12 August 2018

નવસારીમાં ઢીંગલાબાપાની શોભાયાત્રામાં હજારોની સંખ્યામાં લોકો ઉમટી પડ્યા


નવસારીમાં અષાઢ વદ અમાસના દિવસે દિવાસો મહોત્સવની ભવ્ય ઉજવણી કરવામાં આવી હતી. આ મહોત્સવમાં દર વર્ષની માફક ઢીંગલાબાપાની વાજતે ગાજતે શોભાયાત્રા કાઢવામાં આવી હતી, જે લોકાર્ષણનું કેન્દ્ર બની હતી. આ શોભાયાત્રામાં હજારોની સંખ્યામાં લોકો ઉમટી પડ્યા હતા. દર વર્ષની માફક ચાલુ વર્ષે પણ નવસારીમાં દિવાસો મહોત્સવની જોરશોરથી અને વાજતે ગાજતે ભવ્ય ઉજવણી કરવામાં આવી હતી. વર્ષોથી ચાલતી આવતી પરંપરાને પણ ચાલુ વર્ષે આગળ ધપાવવામાં આવી હતી. સાંજે 6 કલાકની આસપાસ દાંડીવાડમાંથી રતિલાલ છનાભાઈ રાઠોડના ઘરેથી ઢીંગલાબાપાની શોભાયાત્રા નીકળી હતી.

નવસારીમાં દિવાસો મહોત્સવની જોરશોરથી અને વાજતે ગાજતે ભવ્ય ઉજવણી

આરતી બાદ ડીજેના તાલ સાથે યુવાનો ઝુમી ઉઠ્યા હતા. દાંડીવાડથી કહારવાડ, ગોલવાડ, તરોટા બજાર સુધી અને પુન: દાંડીવાડ થઈ પૂર્ણા નદીકાંઠે આ શોભાયાત્રા પહોંચી હતી અને ત્યાં ઢીંગલાબાપાની પ્રતિમાનું વિસર્જન કરવામાં આવ્યું હતું.આ શોભાયાત્રા પહેલા નવસારીના ધારાસભ્ય પિયુષભાઈ દેસાઈ સહિત ભાજપ અને કોંગ્રેસના આગેવાનો, સ્થાનિક અગ્રણીઓએ ઢીંગલાબાપાના દર્શન કર્યા હતા. ચૂસ્ત પોલીસ બંદોબસ્ત સાથે આ શોભાયાત્રાની પૂર્ણાહુતિ થઈ હતી. દરેક સમાજના લોકો આ ઢીંગલાબાપાની શોભાયાત્રામાં ઉમટી પડ્યા હતા. દર વર્ષે અહીં મોટી સંખ્યામાં લોકો આવે છે અને પોતાની માનતા પણ પુરી કરે છે. લાલ સાફામાં અને સફેદ કપડામાં ઢિંગલા બાપા લોકોમાં આકર્ષણનું કેન્દ્ર બન્યા હતા.

મેળામાં 300થી વધુ નાની મોટી દુકાનો લાગે છે
ઢીંગલાબાપાની શોભાયાત્રાની સાથે દાંડીવાડમાં મેળો પણ લાગે છે. અહીં 300થી વધુ નાની મોટી રમતગતમના સાધનો અને ખાણીપીણીની લારીઓ ચાલે છે. હજારો લોકોએ દર વર્ષની માફક મેળાનો આનંદ લૂંટ્યો હતો.

100 વર્ષથી આ મહોત્સવ ઉજવાય છે
કહેવાય છે કે 100 વર્ષ પહેલા દાંડીવાડ વિસ્તારમાં કોલેરા જેવો રોગ ફાટી નીકળ્યો હતો. એ વખતે લોકો મૃત્યુ પામ્યા હતા. આથી ગભરાટ વ્યાપી ગયો હતો. લોકોએ ભગવાનને પ્રાર્થના કરી હતી. એ વખતે આકાશવાણી થઈ હતી. જેમાં કહેવાયું હતું કે માનવ જેવી પ્રતિમા બનાવી તેની વિધિવત પુજા કરવી તેનાથી રોગચાળો મટી જશે. એ પછી લોકોને જીવન મળ્યું હતું અને રોગમાંથી રાહત મળીહતી. એ વખતે ઘાસનો ઢીંગલો બનાવાયો હતો અને એ વખતે પારસી શખ્સે તેના કપડા આપતા તે પહેરાવાયા હતા. સફેદ વેશમાં મૂછવાળો રહેશેઅને માથા ઉપર પાઘડી સાથે સિગારેટ પીતો હોય તેવી રીતે વરરાજાની માફક શણગાર કરી તે પ્રતિમાની પુજા કરાઈ હતી.