16 August 2018

નવસારીમાં વીસી ચલાવનારો બંગાળી રૂ. ત્રણ કરોડનો ચૂનો ચોપડી ગયો


અત્રેના ઝવેરી સડક વિસ્તારમાં વીસી ચલાવતા બંગાળીએ લોકોને ત્રણ કરોડનો ચૂનો ચોપડી નાંખ્યો હોવાનું જાણવા મળેલ છે. બંગાળીએ ઘણાને રાતા પાણીએ રડાવી નાંખ્યા છે.

છાપરા રોડ પર રહેતો એક બંગાળી નવસારીના ઝવેરી સડક વિસ્તારમાં ઘણા સમયથી વીસી ચલાવતો હતો. આ વીસીમાં ઊંચા વ્યાજે લોકોને પૈસા પૂરા પાડતો હતો. મોટી રકમના વીસીના હપ્તા લઈને એ મોટી રકમ ઊંચા વ્યાજે ધીરવાનું કામ કરતો હોય એવી ચર્ચા ચાલી રહી છે. એમ લાગે છે કે વીસીના હપ્તામાંથી જેની વીસી લાગે તેની મોટી રકમને બજારમાં ફેરવી આપવાનું કામ પણ તે કરતો હોય એવું તેની આસપાસના લોકોમાંથી જાણવા મળે છે.

આ વીસી દ્વારા તેણે લોકોને મોટી રકમ ધીરી છે. પરંતુ તેના રૂપિયા પણ ફસાયા હોવાથી તે ગાયબ થઈ ગયો છે. રૂપિયા ફસાતા વીસીમાં નાણાં ભરનારાઓએ દેકારો મચાવી દીધો છે. મોટી રકમ જમા લેતો હોવાને કારણે એમ લાગે છે કે અંદાજે ત્રણ કરોડ રૂપિયાનો ચૂનો તે લોકોને ચોપડી ચૂક્યો છે.

હવે જોવાનું એ રહે કે પોલીસ કોઈ પગલાં લેશે કે કેમ? અહીં મોટા માથા પણ ભેરવાયા હોવાની પણ શંકા છે. એ  જોતાં કોઈ ફરિયાદ કરે એવી સંભાવના ઓછી છે, પણ પોલીસે વીસીના દૂષણને ડામવાની જરૂર છે. ખાસ કરીને વીસીના વિષચક્રમાં નાના લોકો ફસાઇ જાય તો તેઓ માટે તો જીવવું દુષ્કર થઈ પડે એમ છે, આ અંગે પોલીસ જાગે એ જરૂરી છે.