13 August 2018

નવસારીને હાલ કરતાં વધુ પ્રેશરથી પાણી મળી શકશે


નવસારીમાં દક્ષિણ ઝોનની અંદાજિત 40 હજારની વસ્તીને હવે વધુ સારા પ્રેશરથી પાણી મળી શકશે. આ માટે અંદાજિત 5.12 કરોડ રૂપિયાનાં ખર્ચે તૈયાર થયેલ ટાંકી-સમ્પ સહિતની કામગીરી પૂર્ણ કરી દેવાઇ છે. ર્સ્વણિમ જયંતી મુખ્યમંત્રી શહેરી વિકાસ યોજના સ્ટેટ ફંડ અંતર્ગત 33.74 કરોડ રૂપિયાની પાણી પુરવઠા યોજના મંજૂર થઇ હતી. યોજના અંતર્ગત શહેરમાં અલગ અલગ જગ્યાએ નવી ટાંકી, સમ્પનું પણ નિર્માણ થઇ રહ્યું છે.

જે અંતર્ગત શહેરના સૂચિત દક્ષિણ ઝોનમાં આવતા આશાનગર, છાપરા રોડ, સિંધી કેમ્પ તથા તેની નજીકનાં વિસ્તાર માટે અંદાજિત 5.12 કરોડની પાણી યોજના પણ હતી. આ યોજના અંતર્ગત દૂધિયાતળાવના કિનારે 25 લાખ લીટરની કેપેસિટીવાળી ટાંકી, 68 લાખ લીટરની કેપેસીટીવાળો સમ્પ, પંપ હાઉસ સહિતની કામગીરી કરવાની હતી. આ કામગીરી છેલ્લા ઘણા સમયથી ચાલતી હતી, જે હવે પૂર્ણ થઇ છે.

આ કામગીરી પૂરી થતા સૂચિત દક્ષિણ ઝોનનો 40 હજારની વસ્તીને હાલ કરતાં વધુ પ્રેશરથી પાણી મળી શકશે.