8 August 2018

વિજલપોર ખાતે બે બાળકીને ગિફ્ટ આપી અડપલાં કરતો યુવક પકડાયો


વિજલપોરની બે બાળકીને લાલચ આપી શરીરે હાથ ફેરવતા ઘેલખડીના શખ્શની ધરપકડ કરાઇ છે.

વિજલપોરમાં રહેતી 10 વર્ષની બે બાળકીઓ સીમા (નામ બદલ્યું છે) અને રીમા (નામ બદલ્યું છે) પ્રાથમિક શાળામાં અભ્યાસ કરે છે. આ બંને બાળકીઓ શાળાએ જતી ત્યારે એક અજાણ્યો શખ્શ તેમને કંપાસ બોક્ષ, સ્કેચપેન, કલર, સંચા, રબર, પેન્સીલ, બોલપેન, મેકઅપ બોક્ષ વિગેરે આપી પટાવતો રહેતો હતો. આ વસ્તુઓ આપ્યા બાદ ઉક્ત શખ્શ બાળકીના ગાલ ઉપર તેમજ શરીરે હાથ ફેરવાતો હતો. વધુમાં કહેતો હતો કે તમે કોઇને વાત કરશો તો મારી નાંખીશ એમ ધમકી આપતો હતો.

આ બાબતની જાણ સીમાનાં માતાને થતાં તેના ઘરવાળાઓએ ઉક્ત અજાણ્યા શખ્શને પકડવાની યોજના બનાવી હતી અને તેની સમજ સીમાને પણ આપી હતી. નિર્ધારિત વાતચીત મુજબ સીમા અને તેની મિત્ર રીમા શાળાએ ગયા હતા. સીમાના પિતા તથા અન્ય સંબંધીઓ થોડા થોડા અંતરે ગોઠવાઇ ગયા હતા. સીમા જેવી એક લારી-ગલ્લા પાસે ઉભી હતી ત્યારે એક અજાણ્યાએ સીમાને કલર પેનનું બોક્સ આપ્યું હતુ તુરંત સીમાએ ઇશારો કરતાં તેના પિતા તથા સંબંધીઓ ત્યાં ધસી ગયા હતા અને ઉક્ત શખ્શને પકડી લીધો હતો.

આ પકડાયેલા શખ્શનું નામ અલીહશન મુન્ના સા હોવાનું અને તે નવસારીના ઘેલખડી વિસ્તારનો હોવાનું જણાવ્યું હતુ. પકડાયેલા અલીહશનને જલાલપોર પોલીસને હવાલે કરવામાં આવ્યો હતો. આ બનાવની ફરિયાદ સીમાની માતાએ પોલીસમાં નોંધાવી હતી.