5 August 2018

વિજલપોરમાં દબાણ કરતી 17 લારી દૂર કરાઈ


નવસારીને અડીને આવેલી વિજલપોર નગરપાલિકા દ્વારા શહેરના રાજમાર્ગો ઉપર ઉભા થયેલા લારીગલ્લા દબાણને દૂર કરાયું હતું. 17 જેટલી લારીઓ પાલિકાએ કબજે લીધી હતી.

વિજલપોર પાલિકામાં છેલ્લા ઘણાં દિવસોથી લારીગલ્લાને લઈ ભારે હોબાળો મચ્યો છે. લારી હટાવવા મુદ્દે પાલિકા હોદ્દેદારો તથા કોર્પોરેટરો પણ સામસામે આવી ગયા છે છતાં પાલિકા અધિકારીઓએ પોતાની કામગીરીને અંજામ આપવામાં પીછેહઠ કરી નથી. આજે શનિવારે પાલિકા સત્તાધિશોએ સવારથી લઈ સાંજ સુધીમાં 17 લારીઓ હટાવી હતી. સંસ્કારભારતીથી લઈ રેલવે ‌ફાટક અને શિવાજી ચોકથી રામનગર સુધીમાં આ કામગીરી કરવામાં આવી હતી. જોકે આજે શનિવારે કેટલાક લારીવાળાઓએ બળાપો ઠાલવ્યો હતો પરંતુ સત્તાધિશોએ લારીઓ ઉઠાવી લેવામાં પાછીપાની કરી ન હતી.

વિજલપોર પાલિકાના અધિકારી મોહનભાઈ પટેલે જણાવ્યું હતું કે જે લારીઓ ટ્રાફિકને અડચણરૂપ હતી તે લારીઓનું જ દબાણ દૂર કરવામાં આવ્યું છે. છેલ્લા ઘણાં વખતથી ઉભા થયેલા દબાણને કારણે લોકોએ રસ્તા ઉપરથી આવાગમન માટે પણ મુશ્કેલી ઉભી થતી હતી. જેથી આ કાર્યવાહી કરવાની ફરજ પડી હતી. આગામી દિવસોમાં પણ આ કામગીરી ચાલુ રાખી શહેરના રસ્તાઓ ખુલ્લા કરાશે.