17 August 2018

નવસારીમાં ઘરના ઓટલા પરથી વૃદ્ધાના ગળામાંથી ચેઇનની તફડંચી


નવસારીના દડંગવાડના ટેકરા વિસ્તારમાં ત્રણ અજાણ્યા યુવાનો સ્કૂટર ઉપર આવી ઘરના ઓટલા ઉપર બેસેલ વૃદ્ધ મહિલાના મોં ઉપર મરચાની ભૂકી નાંખી ગળામાં પહેરેલ બે થી અઢી તોલાની સોનાની ચેઇન તોડી ભાગી ગયા હતા.

નવસારીમાં લાયબ્રેરીની સામે દડંગવાડના ટેકરા ઉપર પોટલીયાવાડમાં રહે છે. ત્યાં શાંતાબેન પટેલ નામની 85 વર્ષની મહિલા પણ રહે છે. આ વૃધ્ધ મહિલા 15 મી ઓગસ્ટનાં રોજ બપોરે પોણા બારથી બાર વાગ્યાનાં સમયગાળા દરમિયાન ઘરનાં ઓટલા ઉપર બેઠા હતા. તેમની થોડે દૂર એક મહિલા પણ ખબેસેલ હતી. આ દરમિયાન ત્રણ અજાણ્યા યુવાનો સ્કુટર ઉપર આવ્યા હતા. ત્રણમાંના બે યુવાનો તો સ્કુટર પાસે જ ઉભા રહ્યાં હતા. જ્યારે એક યુવાન ઝડપભર શાંતાબેના તરફ આવ્યો હતો. તેણે પાછળથી શાંતાબેનનું મોં મરચાની ભૂકી નાંખી ડાબી દીધું હતુ.

ત્યારબાદ પલકવારમાં જ શાંતાબેને ગળામાં પહેરેલ સોનાની ચેઇન તોડી તે લઇ નજીકમાં ઉભેલ બે જણા સાથે સ્કુટર ઉપર બેસી રફુચક્કર થઇ ગયા હતા. શાંતાબેને બૂમ પાડતા નજીક રહેતા લોકો બહાર આવ્યા તો હતા પરંતુ ત્યાં સુધીમાં તો તફડંચી કરનારા ભાગી ગયા હતા. શાંતાબેનના ગળામાંથી તફડાવી કરાયેલ સોનાની ચેઇન બે થી અઢી તોલાની હતી. જેની કિંમત પોલીસે 40 હજાર રૂપિયાની અંદાજીત છે.