19 May 2017

નવસારીમાં 40 % લારી નોંધણી વિનાની


નવસારી શહેરના વેપાર-ધંધામાં લારીગલ્લાઓનો મોટો હિસ્સો છે ત્યારે લારીગલ્લાઓ માટેની કોઈ આયોજનબદ્ધ નીતિ પાલિકા પાસે હોવાની જાણકારી મળી છે.

મોટાભાગના શહેરોમાં લારીગલ્લાઓનું અસ્તિત્વ હોય છે. નવસારી શહેર પણ તેમાંથી બાકાત નથી. લગભગ આખા નવસારી શહેરમાં લારીગલ્લાઓ ઉભા રહેતા જોવા મળે છે. લારીગલ્લાના વેપારનો નવસારી શહેરના અર્થતંત્રમાં એક હિસ્સો પણ છે. હજારો લોકો રોજબરોજ લારીગલ્લા સાથે સંકળાયેલા હોય છે. આમ શહેરમાં લારીગલ્લાનું ખાસ મહત્ત્વ હોવા છતાં નવસારી પાલિકા તેમના માટે આયોજનબદ્ધ નીતિ બનાવી શકી નથી !

મળતી માહિતી મુજબ નવસારી શહેરમાં અંદાજે 750 જેટલા લારીગલ્લાઓ છે. જેમાંથી 400 જેટલા લારીગલ્લાઓને પાલિકાએ નોંધણી નંબર આપ્યા છે. 40 ટકા લારીગલ્લા નોંધણી વિનાના છે. નોંધણી અને નોંધણી વિનાના બે રીતના લારીગલ્લા હોવાથી ભાડુ વસૂલીને એકસરખી નીતિ પણ નથી. નોંધણીવાળા પાસે મહિને તથા નોંધણી વિનાના પાસે દરરોજ ભાડુ વસુલી થાય છે. નોંધણી વિનાના તમામ પાસે ભાડુ વસૂલાય કે કેમ તે પણ એક પ્રશ્ન છે. મળતી માહિતી મુજબ સને 2011માં લારીગલ્લાઓને નોંધણી નંબર અપાયા હતા, ત્યારબાદ અપાયા નથી.

લારીગલ્લા માટે શહેરમાં નિર્ધારિત જગ્યા માટેની પણ ચોક્કસ નીતિ નથી. આમ તો લુન્સીકૂઈ, ફુવારા, સ્ટેશન જેવા વિસ્તારમાં લારીગલ્લાઓની મોટી સંખ્યા છે, સાથોસાથ લગભગ આખા શહેરમાં એકલદોકલ (ઘણી જગ્યાએ પાર્કિંગને અડચણરૂપ) લારીઓ પણ ઠેર ઠેર જોવા મળે છે. અનુસંધાનપાના નં. 2

17 વર્ષથી ભાડા વધારાયા નથી 
નવસારી શહેરમાં જે લારીઓ ઉભી રહે છે તેમની પાસે પાલિકા ભાડુ વસૂલે છે. જેમાં શાકભાજી લારીઓ પાસે રૂ. 10, ખાદ્યચીજોની લારી પાસે રૂ. 15 અને ટોપલાવાળા પાસે રૂ. 2 દૈનિક વસૂલે છે. નોંધનીય બાબત છે કે દૈનિક ભાડાના દર બે-ચાર વર્ષ અગાઉ નહીં પરંતુ આજથી 17 વર્ષ અગાઉ 2000ની સાલમાં નિર્ધારિત કરાયા હતા. બીજા શબ્દોમાં કહીએ તો 17 વર્ષથી ભાડા વધારાયા નથી. શાસકીય પાંખો બદલાતી રહી પરંતુ તેઓએ બાબત પ્રત્યે ધ્યાન આપ્યું નથી યા દુર્લક્ષ સેવ્યું છે.