5 August 2018

બંધ ફલેટનું તાળું ખોલી રોકડા રૂ. 40 હજાર સળગાવી દેવાયા


નવસારીમાં ભેંસતખાડા વિસ્તારમાં રિંગરોડ ઉપર આવેલા હનીન હેરિટેજ એપાર્ટમેન્ટમાં બંધ મકાનનું તાળુ ખોલી કોઈ અજાણી બુરખાધારી મહિલાએ રોકડા રૂ. 40 હજાર સહિત કેટલીક સામગ્રીઓમાં આગ ચાપી ફરાર થઈ ગયું હતું. કોઈ અજાણી મહિલાએ આ કારસ્તાન કર્યાનું હાલ ચર્ચાય રહ્યું છે.

ટાઉન પોલીસ મથકમાં આ ઘટના અંગે ફરિયાદ નોંધાતા પોલીસે તપાસ હાથ ધરી છે. નવસારીમાં શનિવારે સવારે 7.30થી 7.45 કલાકની આસપાસ રિંગરોડ ઉપર આવેલા હનીન હેરિટેજમાં બંધ ફ્લેટનું તાળું ખોલી કોઈકે ફ્લેટમાં આગ ચાંપી દીધી હતી.

આ ઘટનાની જાણ થતા જ મકાન માલિક ઘટનાસ્થળે પહોંચ્યા હતા. બેડ ઉપર મુકેલા રોકડા રૂ. 40 હજાર, ગાદલા, પાનકાર્ડ, આઈકાર્ડ અને બેડ સહિતની સામગ્રી બળીને ખાખ થઈ ગઈ હતી. આ ઘટના સંદર્ભે મકાનમાલિક સૈયદ મોહમદ યુસુફ સૈયદે ટાઉન પોલીસ મથકમાં ફરિયાદ નોંધાવી હતી. જેને આધારે ટાઉન પીઆઈ એસ. એમ. સગરે આગળની તપાસ હાથ ધરી છે. કોઈક મહિલાએ ઘરમાં પ્રવેશ કરીને આ કારસ્તાન કર્યાનું ચર્ચાય છે.