7 August 2018

કૃષિ શિક્ષણમાં ખાનગીકરણનો વિરોધ, વિદ્યાર્થીઓની રેલી


આ ખાનગી કૃષિ યુનિવર્સિટીનાં વિદ્યાર્થીઓ દ્વારા અનુસ્નાતક કક્ષા (Msc.Agri) માં પ્રવેશ મેળવવાની માંગ કરતાં વિવાદ છંછેડાયો છે અને સરકારી કૃષિ યુનિવર્સિટીનાં વિદ્યાર્થીઓ ખાનગી કૃષિ યુનિ. સામે આંદોલને ચઢ્યા છે.

નવસારી કૃષિ યુનિવર્સિટીનાં વિદ્યાર્થીઓએ વિદ્યાર્થી સંગઠન AIASA (આઇસા) નાં નેજા હેઠળ નવસારીમાં સોમવારે રેલીનું આયોજન કર્યુ હતુ. કૃષિ યુનિવર્સિટીનાં વિદ્યાર્થીઓ લુન્સીકુઇ ખાતે બપોરબાદ મોટી સંખ્યામાં ભેગા થયા હતા. ત્યાંથી રેલી કાલીયાવાડી કલેક્ટરાલય જવા નીકળી હતી. રેલીમાં સામેલ વિદ્યાર્થીઓએ બેનરો સાથે કૃષિ શિક્ષણના ખાનગીકરણ સામે સુત્રચ્ચાર કર્યો હતો.

રેલી કલેક્ટરાલય પહોંચતા ત્યાં હાજર એડીશનલ કલેક્ટર કમલેશ રાઠોડને વિદ્યાર્થી પ્રતિનિધિઓ મળ્યા હતા. વિદ્યાર્થીઓએ કલેક્ટરને લેખિત અને મૌખિક રજૂઆતો કરી હતી.

પોતાની રજૂઆતમાં વિદ્યાર્થીઓએ જણાવ્યું કે ખાનગી યુનિવર્સિટીઓનાં વિદ્યાર્થીઓને કોઇ પણ એગ્રીકલ્ચર પરીક્ષામાં પ્રવેશ આપવો નહીં. ખાનગી યુનિ.ના વિદ્યાર્થીઓ દ્વારા અનુસ્નાતક કક્ષામાં પ્રવેશની જે માંગણી કરી છે તે તદ્દન ગેરવ્યાજબી છે.

કારણ કે આ યુનિ.માં ધારાધોરણોનું પાલન કરાતું નથી. વધુમાં કૃષિ ક્ષેત્રે ચાલતી ખાનગી કોલેજો કે યુનિવર્સીટીઓને ગુજરાતની કૃષિનું સ્તર ઉંચુ આવે એ હેતુથી તાત્કાલિક ધોરણે બંધ કરવાની માંગ પણ કરી દીધી હતી.

સરકારી કોલેજના વિદ્યાર્થીઓને નુકશાન
ખાનગી કૃષિ યુનિ. કોઇપણ ધારાધોરણોનું પાલન કરતું ન હોવા છતાં તેના વિદ્યાર્થીઓ અમારી ખોટી હરીફાઇમાં આવે છે. તેઓને ફિલ્ડનું કોઇ નોલેજ નથી. કૃષિ અંગે કઇ જાણતા નથી. આજે તેઓ એડમીશન માંગે છે, કાલે જોબ કરવા આવશે તેમાં પણ ફોર્મ ભરશે એટલે અમને તો નુકશાન જ છે ને. જો સરકાર હાલ રજૂઆત કાને ન ધરે તો આગામી દિવસોમાં આંદોલન જારી રાખશું.અંકિત ચૌધરી, વિદ્યાર્થી અગ્રણી, નવસારી કૃષિ.યુનિ

જુનાગઢની પરીક્ષાથી મામલો ઉંચકાયો
સરકારી કૃષિ યુનિવર્સિટીના વિદ્યાર્થીઓનો વિરોધ જુનાગઢની પરીક્ષામાં સર્જાયેલી સ્થિતિથી ઉભો થયાનું જાણવા મળે છે. જુનાગઢ કૃષિ યુનિવર્સિટી ખાતે અનુસ્નાતક કક્ષાની પ્રવેશ પરીક્ષા (એમએસસી) માં ખાનગી યુનિ.નાં વિદ્યાર્થી પણ એપ્લાય થયા હતા. જોકે નિર્ધારિત પરીક્ષા કમિટીએ તેમને નોનએલીજેબલ (માન્યતા નહીં) ઠેરવતા આ ખાનગી કોલેજના, વિદ્યાર્થીઓ હાઇકોર્ટમાં ગયા હતા અને કોર્ટે ‘સ્ટે’ આપ્યો છે. પરીક્ષા હાલ અટવાતા ખાનગી યુનિ.સામે વિરોધ વધવાની જાણકારી મળી છે.

ખાનગી કૃષિ યુનિવર્સીટી સામે આક્ષેપો
- કૃષિ કોલેજ માટે જરૂરી 50 હેક્ટર જમીન અને વિવિધ વિષયોની પ્રયોગ શાળાઓ હોતી નથી.
- ખાનગી યુનિ.માં ઓનલાઇન પ્રવેશ પ્રક્રિયા કરાતી નથી, મનફાવે તેવી ફી લઇ પ્રવેશ અપાઇ છે.
- ખાનગી કોલેજ પાસે પૂરતા પ્રાધ્યાપકો નથી.
- પ્રાધ્યાપકો NET ક્વોલીફિકેશન, પીએચડી પદવી ધરાવતા નથી જે ICAR નાં ધારાધોરણોથી વિરૂદ્ધ છે.
- પરીક્ષા સંપૂર્ણપણે ખાનગી રીતે લેવાતી હોય મન ધારેલા પરિણામ વિદ્યાર્થીઓને મળે છે.