6 August 2018

નવસારી મહાપાલિકામાં જોડાવા વિજલપોર નગરપાલિકા તૈયાર


સૂચિત નવસારી મહાનગરપાલિકામાં જોડાવા માટે વિજલપોર પાલિકાએ સંમતિ આપી દીધી છે. વિજલપોર પાલિકાની સામાન્ય સભામાં આ અંગેનો ઠરાવ કરી દીધો છે.

નવસારી મહાનગરપાલિકા બનાવવા માટે રાજ્ય સરકારમાં તજવીજ ચાલી રહી છે. જે અંતર્ગત થોડા દિવસ અગાઉ જ રાજ્ય સરકારે અહીંની નવસારી નગરપાલિકા તથા વિજલપોર નગરપાલિકા પાસે નાણાકીય સ્થિતિ વિગેરેની માહિતી મંગાવી હતી.

ત્યારબાદ હાલમાં જ નવસારીના સાંસદ, જિલ્લાનાં ભાજપનાં ત્રણેય ધારાસભ્યો, વેપારી-બિલ્ડીંગ એસોસિએશન વગેરેના હોદ્દેદારો રાજ્યના મુખ્યમંત્રી વિજય રૂપાણીને મળ્યા હતા. આ મુલાકાતમાં મુખ્યમંત્રી સમક્ષ નવસારીને મહાપાલિકા બનાવવાની રજૂઆતો કરી હતી.

સીએમ સાથેની બેઠક બાદ વિજલપોર પાલિકાની સામાન્ય સભા મળી હતી.
આ બેઠકમાં સૂચિત મહા નગરપાલિકામાં સમાવેશ થનારી પાલિકા, પંચાયતોનાં ઠરાવ જરૂરી હોવાની ચર્ચા થઇ હતી.

ગ્રામ પંચાયતોનો ઠરાવ ક્યારે?
સૂચિત નવસારી મહાપાલિકામાં નવસારી અને વિજલપોર શહેર ઉપરાંત નજીકનાં 8 થી 9 ગામડાંને પણ સમાવવા પડે એમ છે. આ સ્થિતિમાં નવસારી મહાપાલિકામાં જોડાવા માટે આ ગામડાઓની ગ્રામ પંચાયતોના સંમતિ આપતા ઠરાવ પણ જરૂરી છે. ગ્રામ પંચાયતોનાં ઠરાવ જલદીથી મળે એ દિશામાં સ્થાનિક નેતાગીરી પ્રયત્નશીલ હોવાની જાણકારી મળી છે.