14 August 2018

ખાનગીકરણ સામે નવસારી કૃષિ યુનિ.ના વિદ્યાર્થીઓની કાળા કપડા પહેરી રેલી


ખાનગી યુનિ. ધારાધોરણ મુજબ ચાલતી ન હોવા છતાં તેમાં દાખલ વિદ્યાર્થીઓ જુનાગઢમાં અનુસ્નાતક પરીક્ષામાં એપ્લાય

આ ખાનગી યુનિવર્સિટીઓ ધારાધોરણ મુજબ ચાલતી ન હોવા છતાં તેમાં દાખલ વિદ્યાર્થીઓ હાલમાં જુનાગઢમાં અનુસ્નાતક પરીક્ષામાં એપ્લાય થતા (જોકે પરીક્ષા કમિટીએ તેઓને નોન એલીજેબલ ઠેરવતાં મામલો હાઇકોર્ટમાં ગયો છે) સરકારી કૃષિ યુનિવર્સિટીના વિદ્યાર્થીઓ રોષે ભરાયા છે.

જે અંતર્ગત ગત 6 ઓગષ્ટે નવસારીમાં રેલી, ધારણાનો કાર્યક્રમ આપ્યા બાદ આજે સોમવારે પૂન: ખાનગીકરણ વિરૂદ્ધ કાર્યક્રમોની શરૂઆત કરી છે. બીજા તબક્કાના કાર્યક્રમમાં વર્તમાન અઠવાડિયાને ‘બ્લેક વીક’ તરીકે મનાવવાનો નિર્ણય વિદ્યાર્થીઓએ લીધો છે. બ્લેકવીક અંતર્ગત જ આજે સોમવારે ‘બ્લેક ડે’ મનાવવા નવસારી કૃષિ યુનિવર્સિટીના કેમ્પસમાં વિદ્યાર્થીઓની મૌન રેલી નીકળી હતી. કાળા કપડાં સાથે કાળી પટ્ટી મોં ઉપર ધારણ કરી નવસારી ન.મ.કૃષિ મહાવિદ્યાલયથી વિદ્યાર્થીઓની મૌન રેલી બપોરે 3 વાગ્યાનાં અરસામાં નીકળી હતી. રેલી મહાવિદ્યાલયથી કુલપતિ ભવન અને અસ્પી હોર્ટ કલ્ચર કોલેજ થઇ પરત ન.મ. કૃષિ મહાવિદ્યાલય ખાતે જ પરત આવી હતી. કૃષિ શિક્ષણના ખાનગીકરણ સામે વિદ્યાર્થીઓએ કાળા કપડાં, પટ્ટી ધારણ કરી નારાજગી વ્યક્ત કરી હતી. શિસ્તબદ્ધ આ મૌન રેલીએ સમગ્ર કૃષિ કેમ્પસનું ધ્યાન ખેંચ્યું હતુ.

રેલીમાં હાજર વિદ્યાર્થીઓનાં જણાવ્યા મુજબ જ્યાં સુધી સરકાર ખાનગીકરણ બંધ ન કરી અમારી માંગનું સમાધાન ન કરે ત્યાં સુધી અમારી લડાઇ જારી જ રહેશે.

ખાનગીકરણના વિરોધમાં કૃષિ મહાવિદ્યાલયથી વિદ્યાર્થીઓની મૌન રેલી બપોરે 3 વાગ્યાનાં અરસામાં નીકળી હતી.

આજે 2 હજાર કાર્ડ લખાશે
ખાનગીકરણ સામેની લડાઇમાં મંગળવારે નવસારી કૃષિ યુનિવર્સિટીના વિદ્યાર્થીઓ વડાપ્રધાન, મુખ્યમંત્રી, કેન્દ્ર-રાજ્યનાં કૃષિ મંત્રીઓ રાજ્યપાલને 2 હજાર પોસ્ટકાર્ડ લખશે. આ કાર્ડમાં ખાનગીકરણ વિરૂદ્ધની તેમની રજૂઆત કરવામાં આવશે.

ખાનગી શિક્ષણ બંધ કરવા ખરડો
કર્ણાટકમાં ત્યાંની સરકારે 6 મહિના પહેલાં વિધાનસભામાં ખરડો પસાર કરી ગેરકાયદે ખાનગી યુનિવર્સિટીનાં કોર્ષને બંધ કર્યો હતો. ગુજરાતમાં પણ અહીંની સરકાર આવું કરી એમને ન્યાય આપી શકે છે. - અંકિત ચૌધરી, વિદ્યાર્થી, કૃષિ.યુનિ.નવસારી