંખ્યા 25 કરતા ઓછી એટલે કે ક્રમશ: કરાડીમાં ધો. 1થી 8માં માત્ર કુલ સંખ્યા 17 અને મોગારમાં 20 જ રહી જતા તે બંને શાળા બંધ કરવામાં આવી છે. આ શાળામાં હાલ અભ્યાસ કરતા બાળકોને અન્ય શાળામાં ટ્રાન્સફર કરી દેવાયા છે.

અત્રે ઉલ્લેખનીય છે કે આ શાળાઓ બંધ થતા હવે નવસારીમાં કુલ 700 જેટલી પ્રા.શાળા આવેલી છે. જેમાં 12921 નવા દાખલ થયેલા વિદ્યાર્થીઓને પ્રવેશ આપવાની કામગીરી હાથ ધરવામાં આવી છે. હાલ ખાનગી શાળામાં વાલીઓને પોતાના બાળકોને અભ્યાસ કરાવવાનો ક્રેઝ દિવસે દિવસે આ સરકારી શાળામાં વિદ્યાર્થીઓની સંખ્યા ઘટી રહી છે. જિલ્લામાં કુલ 170 જેટલી ખાનગી પ્રા.શાળા આવેલી છે. જેથી આ શાળામાં જુનિ. કેજી, સિનિ. કેજી બાદ વાલીઓ આ ખાનગી શાળામાં જ બાળકોને પ્રવેશ મેળવી લેતા આ સ્થિતિનું નિર્માણ થયું છે.

આ શાળામાં ધો. 6થી 8માં 10 કરતા ઓછી વિદ્યાર્થીઓ જણાતા બંધ કરવામાં આવી
જલાલપોરમાં નિમલાઈ-9, આવડા ફળિયુ-3, નાની પેથાણ-8, કનેરા-7, કરાંખટ 8, મછાડ-8, તલાવચોરા બારોલિયા ફળિયુ-8, રાનવેરીકલ્લા મુખ્ય-10, રાનવેરીખુર્દ દાદરી ફળિયુ- એક પણ વિદ્યાર્થી નહી જણાતા આ શાળામાં ધો. 6થી 8ના વર્ગો બંધ કરાયા છે.

બંધ કરાયેલી શાળા અને બાળકોની સંખ્યા
જલાલપોર રૂપનતળાવ આટ-8, સામાપુર પાળ ફળિયા-8, અરસાણ, 9, માસા ઢીકરી ફળિયુ-6, દેવધા ભેંસલા ફળિયુ-9, તલિયારા-3, મેંધલ કોળીવાડ-8, બીગરી દઢોરા ફળિયુ-7, વગલવાડ-8 અને ચીખલીમાં સમરોલી નવા ફળિયુ 6 વિદ્યાર્થીવાળી શાળા બંધ કરી છે. ધો. 1થી 8માં 25 કરતા ઓછી વિદ્યાર્થીવાળી કરાડી પ્રા.શાળા (17) અને મોગાર પ્રા.શાળા (20) શાળા બંધ કરી છે.

સર્વાંગી વિકાસ માટે નિર્ણય
બૌદ્ધિક વિકાસ થાય અને હરિફાઈ સાથે બાળક અભ્યાસમાં આગળ આવે તે હેતુથી જ્યાં મોટી શાળામાં ઘટ છે ત્યાં ઓછી સંખ્યા ધરાવતી શાળાના બાળકોને ટ્રાન્સફર કરાયા છે. બાળકોને તેનો લાભ મળશે. બાળકોના સર્વાંગી વિકાસ માટે નિર્ણય લેવાયો છે.   એ.એસ. પટેલ, જિ.પ્રા.શિક્ષણાધિકારી, નવસારી

સરકારનો નિર્ણય છે
વિદ્યાર્થીઓની ઘટના પગલે સરકાર દ્વારા આ શાળાઓ બંધ કરવાનો નિર્ણય લેવામાં આવ્યો છે. વાલીઓને વિદ્યાર્થીઓને શાળામાં પ્રવેશ માટે સમજાવવામાં આવ્યા હતા, તેમ છતાં જરૂરી સંખ્યા નહીં થવાના કારણે શાળાઓ બંધ કરવાની ફરજ પડી છે.  ભાણીબેન પટેલ, પ્રમુખ, તાલુકા પંચાયત ગણદેવી

12 June 2019

સંભવિત 'વાયુ' વાવાઝોડાને પગલે જિલ્લાનાં 24 ગામો એલર્ટ કરાયાં


અરબી સમુદ્રમાં સર્જાયેલા ડિપ્રેશનના પગલે નવસારી જિલ્લામાં પણ વાવાઝોડુ યા ભારે પવન સાથે વરસાદ પડવાની શક્યતાને લઈ દરિયાકાંઠા વિસ્તાર નજીકના બે તાલુકાના 24 ગામોને એલર્ટ કરવામાં આવ્યા છે.

વાવાઝોડાની આગાહીને પગલે સ્થાનિક વહીવટીતંત્ર સાબદુ થયું છે અને ખાસ કરીને દરિયાકાંઠાના બે તાલુકા જલાલપોર અને ગણદેવીમાં અધિકારીઓ વિઝીટ કરી રહ્યા છે. આ બે તાલુકાના કુલ 24 ગામોને તો વિશેષ તકેદારી રાખવા 'એલર્ટ' કરવામાં આવ્યા છે. જેમાં જલાલપોર તાલુકાના 11 અને ગણદેવી તાલુકાના 13 ગામોનો સમાવેશ થાય છે. આ 24 ગામોમાં કદાચ લોકોને સ્થળાંતર કરવાની જરૂર પડે તો 24 જેટલા સ્થળાંતર સ્થળો પણ તૈયાર રાખવામાં આવ્યા છે. આ સ્થળોએ પીવાનું પાણી, ફૂડ પેકેટ, ગાદલા, તબીબી સુવિધા તૈયાર રાખવામાં આવશે. બંને તાલુકા મળી અંદાજિત 3966લોકોને વધુ અસર થવાની વકી છે. જેમાં જલાલપોર તાલુકાના 1680 અને ગણદેવી તાલુકાના 2686 લોકોનો સમાવેશ થાય છે.

દાંડી, ઉભરાટ બીચે નાહવા ઉપર મનાઈ
સંભવિત વાવાઝોડુ યા પવન સાથે વરસાદ પડવાની શક્યતાને જોતા પ્રવાસન સ્થળ દાંડી અને ઉભરાટ બીચ ઉપર પણ સુરક્ષા વ્યવસ્થા કડક કરાઈ છે. સહેલાણીઓ દરિયામાં નાહવા ન જાય તે માટે બંને દરિયાકાંઠે પોલીસે મુકી દેવાઈ છે અને લોકોને સમુદ્ર સ્નાન કરતા રોકાઈ રહ્યા છે. 13મીએ સાંજ બાદ સ્થિતિની સમીક્ષા કરી આગળનો નિર્ણય લેવાશે એમ જાણવા મળે છે.દાંડીમાં બે દિવસ ખાણીપીણીના સ્ટોલ બંધ રાખવાની સૂચના આપી દેવાઈ છે.

નવસારી જિલ્લાના એલર્ટ કરાયેલા ગામો
જલાલપોર તાલુકો : દાંતી, ઉભરાંટ, વાંસી, દાંડી, બોરસી માછીવાડ, સામાપાર, ઓંજલ, કૃષ્ણપુર, પનાર, ચીજગામ, દીપલા.
ગણદેવી તાલુકો : કલમઠા, છાપર, મોરલી, મેંધર, ભાટ, બીગરી, પોંસરી, ધોલાઈ, માસા, મોવાસા, ભાગડ, વાડી, માછીયાવાસણ.

4 ગામમાં વિશેષ તકેદારી રખાઈ
સંભવિત ભારે પવન, વરસાદ યા અન્ય આફતને જોતા નવસારી જિલ્લામાં તૈયારીઓ કરી રખાઈ છે. દરિયાકાંઠા નજીકના 24 ગામમાં વિશેષ તકેદારી રખાઈ છે. દાંડી, ઉભરાંટ માટે પોલીસને સૂચના અપાઈ છે. - ડો. એમ.ડી. મોડિયા, કલેકટર, નવસારી જિલ્લો

11 June 2019

ક્લાસિસ શરૂ કરવા સંચાલકોનો પાલિકા પર મોરચો


નવસારી શહેરમાં ચાલતા વ્યવસાયી ટ્યૂશન કલાસીસોને શાળાઓ શરૂ થઈ હોવા છતાં પાલિકાના સીઓએ 43 કલાસીસોની અરજમાંથી કોઈને પણ એનઓનસી ન આપતા યા કોઈ નિર્ણય ન લેતા સોમવારે કલાસીસના સંચાલકોનો મોરચો પાલિકા કચેરીએ ગયો હતો. સંચાલકોએ તેમના કલાસીસો જલદીથી શરૂ કરે તેવો નિર્ણય લેવા રજૂઆત કરી હતી.

સુરતમાં તક્ષશિલા એપાર્ટમેન્ટમાં ચાલતા ટ્યૂશન કલાસમાં લાગેલી આગની હોનારતમાં 21થી વધુ વિદ્યાર્થીના મૃત્યુ થતા નવસારી જિલ્લામાં પણ તંત્રએ ટ્યૂશન કલાસીસો માટે ફાયર સેફટીમાં એનઓસી જરૂરી બનાવી હતી. આ એનઓસીની સત્તા રાજ્યકક્ષાએથી પાલિકાના સીઓને અપાઈ હતી. જે અંતર્ગત શહેરમાંથી 43 જેટલા કલાસીસના સંચાલકોએ એનઓસી માટે અરજ કરી હતી.

જોકે સત્તા અપાયાના અનેક દિવસો થયા હોવા છતાં ફાયર સેફટીની એનઓસી અંગે નવસારી પાલિકા દ્વારા કોઈજ નિર્ણય ન લેવાતા તથા આજે 10મીથી શાળાઓ પણ શરૂ થતા ટ્યૂશન સંચાલકો મુશ્કેલીમાં મુકાયા છે. આ મુશ્કેલીને લઈ સોમવારે શહેરના વ્યવસાયી ટ્યૂશન સંચાલકો એકસાથે પાલિકા કચેરીએ પહોંચી સીઓ દશરથસિંહ ગોહિલને મળ્યા હતા. સીઓને મળી પોતાની લેખિત અને મૌખિક રજૂઆતો કરી હતી. સંચાલકોએ જણાવ્યું કે, એનઓસી માટેની કેટલીક શરતોમાં સમય જાય એમ હોય બાંહેધરીપત્રક લખી આપવા તૈયારી બતાવી હતી અને તે અંતર્ગત કામચલાઉ એનઓસી આપવાની માગ કરી હતી.

સંચાલકોએ એમ પણ જણાવ્યું કે સ્ટેમ્પ પેપર ઉપર બાંહેધરીપત્રકના આધારે રાજ્યના અન્ય શહેરોમાં કલાસીસોમાં શિક્ષણ કાર્ય શરૂ કરવાની મંજૂરી અપાઈ છે, તેને અનુસરવાની માગ પણ કરી હતી. સંચાલકોએ એનઓસીમાં થતા વિલંબને કારણે સંચાલકો ઉપરાંત વિદ્યાર્થીઓને પણ નુકસાન થઈ રહ્યાનું જણાવ્યું હતું. જોકે સંચાલકોની માગ સામે સીઓ ગોહિલ કોઈ જ નક્કર ખાતરી આપી ન હતી. ટ્યુશન સંચાલકોએ સાંસદ સી.આર.પાટીલની પણ મુલાકાત લીધી હતી.

ક્લાસીસ શરૂ કરવા સંચાલકોની ધીરજ ખૂટી
ફાયર સેફટીની એનઓસી કલાસીસોને મળવામાં વિલંબ થઈ રહ્યો છે અને હજુ વિલંબ થવાની વકી છે ત્યારે પ્રશ્ન એ છે કે નજીકમાં એનઓસી ન અપાય તો શું ? રજૂઆત કરવા આવેલા સંચાલકોમાં શાળા શરૂ થઈ હોય ધીરજ ખુટી ગયાનું જોવાયું હતું. કેટલાક તો તુરંત કલાસીસ શરૂ કરવા મક્કમ જણાતા હતા.

વિજલપોરમાં પણ સીઓને રજૂઆત
નવસારીના ટ્યૂશન સંચાલકોની જેમ વિજલપોરમાં પણ કલાસીસના સંચાલકોએ ત્યાંના સીઓને મળ્યા હતા, ત્યાં 24 કલાસીસની અરજી આવી છે. જ્યાં સીઓએ ધારાધોરણ, કાયદા મુજબ વર્તવાનું જણાવ્યું હતું.

માર્ગદર્શન માંગવામાં આવશે
ફાયર સેફટીની એનઓસી આપવાની ટ્યૂશન સંચાલકોની રજૂઆત આવી છે. ઉચ્ચકક્ષાએથી માર્ગદર્શન માંગવામાં આવશે. - દશરથસિંહ ગોહિલ, ચીફ ઓફિસર, નવસારી પાલિકા

સીઓને ગળે ઘંટડી!
આમ તો ફાયર સેફટીનું એનઓસી આપવાની સત્તા સ્ટેટ ફાયર પ્રિવેન્સીસ સર્વિસની છે પરંતુ તેના નિયામકે સત્તા પાલિકાના સીઓને આપી છે. નિયામકનો સત્તા બીજાને સોંપવાના પત્ર સામે સવાલ ઉઠવા લાગ્યા છે. આમ તો સીઓ જાહેરમાં વિરોધ કરતા નથી પરંતુ મળતી માહિતી મુજબ સીઓ સત્તા તબદિલમાં તેમના ગળે ઘંટી બંધાયાનું જોઈ રહ્યા છે. એમ પણ કહી રહ્યા છે કે ફાયર સેફટીનું જ્ઞાન તેના વિભાગને જ હોય છે,

તુરંત NOC જોઇતું હોય તો બે શરત
ફાયરની એનઓસી માટે બે શરતોના પાલનમાં વિલંબ થાય એમ છે. જેમાં ઈમારત ઓથોરાઈઝ હોવી જોઈએ તથા રહેણાંકમાં કલાસ ચાલતા હોય તો તેને કોમર્શિયલ કરાવવાનો થાય છે. સંચાલકો જણાવે છે કે શરતોના પાલનમાં સમય જાય એમ હોય કોઈ રસ્તો કાઢી શૈક્ષણિક કાર્ય શરૂ કરવા દો!

8 June 2019

નવસારી એપીએમસીમાં કેરીના કેરેટ ખસેડવા બાબતે બબાલ


નવસારી એપીએમસી માર્કેટમાં કેરીના કેરેટ ખસેડવા બાબતે દેવીપૂજકો અને ખેડૂતો વચ્ચે થયેલી બબાલમાં બે સોનાની ચેઇન ચોરાતા સમગ્ર મામલો ગ્રામ્ય પોલીસ મથકે પહોંચ્યો હતો.

બનાવની વિગત એવી છે કે નવસારીના વિરાવળ ખાતે આવેલી એપીએમસી માર્કેટમાં ઢળતી સાંજે નવસારી તાલુકાના માણેકપોર તથા આસપાસના ખેડૂતોએ પોતાના ખેતરનું શાકભાજી ગાડીમાં ભરી વેચવા લાવ્યા હતા. દરમિયાન રસ્તામાં પડેલા કેરી ના ચાર કેરેટ ખસેડવા મુદ્દે દેવીપૂજકો અને ખેડૂતો વચ્ચે ચકમક જરી હતી. ઉશ્કેરાયેલા દેવી પૂજકોએ ખેડૂતો ઉપર હુમલો કરી ચાર જણાને માર મારવામાં આવ્યો હતો.

મામલો બીચકતા લોકોએ પોલીસને જાણ કરી હતી. ઘટનાને પગલે પોલીસ દોડતી થઇ ગઇ હતી. એપીએમસીમાં પોલીસે પહોંચી ટોળાંને વેરવિખેર કરી સલામતીના પગલા લીધા હતા. આ ઘટનામા ખેડૂતોની ૩ લાખની બે સોનાની ચેઇન પણ ચોરી થઈ હોવાનું જાણવા મળતા પોલીસે આંગળની કામગીરી હાથ ધરી હોવાનું જાણવા મળે છે.

નવસારીના તલાવડી વિસ્તારમાં ફરી લાઈન તૂટતાં પાણીનાં ટેન્કરો દોડાવાયાં


ખોદાણને લઈને અહીંની પાણીની લાઈન ખુલ્લી થઈ ગઈ હતી. ગતરાત્રે ખોદાણ થયેલી માટી પાણીની ખુલ્લી લાઈન ઉપર પડતા લાઈન તૂટી ગઈ હતી. જેને લઈને વહેલી સવારે પાલિકાનું પાણી જ્યારે સવારે 6 વાગ્યે અપાયું ત્યારે તૂટેલી લાઈનમાંથી પાણી પૂરજોશમાં બહાર આવી ગયું હતું. લાઈન તૂટવાથી તલાવડી વિસ્તારમાં પાણી ન પહોંચતા હોહા મચી હતી. પાણીની બૂમરાણ મચી ગઈ હતી.

લોકોને પાણી પહોંચાડવા પાલિકા તંત્રએ પાણીના બે ટેન્કરો તલાવડી વિસ્તારમાં દોડાવવા પડ્યા હતા. ટેન્કર દ્વારા પાણી અપાતા લોકોને થોડી રાહત થઈ હતી. અહીં ઉલ્લેખનીય છે કે, પાણીની લાઈન તૂટતા અંદાજે 40 હજાર લિટર પાણી ખુલ્લામાં વહી ગયું હતું.

પૂરતી તકેદારી ન રખાય : તલાવડી વિસ્તારમાં જતી પાણીની લાઈન જ્યાંથી પસાર થાય છે ત્યાં બોક્સ ડ્રેઈનનું કામ ચાલે છે. જેને લઈને લાઈન ખુલ્લી થઈ ગઈ હતી. આ ખુલ્લી લાઈનમાં પૂરતી તકેદારી ન રખાતા લાઈન તૂટી ગઈ હતી. 

એક જ જગ્યાએ પુન: પાણીની લાઈન તૂટી : તલાવડી વિસ્તારમાં જતી પાણીની લાઈન એક જ અઠવાડિયામાં બીજી વખત તૂટી હતી. 31મી મેના રોજ પણ પાલિકાની નવી બનતી વરસાદી બોક્સ ડ્રેઈન નજીક જ લાઈન તૂટતા સવારે તલાવડીમાં પાણી પુરવઠો ખોરવાયો હતો.

હવે નવી લાઈન નાંખવામાં આવી : લાઈન તૂટવાથી તલાવડી વિસ્તારમાં પાણી પુરવઠો ખોરવાતા પાણીના ટેન્કરથી પાણી આપવું પડ્યું હતું. જોકે જ્યાં લાઈન તૂટી એ જગ્યાથી થોડે દૂરથી હવે નવી લાઈન નાંખી દેવામાં આવી છે. - પ્રમોદ રાઠોડ, સ્થાનિક કાઉન્સિલર, નવસારી પાલિકા વરસાદી ડ્રેઈનનું કામ

પાણીકાપના સમયે જ લાઈન તૂટતા હાલાકી : નવસારીમાં પાણીકાપ મુકાયો છે અને પાલિકા દરરોજ બે ટાઈમની જગ્યાએ એક જ ટાઈમ પાણી આપી રહી છે. પાણી કાપના સમયે એક યા બીજા કારણે પાણીની લાઈનો તૂટતા પાણીનો બગાડ થાય છે. ગુરૂવારે દરગાહ રોડ વિસ્તારમાં લાઈન તૂટી હતી.

7 June 2019

નવસારીના રામજી મંદિર પરિસરની જર્જરિત હાલત સુધારવા મહિલાઓએ પાલિકામાં 'રામધૂન' યોજી


મંદિરમાં વરસાદનું પાણી ગળે છે, એક ભાગ થોડો સમય અગાઉ પડ્યો હતો. આમ છતાં ભગવાન રામના મંદિર અને તેના પરિસરની હાલત ઠીક કરવામાં આવી નથી. જેને લઈને ભક્તો નારાજ થયા છે.

આજે ગુરૂવારે સ્થાનિક જલાલપોરની મહિલાઓનો મોરચો રામજી મંદિર અને તેને લાગુ જર્જરિત મકાન મુદ્દે નવસારી પાલિકા કચેરીએ પહોંચ્યો હતો. 'શ્રી રામ જય રામ, જય જય રામ'ની રામધૂન ગાતી મહિલાઓએ પાલિકા કચેરી ગજવી નાંખી હતી. પાલિકામાં પહોંચી આ મહિલાઓએ પરેશ વેકરીયા, નીતિન માલવિયા સાથે ઈનચાર્જ ચીફ ઓફિસર રાજુ ગુપ્તાને મળી લેખિત અને મૌખિક રજૂઆતો કરી હતી. જલાલપોરના આ સ્થાનિકોએ વર્ષો જૂના આ રામજી મંદિરની જર્જરિત મકાનની હાલત વર્ણવી હતી.

સાથોસાથ મંદિરને લાગુ આવેલા જર્જરિત મકાન અંગે તથા તેમાં રહેનારા લોકોની કાયદેસરતા સામે પણ સવાલ કર્યા હતા. મંદિરને લાગુ જર્જરિત મકાનથી મંદિરમાં આવનારને પણ ભય હોય પાલિકાની નોટીસ છતાં મકાનને ભયરહિત કરાતું ન હોય તાત્કાલિક ભયરહિત કરી કાયદેસરના પગલાંની માંગ કરી હતી.

 મંદિર પરિસરમાં કબજાનો વિવાદ?
રામજી મંદિર જર્જરિત હાલત સુધરે એવું ઘણાં ઈચ્છી રહ્યા છે પરંતુ આ મંદિર અને તેને લાગુ જગ્યા વધુ છે. વધુમાં રોડ ટચ હોવાથી મોંઘેરી પણ છે. આ સ્થિતિમાં કેટલાય લોકો યા સમૂહ પરિસર ઉપર કબજો ઈચ્છી રહ્યા હોવાનું જાણવા મળ્યું છે.

સપ્તાહમાં ફંડ આવ્યું પણ...
ગત જાન્યુઆરી માસમાં મંદિર નજીક સપ્તાહનું આયોજન પણ કરવામાં આવ્યું હતું. જેમાં થોડુ ફંડ ભેગુ થયું અને વધુ ફંડની જાહેરાત પણ થઈ હતી પરંતુ વાદવિવાદને લઈ મંદિરનો જીર્ણોદ્ધાર કરી શકાયો નથી.

..તો કાયદેસરની કાર્યવાહી કરાશે
જર્જરિત મકાન અંગેની એક નોટીસ આપ્યા બાદ હવે વધુ એક નોટીસ આપીશું. આમ છતાં જો ટ્રસ્ટ યા અન્ય લાગતા વળગતા મકાનને ભયરહિત કરવા પગલાં ન લે તો પાલિકા આગળની કાયદેસરની કાર્યવાહી કરશે. - રાજુ ગુપ્તા, ઈનચાર્જ સીઓ, નવસારી પાલિકા

નવું મંદિર બનાવાશે
જલાલપરોરના રામજી મંદિરમાં મહારાજ રહે છે અને બે ટાઈમ પૂજાપાઠ પણ થાય છે. અમે ચોમાસા બાદ આ મંદિરનું નવુ મકાન બનાવવાનું આયોજન પણ કરી રહ્યા છે. - હરિમોહન તિવારી, ટ્રસ્ટી, ઉત્તર ભારતીય સમાજ ટ્રસ્ટ

તાકીદે મરામતની જરૂર છે
અમે મહિલાઓ રામજી મંદિરમાં ભજન કરવા જઈએ છીએ ત્યારે મકાન ખરા હોવાના કારણે ભય રહે છે. તાકીદે મરામતની જરૂર છે. -  સોનલબેન સંઘાણી, ભક્ત, જલાલપોર

6 June 2019

નવસારી પાલિકાની ઇમારતોમાં જ ફાયર સેફ્ટીનો અભાવ!


સુરતના અગ્નિકાંડ બાદ પાંચ વર્ષે સરકારે જગાડતા જાગેલી નવસારી નગર પાલિકાએ શહેરની ૪૦૦ થી વધુ ઇમારતોમાં સર્વે કર્યા બાદ, મોટાભાગની ઇમારતોને ફાયર સેફ્ટી મુદ્દે નોટિસો ફટકારી છે. પરંતુ નવસારીવાસીઓને નિયમોનું પાલન કરાવવા નીકળેલી નવસારી પાલિકાની પોતાની જ ઇમારતોમાં ફાયર સેફ્ટીનો અભાવ હોવાનું લોકોમાં ચર્ચાએ ચડ્યું છે.

સુરતના સરથાણા ખાતે ટ્યુશન ક્લાસમાં લાગેલી આગે ૨૨ બાળકોના જીવ લીધા હતા. અગ્નિકાંડ બાદ સફાળી જાગેલી રાજય સરકારે ગુજરાતનાં તમામ શહેરોમાં બહુમાળી ઇમારતોમાં ફાયર સેફ્ટી મુદ્દે સતર્કતા દાખવા સર્વે અને ફાયર સેફ્ટીના સાધનો વસાવવા નોટિસો પથવાનું શરૂ કર્યું છે. જેમાં નવસારી નગર પાલિકા પણ પાંચ વર્ષ બાદ હરકતમાં આવી છે અને અલગ અલગ ટીમો બનાવીને શહેરમાં આવેલી ૪૦૦ થી વધુ બહુમાળી ઇમારતોમાં સર્વેની કામગીરી હાથ ધરી હતી.

જેમાં પાલિકા દ્વારા ૩૫૨ થી વધુ ઇમારતોમાં ફાયર સેફ્ટીની સુવિધા ન હોવાથી ત્રણ દિવસમાં ફાયર સેફ્ટીના સાધનો વસાવવાની સાથે પાલિકામાંથી ફાયર સેફ્ટીનું પ્રમાણપત્ર મેળવી લેવા નોટીસો પાઠવી છે. પરંતુ જયાં શહેરીજનો પાસેથી ફાયર સેફ્ટીનો અમલ કરવાવા નીકળેલી નવસારી પાલિકાની ઇમારતોમાં જ ફાયર સેફ્ટીનો અભાવ હોવાની વાતો ઉઠી છે.

પાલિકા કચેરીની નીચે આવેલી શાકભાજી માર્કેટ, પાલિકાના નજીક્માં આવેલા જવાહરલાલ નહેરૂ શોપિંગ સેન્ટર, લૂન્સીકુઇ નજીક અટલબિહારી બાજપાઈ શોપિંગ સેન્ટર, તીઘરા જકાતનાકા નજીકનું શોપિંગ સેન્ટર, જૂનાથાણા નજીકનું શોપિંગ સેંટર, ડો. રમાબેન હોસ્પિટલની સામે આવેલો કાઙ્ખમ્યુનિટી હાઙ્ખલ અને ઇમારત જેવી ઘણી ઇમારતોમાં ફાયર સેફ્ટીનો અભાવ હોવાની ચર્ચાએ વેગ પકડ્યો છે. ત્યારે પાલિકા પોતાની ઇમારતોમાં ક્યારે ફાયર સેફ્ટીનો અમલ કરશે એ જોવું રહ્યું.

શોપિંગ સેન્ટરના પાછળ ગેસના ચૂલાઓ અકસ્માત સર્જે તો જવાબદાર કોણ : પારસી હોસ્પિટલ સામેના અટલબિહારી બજપાઈ શોપિંગ સેન્ટરમાં મોટા ભાગે રેસ્ટોરન્ટ આવેલી છે. જેના સંચાલકો દ્વારા શોપિંગ સેન્ટરના પાર્કિંગમાં ગેરકાયદેસર રીતે શેડ તાણી બાંધ્યા છે. જેમાં પાછળની તરફ ગેસના ચૂલાઓ ચાલે છે, ત્યાં કોઈ અકસ્માત સર્જાય અને આગની ઘટના બની તો જવાબદાર કોણનો પ્રશ્ન પણ લોકમાનસમાં ઉઠી રહયો છે. કારણ સાંજના સમયે મોટી સંખ્યામાં લોકો આ રેસ્ટોરન્ટમાં ખાવા માટે આવે છે. પાલિકા આ ગેરકાયદેસર તાણી બંધાયેલા શેડને દૂર કરશે કે પછી રાજકીય રહેમ નજર હેઠળ શેડને દૂર કરવાથી દૂર રહેશે એ જોવું રહ્યું.

વિજલપોર શાસક પક્ષના નેતાએ હોદ્દાનો દુરુપયોગ કરી આર્થિક લાભ લીધાનું સાબિત થતાં સભ્ય પદ રદ


વિજલપોરના સંભાજીનગર વિસ્તારમાં રહેતા પ્રકાશ માધવરાવ પાટીલ 2018થી 2023ની ટર્મમાં પાલિકાના ભાજપ પક્ષમાંથી વોર્ડ નં. 3માં કાઉન્સિલરપદે ચૂંટાયા છે. તેઓ હાલ પાલિકામાં શાસક (ભાજપ) પક્ષના નેતાપદે બિરાજે છે. પાટીલ ગત 2013થી 2018ની પાલિકાની ટર્મમાં ભાજપની ટિકિટ ઉપર કાઉન્સિલર પદે ચૂંટાયા હતા.

પ્રકાશ પાટીલ વિરૂદ્ધ પાલિકાના વોર્ડ નં. 9ના કોંગ્રેસના ગંગાધર શુકલાએ ગુજરાત પાલિકા અધિનિયમની કલમ 11 અને 38 હેઠળ અપીલ કલેકટર ડો. મોડીયાની કોર્ટમાં દાખલ કરી હતી. અપીલમાં જણાવ્યું હતું કે પ્રકાશ પાટીલ તા. 5મી માર્ચ 2013થી 4થી માર્ચ 2018ની મુદત દરમિયાન પાલિકામાં વોર્ડ નં. 7 પરથી તથા સને 2018ની પાલિકાની ચૂંટણીમાં વોર્ડ નં. 3મા ચૂંટાયા છે. પાટીલે સભ્યપદે ચૂંટાયેલા હોવા છતાં હોદ્દાનો દુરુપયોગ કરી જય સિક્યુરિટી સર્વિસના માલિકના નાતે વિજલપોર પાલિકામાં 'સિક્યુરિટી ગાર્ડ' પુરા પાડવાનો કોન્ટ્રાકટ મેળવ્યો હતો અને કરાર કર્યો હતો.

આ મુદ્દે પાટીલને સભ્યપદેથી ગેરલાયક ઠેરવવાની દાદ કોર્ટમાં મંગાઈ હતી. આ મુદ્દો કલેકટરની કોર્ટમાં ચાલી જતા બંને પક્ષની દલીલો, હકીકતો વગેરે ધ્યાને લઈ કલેકટર ડો. મોડીયાએ હુકમ કર્યો છે, જેમાં ગંગાધર શુકલાની અપીલને ગ્રાહ્ય રાખી વિજલપોરના વોર્ડ નં. 3માંથી ચૂંટાયેલા પ્રકાશ પાટીલને સભ્યપદેથી ગેરલાયક ઠરાવાયા છે.

કલેક્ટરના ચુકાદાનું સન્માન કરૂ છું : ચૂંટાયેલા જનસેવક જો સરકારી લાભ ઉઠાવે તો તે ગેરકાયદે છે. આ બાબતની અરજી જિલ્લા કલેકટર સમક્ષ મારા દ્વારા થઈ હતી અને તે બાબતે જિલ્લા કલેકટરનો સભ્યને ગેરલાયક ઠરાવવાનો જે ચૂકાદો છે તેનો હું સન્માન કરું છું. - ગંગાધર શુકલા, અરજદાર-કાઉન્સિલર, વિજલપોર પાલિકા

ચૂંટાયેલા સભ્ય શું ન કરી શકે?
નગરપાલિકા સભ્ય પાલિકાના હુકમમાંથી કરેલા કોઈ કામમાં અથવા નગરપાલિકા સાથેના કરેલા કોઈ કરારમાં જાતે કે પોતાની ભાગીદારી મારફત પ્રત્યક્ષ રીતે કોઈ ભાગ કે હિત ધરાવતી હોય તે વ્યક્તિ પાલિકાનો સભ્ય થઈ શકે નહીં. વિજલપોર પાલિકાના કિસ્સામાં પ્રકાશ પાટીલે નગરપાલિકામાંથી ટેન્ડર પાસ કરી નાણાંકીય લાભ મેળવ્યાનું પૂરવાર થયું છે.

નગરસેવકો માટે લાલબત્તી સમાન ચૂકાદો : હાલના સમયમાં નગરપાલિકાઓનું બજેટ વરસે કરોડ રૂપિયાનુ હોય છે અને કરોડોના કોન્ટ્રાકટ વિવિધ કામો માટે અપાતા હોય છે. આ સ્થિતિમાં નવસારી કલેકટરનો આ હુકમ પાલિકાના સભ્યપદે હોવા છતાં નાણાંકીય લાભ મેળવવા ઈચ્છનારા નગરસેવકો માટે લાલબત્તી સમાન છે.

હું અપીલમાં જઈશ : મે હજુ ચૂકાદો જોયો નથી પરંતુ જો સભ્યપદેથી ગેરલાયક ઠરાવવાનો ચૂકાદો હશે તો હું ઉપર અપીલમાં જઈશ. - પ્રકાશ પાટીલ, કાઉન્સિલર, વોર્ડ નં. 3 વિજલપોર પાલિકા

5 June 2019

વિજલપોરમાં કચરાની ડમ્પિંગ સાઇટ પર આગમાં ગાય જીવતી ભુંજાઇ


વિજલપોરના રામનગર ડોલી તળાવ પાસે વિજલપોર પાલિકા દ્વારા કચરો નાંખવામાં આવે છે. જે કચરામાં અગાઉ પણ આગ લાગી હોવાના બનાવ બન્યા હતા. મંગળવારે પણ વિજલપોરમાં ડોલી તળાવ પાસે આવેલી કચરાની ડમ્પીંગ સાઇટ પર અચાનક આગ લાગી હતી. જોકે પવનનો જોર વધુ હોવાથી ધીમે ધીમે આગ વધતા સ્થાનિકોમાં અફરા તફરી મચી હતી.

આ ઘટનાની જાણ વિજલપોર પાલિકા અને ફાયર વિભાગને કરી હતી. જેથી પાલિકાના કર્મચારીઓ પહોîચ્યા હતા. પરંતુ ફાયર ફાયટર એક કલાક બાદ ઘટના સ્થળે પહોîચતા વિકરાળ આગને લીધે એક ગાયનું ગુંગળાઇને આગમાં ભુંજાઇ જતા મોત નીપજ્યુ હોવાનું સ્થાનિકોએ જણાવ્યુ હતુ. ફાયર વિભાગના લશ્કરોએ આગ પર પાણીની મારો ચલાવી આગ કાબુમાં લીધી હતી. ડમ્પીંગ સાઇટ પર કચરામાં લાગેલી આગમાંથી ધુમાડો નીકળતા સ્થાનિકોને શ્વાસ લેવામાં તકલીફ પડી હતી.

કચરાના લીધે સ્થાનિકોએ ગંદકીનો સામનો કરવો પડી રહયો છે. ગંદકીને લીધે માંદા પડે તેવી સ્થિતિ સર્જાય છે. જેથી પાલિકા આ કચરો નાંખવા માટે અન્ય વ્યવસ્થિત જગ્યા શોધે ક્યાંતો કચરાની આજુબાજુ પ્રોટેક્શન વોલ બનાવવાની કામગીરી ઝડપી કરે તેવી માંગ સ્થાનિકોમાં ઉઠી હતી.

અસામાજીકો આગ લગાવી શાંતિ ડહોળવાનો પ્રયાસ કરે છેઃ પાલિકા પ્રમુખ
આગ બાબતે પાલિકાના પ્રમુખ જગદીશ મોડીએ જણાવ્યુ હતુ કે, ડમ્પીંગ સાઇટ પર આગ લાગી હતી. અને પવનોને લીધે વધુ ફેલાઇ હતી. જે સાઇટ પર તપાસ કરતા આ આગ અસામાજીક તત્ત્વોએ લગાવી વિજલપોરની શાંતિ ડહોળવાનો અને લોકોને ઉશ્કેરવા માટેના પ્રયાસ કરી રહયા છે.

પાલિકા પ્રમુખમાં કામ કરવાની આવડત નથીઃ વિપક્ષ નેતા
વિપક્ષ નેતા ગંગાધર શુક્લાએ જણાવ્યું હતું કે, ડોલી તળાવ પાસે કચરામાં ઘણી વાર આગ લાગી છે. જે બાબતે અમે પાલિકાને રજુઆતો પણ કરી હતી. પરંતુ પાલિકાના પ્રમુખમાં કામ કરવાની આવડત જ નથી. તેમજ ડમ્પીંગ સાઇટ પર વોચમેન મુકવાની રજુઆત કરી હતી.

4 June 2019

નવસારીમાં સરકારી દવાઓ સગેવગે કરવાનું કૌભાંડ


સરકારી તંત્રમાં ભ્રષ્ટાચાર દરેક જગ્યાએ જોવા મળતો હતો. આરોગ્ય ખાતું બાકાત રહ્યું હતું પણ રુસ્તમવાડી પ્રાથમિક આરોગ્ય કેન્દ્ર (પી.એચ.સી.)માંથી દવાઓ બારોબાર સગેવગે થઇ રહી હોવાનું જણાય રહ્યું છે.

નવસારીમાં જિલ્લા પંચાયત દ્વારા સંચાલિત પ્રાથમિક આરોગ્ય કેન્દ્ર રુસ્તમવાડીમાં સવારે ૧૦ વાગ્યાના સમયે સંદેશનેે માહિતી મળી હતી કે રુસ્તમવાડી પ્રાથમિક આરોગ્ય કેન્દ્ર પરથી દવાનો જથ્થો એક મોટા ખાનગી ટેમ્પોમાં ભરાઇ રહ્યો છે. જે એક્સપાયરી ડેટની હોવાનું તથા એ દવાઓ બેફામ રીતે ખાનગી ટેમ્પોમાં પ્રાથમિક આરોગ્ય કેન્દ્રથી ૩થી ૪ દુકાનો છોડીને ભરાઇ રહ્યો હોવાની જાણ થતા ત્યાં પહોંચીને સંદેશના પ્રતિનિધિ દવા ભરેલા ટેમ્પોનું વીડિયો શૂટિંગ કરી રહ્યા હતા ત્યારે રૂસ્તમવાડી પી.એચ.સી. સેન્ટરમાંથી એક વ્યક્તિએ આવીને આક્રોશ ભર્યા અવાજે કેમ ફોટા પાડી રહ્યા છો એવું જણાવી હાથમાંથી મોબાઇલ છીનવાની કોશિશ કરી હતી. જેથી આ પ્રકરણની આરોગ્ય ખાતાના ઓફિસરને જાણ કરી હતી. તેઓ નમ્રતાથી વાત કરીને વીડિયો અને ફોટો મંગાવ્યા હતા. સંદેશ ઓફિસથી તેઓએ માગેલો તમામ સબૂત પૂરા પાડવામાં આવ્યા હતા.

ત્યાર બાદ તેમણે સંબંધિતોને કારણદર્શક નોટિસ પાઠવી હોવાની માહિતી મળી હતી પણ ત્યાર બાદ કોઇ પરિણામલક્ષી કાર્યવાહી કરવામાં આવી નથી. કસૂરવાર હજી પણ દાદાગીરી થી કામ કરતા રહ્યા છે. દવા એક્સ્પાયરી ડેટની હોય તો આટલી બધી માત્રામાં કેમ હતી? અને તે અંગે સ્પષ્ટતા કરવામાં શું વાંધો હતો? એ પણ સવાલ છે .

આટલા મોટા પ્રમાણમાં દવાઓ કોને પૂછીને ટેમ્પોમાં ભરાઈ?
આ પ્રકરણમાં સરકારી દવાઓ બારોબાર વેચી મારવાનું કૌભાંડ હોવાની વાત પ્રથમ દર્શને દેખાઇ આવે છે. તેના અનેક કારણો છે. તેમાં પ્રથમ તો આ દવા આટલા મોટા પ્રમાણમાં બારોબાર કોને પૂછીને ટેમ્પોમાં ભરી ? પ્રાથમિક આરોગ્ય કેન્દ્રથી બહાર કેમ મોકલવામાં આવી ? દવા જો એક્સ્પાયરી ડેટની હોય તો તેનો નાશ કરવા માટે જિલ્લા પંચાયતમાં આરોગ્ય વિભાગની પરમિશન લીધી હતી કે કેમ ? અને જો લીધી હોય તો તેમને નોટિસ કેમ ફટકારવામાં આવી ? એનો સીધો અર્થ એ થાય છે કે ઉપરી અધિકારીની કોઇ પરવાનગી લેવામાં નથી આવી તે સ્પષ્ટ સાબિત થાય છે. પરવાનગી વગર દવા બહાર જાય તો તેને સીધી ભાષામાં કૌભાંડ કહેવાય. આ બાબતે આરોગ્ય અધિકારી તપાસ કરાવી યોગ્ય પગલાં ભરાવે તે જરૂરી છે.

આ પ્રકરણની મને કંઇ જ ખબર નથી: જિલ્લા આરોગ્ય અધિકારી
આ પ્રકરણ બાબતે ડો. ડી.એચ. ભાવસાર (ડી.એચ.ઓ.) ને મો. નં. ૯૦૯૯૦૮૬૦૦૧ પર સંપર્ક કરીને પૂછતા તેમણે જણાવ્યું હતું કે આ બાબતની મને કંઇજ ખબર નથી. હું રુસ્તમવાડી સેન્ટર પર તપાસ કરીશ. આ બાબતે નોટિસ આપવામાં આવી છે તેની જાણ તમને છે ? આ સવાલ તેમને પૂછતા તેમણે જણાવ્યું હતું કે હું કંઇજ જાણતો નથી. તપાસ કરી યોગ્ય કસૂરવારને યોગ્ય નસહિત આપવાનો પ્રયત્ન ચોક્કસ આરોગ્ય ખાતું કરશે.

દવા આપવામાં કાયમ આનાકાની કેમ?
રૂસ્તમવાડી આરોગ્ય સબ સેન્ટર પર દર્દીઓ સાથે બેહૂદૂં વર્તન થતું હોવાની ઘટના થોડા દિવસ પહેલા બની હતી. દવા આપવામાં કાયમ આનાકાની થતી આવી છે. ત્યારે દવા બારોબાર વેચવાનું કૌભાંડ કરવા માટે આ વર્તન થતું હોય તેવું આમ જનતાનાં મુખે ચર્ચાય રહ્યું છે.

સરકારનો આરોગ્ય તરફેનો અભિગમ હવામાં
નવસારી રુસ્તમવાડી સબસેન્ટરમાં દવાઓ પરવાનગી વગર સગેવગે કરવાનું કહેવાતું કૌભાંડ સરકારનો આરોગ્ય તરફે સ્વચ્છ અભિગમ પર લાંછન સ્વરૂપ દાખલો છે. ગરીબ અને મધ્યમવર્ગનો માણસ આરોગ્ય માટે ચિંતામુક્ત રહે તે માટે કરોડો રૂપિયા ખર્ચે છે. પણ તેમાં દવાનો બારોબાર વેપલો જો થયો હોય તો કસૂરવાર સરકાર અને ગરીબ-મધ્યમવર્ગ સાથે ક્રૂર મશ્કરી કરી રહ્યા છે. તેઓ સામે ડી.એચ.ઓ. યોગ્ય પગલાં ભરશે ખરા?

3 June 2019

નવસારીની 55 શાળામાં આચાર્યની ખાલી જગ્યા ભરાશે


નવસારી જિલ્લાની 55 બિન સરકારી અનુદાનિત હાઈસ્કૂલમાં ખાલી પડેલી આચાર્યની ખાલી પડેલી જગ્યાઓ ઉપર 3થી 7 જૂન દરમિયાન નવસારીની શેઠ પી. એચ. વિદ્યાલય (સંસ્કારભારતી શાળા) ખાતે ઈન્ટરવ્યુ લેવાશે. જેમાં દરેક શાળાને 15 ઉમેદવારોનું લીસ્ટ આપ્યું હોય તે પ્રમાણે ઈન્ટરવ્યું લેવામાં આવશે એમ જિલ્લા શિક્ષણાધિકારીની કચેરીએથી જાણવા મળ્યું છે.

નવસારી જિલ્લામાં 100થી વધુ બિનસરકારી અનુદાનિત હાઈસ્કૂલ આવેલી છે. જેમાં આશરે 55 જેટલી ગ્રાન્ટેડ શાળાઓમાં ઘણા સમયથી આચાર્યની મહત્ત્વની જગ્યા ખાલી રહેતી હોય ઇનચાર્જ આચાર્યની નિમણૂંક કરીને સંચાલકો ગાડું ગબડાવતા હોય છે. જેને પગલે ઇનચાર્જ આચાર્યને કારણે શાળાનાં શૈક્ષણિક અને વહીવટી કાર્યમાં અસર થતી હોય છે.

જેથી સરકારના શિક્ષણ વિભાગ દ્વારા દરેક જિલ્લામાં આચાર્યની ભરતી માટેની કાર્યવાહી હાથ ધરાઈ છે. નવસારી જિલ્લામાં 55 જેટલી ગ્રાન્ટેડ શાળાઓમાં આચાર્યની જગ્યા ખાલી હોય 3થી 7 જૂન દરમિયાન નવસારીની શેઠ પી.એચ.વિદ્યાલય (સંસ્કાર ભારતી શાળા) ખાતે ઈન્ટરવ્યું લેવાની કાર્યવાહી હાથ ધરાશે. જેમાં સવારે 9 વાગ્યાથી 6 વાગ્યા સુધી પેનલ 1 અને 2 દ્વારા 12 શાળાના આચાર્ય માટે ઈન્ટરવ્યું લેવાશે અને ત્યારબાદ એક દિવસનો સમય પણ આપવામાં આવશે. આચાર્યની ખાલી જગ્યા માટે દરેક શાળામાં 15 ઉમેદવારનું લિસ્ટ શાળામાં આપી દેવાયું છે.

પસંદગી સમિતિના સભ્યો નક્કી કરશે : આચાર્યના ઈન્ટરવ્યું માટે ચેરમેનપદે જિલ્લા શિક્ષણાધિકારી, સભ્ય તરીકે તાલુકા બહારનાં કેળવણીકાર, શાળા સંચાલક મંડળનાં બે પ્રતિનિધિ, સભ્ય સચિવ તરીકે, શિક્ષણ સેવા વર્ગ -2ના જિલ્લાનાં અધિકારીની પસંદગી સમિતિ રહેશે અને દરેક સભ્યને 40 ગુણ ફાળવવામાં આવશે.

આચાર્યની જગ્યા માટે શૈક્ષણિક લાયકાત આ હોવી જરૂરી છે : આચાર્યની જગ્યા માટે શૈક્ષણિક લાયકાત માટે 60 ટકા TATની પરીક્ષાના ગુણ, ગ્રેજ્યુએટ ડિગ્રીના 7, પોસ્ટ ગ્રેજ્યુએટ ડિગ્રીના 9, ગ્રેજ્યુએટ ડિગ્રી પ્રોફેશનલ કોર્સના 7, પોસ્ટ ગ્રેજ્યુએટ ડિગ્રી પ્રોફેશનલ કોર્સના 10 અને અનુભવ વધુમાં વધુ 10 વર્ષ (દર વરસે ૦.7) મળી કુલ 40 ગુણ મળી 100 ગુણમાંથી જે ઉમેદવારના વધુ ગુણ હશે તેની આચાર્યની જગ્યા માટે પસંદગી કરાશે.

કલાકારે વડાપ્રધાનનું પોર્ટ્રેઇટ ચાના ઉપયોગથી બનાવ્યું


વિજલપોરના સરસ્વતિનગર ખાતે રહેતા વડાપ્રધાન નરેન્દ્ર મોદીના પ્રશંસક અને આર્ટીસ્ટ એ વડાપ્રધાનનાં વિજયની યાદગીરીરૂપે ચાવાળા વડાપ્રધાનનાં ઉપનામથી જાણીતા નરેન્દ્ર મોદીના પોટ્રેઈટ (વ્યક્તિ ચિત્ર) માત્ર કાળી-દુધવાળી ચાના ઉપયોગથી બનાવ્યું હતું.

વિજલપોરના સરસ્વતિનગર ખાતે રહેતા આર્ટીસ્ટ અને વેબસાઈટ ડિઝાઈનર જીતુભાઈ જાધવ વડાપ્રધાન નરેન્દ્ર મોદીના પ્રશંસક છે. વર્ષ 2019ની લોકસભા ચૂંટણીમાં પ્રચંડ બહુમત સાથે વિજયી બનેલા વડાપ્રધાન નરેન્દ્ર મોદીને શુભેચ્છા આપવાના હેતુથી વિજલપોરના જાણીતા ચિત્રકાર જીતુ જાધવ દ્વારા ફક્ત ચાના ઉપયોગથી વડાપ્રધાન નરેન્દ્ર મોદીનું પેઇન્ટિંગ બનાવ્યું છે. તેમણે આ પેઈન્ટીંગ 22 ઇંચ પહોળું અને 26 ઇંચ લાંબુ બનાવ્યું છે. આ પેઇન્ટિંગ બનાવવામાં કોઈપણ કૃત્રિમ રંગનો ઉપયોગ તેમણે કર્યો નથી. તેમણે ફક્ત ચાનો ઉપયોગ કરીને માત્ર 5-6 કલાકમાં નરેન્દ્ર મોદીનું પેઇન્ટિંગ બનાવ્યું છે.

આ ચિત્રમાં તેમણે દૂધવાળી અને દૂધ વિનાની કાળી ચા એમ બે પ્રકારની ચાનો જ ઉપયોગ કર્યો છે. જીતુભાઈએ જણાવ્યું કે ચામાંથી પેઇન્ટિંગ બનાવવાનું કારણ ફક્ત એટલું જ કે કિશોર અવસ્થામાં નરેન્દ્રભાઈ મોદીએ પણ ચાનો વ્યવસાય કર્યો હતો. સર્વસામાન્ય માણસની ચાને વડાપ્રધાને એક અનોખી ઓળખ આપી છે અને વડાપ્રધાનના નામ સાથે ચા નો ઉલ્લેખ થવો જ જોઈએ તેને લઇને આ ચિત્ર બનાવ્યું હોવાનું તેમણે જણાવ્યું હતું. જીતુભાઈના ઘરે આ ચિત્રને જોવા લોકો જઈ રહ્યા છે.

5થી 6વાર બ્રશ વડે અંકિત કરવું પડ્યું : ચા વેચનારા તરીકે વડાપ્રધાન નરેન્દ્ર મોદીને યાદ કરાતા હોય છે. જેથી તેઓ બીજી વાર વડાપ્રધાન બનતા તેમને શુભેચ્છા આપવા માટે કલર નહીં પણ ચા જેમાં દૂધવાળી અને સાદી ચા (બ્લેક ટી)ના કલર વડે તેમનું પોટ્રેઈટ બનાવ્યું છે. આ કલરથી ચિત્ર ઝાંખુ રહે છે તે માટે 5થી 6વાર બ્રશ વડે આ ચિત્ર અંકિત કરવું પડ્યું છે. આ ચિત્રને હું વડાપ્રધાનને આપવા માંગુ છું અને તે માટે પ્રયત્નો શરુ કર્યા છે. - જીતું જાધવ, આર્ટીસ્ટ, વિજલપોર

1 June 2019

9 જર્જરિત બિલ્ડિંગ ભયજનક, 5 વર્ષથી પાલિકાની માત્ર નોટિસ


નવસારી શહેરમાં સાધારણ જર્જરિત તો એક બિલ્ડિંગ છે પરંતુ 'વધુ જર્જરિત' હોય તેવી પણ 9 જેટલી બિલ્ડિંગો ઉભી છે. આ બિલ્ડિંગોને નોટીસ તો અપાય છે પરંતુ ભયમુક્ત કરવા ઉતારી પાડવામાં યા શક્ય હોય તો મરામત કરાવવામાં પાલિકા સફળ થઈ નથી અને સામા ચોમાસાએ આ બિલ્ડિંગોમાં હોનારત સર્જાય તેવી શક્યતા છે.

નવસારી શહેરમાં કેટલીક બિલ્ડિંગો વધુ જર્જરિત છે. કેટલીક આવી બિલ્ડિંગોને ઉતારી પાડવામાં પાલિકા સફળ થઈ છે પરંતુ હજુ અંદાજે 9 જેટલી બિલ્ડિંગો ઉતારી શકાઈ નથી યા ભયમુક્ત કરી શકાઈ નથી. આવી બિલ્ડિંગોને નવસારી પાલિકા દર વરસે ભયમુક્ત કરવા નોટીસ તો આપે છે પરંતુ તેનાથી આગળ પગલાં લેવામાં સફળ થઈ નથી. આમાંની મહત્તમ બિલ્ડિંગો 50 વર્ષ યા એક બે તો 75 વર્ષથી વધુ જૂની છે. આવી જ એક વધુ જર્જરિત બિલ્ડિંગ ટાપરવાડના મુસ્લિમ પરિવારની હતી, જેનો કેટલોક ભાગ 10-15 દિવસ અગાઉ જ ધરાશાયી થયો હતો પરંતુ કોઈ હાનિ થઈ ન હતી. આ બિલ્ડિંગ જોકે હવે ધ્વંસ્ત કરાયું છે.

મહત્તમમાં મકાનમાલિક-કબજેદારની તકરાર : જે વધુ જર્જરિત બિલ્ડિંગો છે. તેમાં મહત્તમમાં ભાડુઆતો રહે છે. આ બિલ્ડિંગોના કબજા, ભાડા તથા અન્ય બાબતોએ મકાનમાલિક સાથે 'તકરાર' ચાલે છે. આ તકરારને લઈ મકાનમાલિક યા કબજેદાર (ભાડુઆત) સમયાંતરે બિલ્ડિંગને રીપેરિંગ ન કરતા ભયમુક્ત કરી શકાઈ નથી.

પાંચ ભયમુક્ત કરાઈ : નવસારી પાલિકાએ છેલ્લા એક-દોઢ વર્ષમાં પાંચેક વધુ જર્જરિત બિલ્ડિંગ સમજાવટથી ભયમુક્ત કરી હોવાનું જાણવા મળી છે, જેમાં મદ્રેસા સ્કૂલની સામે, જલાલપોર વિસ્તારમાં સ્ટર્લિંગ અને એક રાજપૂત મહોલ્લા નજીક, તરોટા વિસ્તારમાં રાણા પરિવારની અને ટાપરવાડની બિલ્ડિંગનો સમાવેશ થાય છે.

સીધી વાત - દશરથસિંહ ગોહિલ, , સીઓ, નવસારી પાલિકા
સ. : વધુ જર્જરિત મિલકતો સામે નોટીસથી આગળ શું કાર્યવાહી ?
જ. : વધુ જર્જરિત બિલ્ડિંગ ઉતારી પણ શકાય છે.
સ. : શહેરમાં બિલ્ડિંગો ઉતારી છે ખરી ?
જ. : ત્રણેક બિલ્ડિંગો થોડા જ સમયમાં ઉતારવામાં સફળતા મળી છે.
સ. : હજુ 9 જેટલી આવી બિલ્ડિંગો છે તેનું કરાશે ?
જ. : કોર્ટ મેટર છે, તેમાં મુશ્કેલી છે. અન્યને 'ભયમુક્ત' કરાવી શકાય છે.
સ. : શું પગલાં લઈ શકાય ?
જ. : પ્રથમ નોટીસ, ત્યારબાદ જાહેર નોટીસ અને બાદમાં પોલીસની મદદ લઈ શકાય છે, જે કરાશે.
સ. : જો રહેનાર જ બિલ્ડિંગ છોડવા તૈયાર ન હોય તો ?
જ. : તો પણ બિલ્ડિંગો 'ભયમુક્ત' કરવી જ પડે, કારણ કે માણસની જિંદગીથી વધુ કંઈ નથી.

જર્જરિત બિલ્ડિંગો
  • બોદાલીયા (ચારપુલ) 50 વર્ષ જૂનુ, 5 વર્ષથી નોટિસ 
  • ગાંધી બિલ્ડિંગ (જલાલપોર) 50 વર્ષ જૂનુ, 3 વર્ષથી નોટિસ 
  • રાણા બિલ્ડિંગ 30 વર્ષ જૂનું, 4 વર્ષથી નોટિસ 
  • જીતુ નિવાસ (જલાલપોર) 30 વર્ષ જૂનું, 2 વર્ષથી નોટિસ 
  • કાપડીયા ચાલ (ગોલવાડ) 50 વર્ષ, 5 વર્ષથી નોટિસ 
  • નગીન જીવણ ચાલ (સ્ટેશન)50 વર્ષ જૂનું, 5 વર્ષથી નોટિસ 
  • ફનીબંદા બિલ્ડિંગ, 50 વર્ષ, 3 વર્ષથી નોટિસ 
  • છીબુ મેન્શન (ગોલવાડ) 50 વર્ષ જૂનું, 5 વર્ષથી નોટિસ 
  • બોદાલીયા (ડેપો) 50 વર્ષથી વધુ જૂનું, 3 વર્ષથી નોટિસ 

31 May 2019

તીઘરામાં સરકારી આવાસ જમીનદોસ્ત થવાના આરે


નવસારી શહેરને અડીને આવેલા તીઘરા ગામમાં સરકારી આવાસની સ્થિતિ બદતર બની ગઈ છે. વર્ષો પહેલા બનાવાયેલા સરકારી આવાસો 'પડુ પડુ'ની સ્થિતિમાં છે. તેમાંય 15 મકાનોની સ્થિતિ અતિભયંકર થઈ ચૂકી છે. જિલ્લામાં આવા 500થી વધુ સરકારી આવાસો છે ત્યારે સરકાર દ્વારા આવા આવાસમાં રહેતા લોકો માટે નવા આવાસ ફાળવી આપશે કે કેમ ? તેવો સવાલ ઉભો થયો છે. હાલ તીઘરા ગામના લોકોએ પરિસ્થિતિને ધ્યાનમાં રાખી સરકાર દ્વારા ચોમાસુ પહેલા કાર્યવાહી કરી તેમના માટે આવાસો બનાવી આપવામાં આવે કે રિપેરિંગ હાથ ધરાય તેવી માગ ઉઠી છે. જર્જરિત થયેલા મકાનોમાં રહેતા લોકો માટે જીવનું જોખમ ઉભુ થયું છે.

નવસારી જિલ્લામાં સરકારી આવાસોના રિપેરિંગ કામ માટે જરૂરી કાર્યવાહી કરવામાં વિલંબ થઈ રહ્યો છે. છેલ્લા ઘણાં લાંબા સમયથી નવસારી જિલ્લામાં સરકારી આવાસો બનાવવાના નામે વાયદાઓ થઈ રહ્યા છે પરંતુ તે અંગે ચોક્કસ કામગીરીનો અભાવ વર્તાય રહ્યો છે. તેનું ઉત્તમ ઉદાહરણ નવસારી શહેરને અડીને આવેલુ તીઘરા ગામ છે. તીઘરા ગામમાં 100થી વધુ હળપતિ-આદિવાસી લોકોના ઘર આવેલા છે. જે પૈકી 15થી વધુ આવાસો જર્જરિત હાલતમાં છે. જો આવાસોની કામગીરી હાથ નહીં ધરાય તો આગામી ચોમાસુ દરમિયાન હોનારત થવાની શક્યતા છે.

તીઘરાવાસીઓએ લેખિત રજૂઆત કરી નવા આવાસ આપવા અનુરોધ
તીઘરામાં આગામી ચોમાસા દરમિયાન કોઈ આવાસ જમીનદોસ્ત થાય તેવી સ્થિતિને પગલે લોકો ઘરમાં રહેતા પણ ડરી રહ્યા છે અને તેથી જ તાત્કાલિક ધોરણે આવાસ બનાવી આપવા જિલ્લા કલેકટરને લેખિત રજૂઆત કરી ઘટતું કરવા અનુરોધ કર્યો છે.

40 ટકાથી વધુ આવાસો જર્જરિત બન્યા છે
નવસારી તાલુકામાં 61થી વધુ ગામો આવેલા છે. જેમાં વર્ષ 2009 પહેલા સરકારની યોજના હેઠળ આવાસો બનાવ્યા છે અને જેમાં 40 ટકાથી વધુ આવાસો યોગ્ય રિપેરીંગના અભાવે જર્જરિત બન્યા છે. જેમાં નવસારીના ચોવીસી ગામમાં આવેલા 5 જેટલા વિસ્તારોમાં 200થી વધુ ઘરો જર્જરિત અવસ્થામાં છે. ગમે ત્યારે તૂટી પડશે તેવી સંભાવના અને ડર લોકોને સતાવી રહ્યો છે.

આવાસ માટે ફોર્મ ભર્યા પણ મંજૂરી મળતી નથી
હું પણ મારા પિતાનાં નામે આવેલ આવાસમાં જ રહું છું અને આવાસ રીપેરીંગ કરાવતો રહું છું. તલાટી સાથે આખા ગામમાં ફરીને સર્વે કરીને પ્રધાનમંત્રી આવાસ માટે 63 જેટલા ફોર્મ ભર્યા છે. અગાઉ પણ સરદાર આવાસ, હળપતિ ગૃહ નિર્માણ બોર્ડમાં આવાસ માટે ફોર્મ ભરી અરજી કરી પણ ઉપરથી જવાબ મળતો નથી. યોગ્ય સ્તરે રજૂઆત કરી છે. નાણાપંચની ગ્રાન્ટમાંથી આવાસનું કામ ન થતા લોકોનાં આવાસના કામો અટવાયેલા છે. - ઉમેશ રાઠોડ, સરપંચ, તીઘરા

માહિતી તલાટી પાસે માંગી છે..
નવસારી તાલુકામાં જર્જરિત મકાનો કેટલા છે તેની માહિતી માટે તલાટી પાસે માંગી છે. મારા અંદાજ મુજબ 200થી વધુ જર્જરિત આવાસની સંખ્યા હોવાની સંભાવના છે. - કમલેશભાઈ, ઓએસ, નવસારી તા.પં.

30 May 2019

દુકાનમાંથી નજર ચૂકવી બે ઈસમે 25 હજાર તફડાવ્યા


નવસારીના ટાવર પાસે આવેલા વાસણના વેપારીને ત્યાં 2000ના છુટા લેવાને બહાને આવેલા બે તસ્કરોએ ધ્યાન ચૂકવીને દુકાનનાં ગલ્લામાં મુકેલ રૂ. 25 હજાર રોકડા લઇને ફોરવ્હીલમાં ભાગી ગયા હતા. ભરબપોરે બનેલી આ ઘટનામાં પોલીસનો પણ આ તસ્કરોને ડર ન રહ્યો હોવાનું લાગી રહ્યું છે. જો કે આ ઘટનાં સીસીટીવીમાં કેદ થઇ ગઈ હતી.

ટાવર પાસે હીરાલાલ શાહની ઓશીયાજી વાસણ ભંડાર નામની દુકાન આવેલી છે. જેમાં સ્ટીલના વાસણોનું વેચાણ કરે છે. બુધવારે બપોરના 2.45 વાગ્યાનાં સુમારે દુકાનેઅજાણ્યો ઇસમ રૂ. 2000ની નોટના છુટા લેવા આવ્યો હતો. હીરાલાલભાઈએ છુટા આપ્યા હતા, ત્યારબાદ અજાણ્યા ઈસમોએ 4 પવાલી માંગી હતી પરંતુ હીરાલાલભાઈ પાસે સ્ટોકમાં 1 જ હોય બીજી પવાલી લેવા ગયા હતા.

તેમની પત્ની હોય પીવા માટે પાણી માંગ્યું હતું પણ તેઓએ સાદું પાણી માંગતા તેમની પત્ની સાદું પાણી લેવા જતા તકનો લાભ લઈ બંને અજાણ્યાએ દુકાનના ગલ્લામાં મુકેલા રોકડા 25 હજાર લઈને ભાગી ગયા હતા. હીરાલાલની પત્ની મંજુષાબેને બુમાબુમ કરી હતી. લોકો તેમનો પીછો કરે એ પહેલા બંને ઈસમો થોડે દૂર રાખેલી કાર લઈ જૂનાથાણા તરફ ભાગી છૂટ્યા હતા. આ ઘટનાની ફરિયાદ નવસારી શહેર પોલીસમાં નોંધાઈ હતી.

પવાલી અને પાણી માગતા અમે અંદર ગયા
મારી પાસે બે યુવાનો જેમાં એકે બ્લેક કલર નો શર્ટ અને 40 વર્ષ ની ઉમરનો અને બીજો યુવાન 35 થી 40 વયનો અને હાથમાં કાળી બેગ, માથે ટોપી સફેદ શર્ટ અને સફેદ પેન્ટ પહેરેલો હતો. તેઓએ પહેલા પવાલી માંગી અને ત્યારબાદ મારી પત્ની પાસે સાદું પીવાનું પાણી માંગ્યું અને નજર ચૂકવીને મારા ધંધાનાં 25 હજાર રોકડા ચોરી કરી ભાગી ગયા હતા. - હીરાલાલ શાહ, ભોગ બનનાર

29 May 2019

નવસારી ડેપોમાં ડ્રાઇવર વિનાની બસે રગડીને રિક્ષાને કચડી


નવસારી એસટી ડેપો ઉપર બપોરે 2.30 વાગ્યાનાં સુમારે અચાનક ડેપોમાંથી બસ આગળ ધસીને ડેપો બહાર ઉભેલી રિક્ષામાં ભટકાઈ હતી. સદનસીબે આ ઘટનામાં બે વ્યક્તિના જીવ બચી ગયા હતા. જયારે રિક્ષાને ઘણું નુકસાન થયું હતું. ઉપરાંત ફળ વેચતી મહિલાનો પણ ચમત્કારિક બચાવ થયો હતો.

નવસારી ડેપોમાં અવારનવાર અકસ્માતની ઘટનાને પગલે પ્રકાશમાં આવતું રહ્યું છે. અગાઉ નવસારી એસટી ડેપોમાં 3 મુસાફરોને બસચાલકે પુરપાટ ઝડપે બસ હંકારી અડફેટે લઇને મોત નિપજાવ્યા હતા. આ ઘટનાને હજી 5 માસ થયા જેટલો જ સમય થયો છે ત્યાં જ આવી મોટી ઘટના બનતા સદનસીબે રહી ગઈ હતી. સ્થળ ઉપરથી મળતી માહિતી મુજબ નવસારી ડેપોની દાંડીની બસ (નં. GJ-18-Y-8022) નવસારી ડેપો પર પહોંચી હતી. બપોરે 2.35 વાગ્યાનાં સુમારે પ્લેટફોર્મનંબર 9 પરથી પુનઃ કૃષ્ણપુર જવા રવાના થવાની હતી. ચાલક ઉપેન્દ્ર બારોટે બસને પ્લેટફોર્મ ઉપર મૂકીને કંડકટર સાથે ફ્રેશ થવા નીકળ્યા હતા અને ગણતરીની મિનિટમાં બસ આગળ વધવા લાગી હતી અને તે 50 મિટર આગળ વધીને ડેપો બહાર રિક્ષામાં ભટકાઈ ગઈ હતી. બસમાં ચાલક ન હોવાથી સૌ અવાક રહી ગયા હતા. ચાલકે બસ કેવી રીતે મૂકી કે તે આગળ વધી જઈને ઉભેલી રિક્ષામાં ભટકાઈ ગઈ. જોકે રિક્ષામા વચ્ચે ન આવી હોત તો બસ એ કેટલાનો ભોગ લીધો હોત.

ઢોળાવ હોય વાહન આગળ ધસી જાય છે
દિવ્ય ભાસ્કરની ટીમે નવસારી ડેપો પર થયેલા અકસ્માત અંગે રીયાલિટી ચેક કરી હતી. જેમાં નવસારી ડેપો ઢાળવાળો હોય ડેપો પર મુકેલું વાહન આગળના ભાગે ધસી જાય છે. નવસારી ડેપોમાં દાંડીથી આવેલી બસના ચાલકે પણ ડેપો પર બસ રિવર્સ ગિયરમાં મુકી હતી, પરંતુ તે યોગ્ય રીતે કામ ન કરતા બસ ગણતરીની મિનિટોમાં જ આગળ ધપી ગઈ હતી અને અકસ્માતની ઘટના સર્જાઈ હતી. દિવ્ય ભાસ્કરે પણ વાહન મુકી હકીકત જાણવાનો પ્રયાસ કરતા ઢાળ હોવાના કારણે આવી સ્થિતિનું નિર્માણ થયું હતું.

ગાડી ગિયરમાંથી નીકળી જતા આગળ ધપી
ડેપો પર દાંડીથી આવીને કૃષ્ણપુર જવાના હોય ગાડી રિવર્સ કરીને ગિયરમાં મુકી હતી પરંતુ સંજોગોવશાત ગાડી ગિયરમાંથી નીકળી જતા આગળ ધપી ગઈ હતી અને અકસ્માત સર્જાયો હતો. - ઉપેન્દ્ર બારોટ, બસચાલક

દીવાલ અડી બેસતાં બચી
દિવાલની બાજુમાં બેસી હતી અને બસ આવી ટોપલાને કચડી રિક્ષામાં અથડાઈ. હું દિવાલને અડીને બેસી હતી એટલે બચી. - ફર્સ્ટ પર્સન બાલુબેન દેવીપુજક

ભૂલથી તેમને ગાડી ગિયરમાં મુકી હોય એવું લાગ્યું
ચાલકનું કહેવું છે કે ગાડી રિવર્સ ગિયરમાં હતી પરંતુ ગાડી રિવર્સ ગિયરમાં હોત તો આગળ વધે નહીં. ભૂલથી એમને એવું લાગ્યું અને ઘટના બની હોવાનું અનુમાન છે. તપાસ ચાલી રહી છે. - ધીરૂભાઈ, ઈનચાર્જ મેનેજર, નવસારી ડેપો

નમાજ પઢવા ગયો ને બચ્યો
બપોરે હું નમાઝ પઢવા ગયો ત્યારે અચાનક બસ આવી મારી રિક્ષા સાથે અથડાતા પલટી મારી હતી. અલ્લાહે મારો જીવ બચાવી લીધો. - અલ્તમસ શેખ, રિક્ષાચાલક

28 May 2019

નવસારીમાં મોટી આગ લાગે તો પ્રજા ભગવાન ભરોસે


નવસારી નગરપાલિકા ફાયર સેફટીને અનુલક્ષીને નોટિસનાં નાટકનો દોર ચાલુ કર્યો છે. પણ પોતાના કેટલાક એકમોમાં ફાયર સેફટીનાં નામે શૂન્ય છે. તેમજ ફાયર સ્ટેશનમાં તાલીમ બધ્ધ કર્મચારીની ઉણપ તેમજ સંચાલન કરવા માટે સુપ્રિટેન્ડન્ટની જગ્યા વર્ષોથી ખાલી છે? નવસારીમાં મોટી આગ લાગે તો પ્રજાએ ભગવાન ભરોસે રહેવું પડશે..

નવસારીમાં છેલ્લા બે દિવસથી ફાયર સેફટી લઇ સફાળા જાગેલા તંત્ર નોટિસનો દોર ચાલુ કર્યો છે. પરંતુ પાલિકા દ્વારા સંચાલિત ફાયર સ્ટેશનમાં છેલ્લા ઘણા સમયથી ફાયર સુપ્રિટેન્ડન્ટની જગ્યા ખાલી છે. ત્યારે ફાયરનું લાઇસન્સ કોણ આપશે ? એ સવાલ છે.પાલિકા કેટલી જાગૃત છે તેનો નમુનો પ્રજા સમક્ષ છતો થયો છે.

સુરતમાં ટયુશન કલાસમાં આગમાં ૨૨ વિદ્યાર્થીઓ હોમાતા રાજયભરમાં ફાયર સેફટી કેટલી જરુરી તેનો અહેસાસ આમ પ્રજાને થયો છે. નવસારી પાલિકાએ શહેરી વિસ્તારમાં આવતા હોટલ ટયૂશન કલાસીસ તેમજ ઉચી ઇમારતોને નોટિસ આપી છે. પણ આવી અનેક નાટિસો પહેલા પણ અપાય છે. પણ તેનો અમલ થતો નથી નોટીસ આ.હવે ફરી નોટિસના નાટકમાં આવનારાઓને ફાયર સેફટી.નું લાઇસન્સ આપનાર ફાયર સુપ્રિટેન્ડન્ટની જગ્યા જ ખાલી છે.

હાલ નગરપાલિકા એક હંગામી ફાયરમેનને જ આ મોટા પદનો હંગામી કાર્યભાર સોપીને ફાયર સ્ટેશનનો વહીવટ ચલાવે છે અને વધુ આઘાતજનક તો એ છે કે હાલ પાલિકાનાં અગ્નીશામક દળનાં ફરજ બજાવતાં એક પણ કર્મચારી યોગ્ય તાલીમ મળી હોય તેવો કવોલીફાઇડ નથી. કોઇ પણ કર્મચારી સરકારી તાલીમ લઇને કામ કરતો નથી ત્યારે નવસારીમાં મોટી આગ લાગે તો તેના માટે જવાબદાર કોણ ? આ પ્રશ્ન અંત્યત વિકટ બને છે.

પાલિકાની બેદરકારી છાપરે ચઢીને પોકારી રહી છે.પાલિકા જો ખરેખર કામ કરવા માંગતી હોય તો તેઓ દ્વારા સંચાલિત વિવિધ એકમો અને સંસ્થામાં જ ડોકયુ કરે તો ત્યાં પણ ફાયર સેફટીની ઉણપ જોવા મળશે. જેવી કે પાલિકાનાં રંગવિહાર ઓડીટોરીયમની છે. આમ પોતાની જ સંસ્થાઓ ઇમારતોમાં ફાયર સેફટી પ્રત્યે બેદરકાર પાલિકા ખાનગી સંસ્થાઓ પાસે ફાયર સેફટી અંગે નોટીસ આપે એથી મોટી વિટંબણા કઈ હોય શકે?.

રહેણાંક વિસ્તારમાં એપાર્ટમેન્ટસમાં હોટલો
નવસારી નજીક આવેલું ચોવીસી ગામમાં રહેણાંક વિસ્તારના એપાર્ટમેન્ટમાં હોટલો ચાલે છે. તેના ગેસ સિલીન્ડરો રહેવાસીઓ માટે જીવતા બોમ્બ સાબિત થઈ શકે છે.. અનેક વખત ફરિયાદ કરવા છતાં પ્રશાસન રહેવાસીઓની વહારે નથી આવતું. તેમાં મૂળ તો ભ્રષ્ટાચાર છે. ફાયર સેફટીનું લાઇસન્સ વગર તપાસે થોડા નાણાકીય વ્યવહાર કરતા મળી જતું હોવાનું જણાવાય છે. શ્રાીજી રેસીડેન્સીમાં રહેતા ૧૪ જેટલા કુટુંબોનાં જીવતા બોંબ પર રહેતા હોવાનો અહેસાસ પ્રશાસન કરાવી રહ્યું છે.