2 August 2018

નવસારી સિંધીકેમ્પ વિસ્તારમાં આવેલી સ્નેહસાગર સોસાયટીમાં સમી સાંજે ચોરી


નવસારીમાં સિંધીકેમ્પ વિસ્તારમાં આવેલી સ્નેહસાગર સોસાયટીમાં રહેતા એડવોકેટના બંધ મકાનમાંથી તસ્કરો રૂ. 2.08 લાખની મત્તાની ચોરી કરી ફરાર થઈ ગયા હતા. એડવોકેટ બજારમાં કામ અર્થે નીકળતા જ તસ્કરોએ લાભ ઉઠાવ્યો હતો. તસ્કરો ઘરના પાછલા દરવાજેથી પ્રવેશી 45 મિનિટમાં ચોરીને અંજામ આપ્યો હતો. આ ઘટના અંગે નવસારી ટાઉન પોલીસ મથકમાં ફરિયાદ નોંધાતા પોલીસે આગળની વધુ તપાસ શરૂ કરી છે. નવસારીટાઉન વિસ્તારમાં છેલ્લાં કેટલાંક સમયથી ચોરીના બનાવો વધી રહ્યા છે. ત્યારે પોલીસની કામગીરી સામે પણ સવાલ ઉભા થયા છે.

ઘરમાંથી રોકડા રૂ. 48 હજાર અને સોના-ચાંદીના દાગીના ચોરાયા

નવસારીમાં પારસી હોસ્પિટલના પાછળના ભાગે સિંધીકેમ્પ વિસ્તારમાં આવેલી સ્નેહસાગર સોસાયટીમાં રહેતા જાણીતા એડવોકેટ અને નવસારી એડવોકેટ એસોસિએશનના માજી પ્રમુખ હરેશભાઈ વશી તેમના પરિવાર સાથે રહે છે. તેઓ 31મી જુલાઈએ કોર્ટમાંથી ઘરે પહોંચ્યા હતા. એ પછી સાંજે 6.30થી કામ અર્થે બજાર ગયા હતા. એ‌ વખતે તેઓ ઘરને તાળુ મારીને બહાર ગયા હતા. જ્યારે તેઓ પરિવાર સાથે પરત ફર્યા ત્યારે તેમના ઘરના પાછળના દરવાજાનું લોક તૂટેલુ જોવા મળ્યું હતું અને ઘરમાં મુકેલા બે કબાટનો સરસામાન રફેદફે જણાયો હતો.

આ ઘટના અંગે તેમણે તાત્કાલિક નવસારી ટાઉન પોલીસને જાણ કરી હતી. નવસારી ટાઉન પોલીસે ઘટનાસ્થળે ધસી જઈ ડોગ સ્કવોર્ડ અને ફિંગરપ્રિન્ટ તજજ્ઞ, એફએસએલની મદદથી તપાસ શરૂ કરી હતી. તસ્કરોએ મંગળવારે સાંજના સમયે ઘરના પાછળના દરવાજાનો મારેલો નકૂચો તોડી નાંખ્યો હતો અને પાછળથી ઘરમાં પ્રવેશ્યા હતા. ઘરમાં કબાટમાં મૂકેલા સોના-ચાંદીના દાગીના સહિત તસ્કરો રૂ. 2.08 લાખની મત્તાની ચોરી કરી ફરાર થઈ ગયા હતા. આ ઘટના અંગે પોલીસે વધુ તપાસ હાથ ધરી છે. નવસારીમાં છેલ્લાં કેટલાંક સમયથી ચોરીનું પ્રમાણ વધ્યું છે.

તસ્કરો શું શું ચોરી ગયા

એડવોકેટ હરેશ વશીના મકાનમાંથી તસ્કરો બેડરૂમમાં મુકેલા બે કબાટમાંથી 8 તોલાના રૂ. 1.60 લાખની કિંમતના દાગીના તથા રોકડા રૂ. 48 હજાર મળી કુલ રૂ. 2.08 લાખની મત્તાની ચોરી કરી ફરાર થઈ ગયા હતા.

સીસીટીવી ફૂટેજ મેળવવા પ્રયાસો
નવસારી ટાઉન પોલીસે ઘટનાનો ભેદ ઉકેલવા સીસીટીવી ફૂટેજ મેળવવાનો પ્રયાસ શરૂ કર્યો છે. પોલીસ એડવોકેટના મકાનની આસપાસના વિસ્તારમાં તથા રોડ ઉપરના સીસીટીવી કેમેરા ચેક કરી રહી છે.