17 November 2018

નવસારી જિલ્લામાં ઓકટોબરમાં જ ડેંગ્યુના 70 કેસ


ચાલુ સાલ નવસારી-વિજલપોર પંથકમાં ડેંગ્યુના રોગે રીતસર હાહાકાર મચાવ્યો છે. સરકારી ચોપડે જિલ્લામાં નોંધાયેલા 118 કેસમાંથી 97 તો નવસારી-વિજલપોર શહેરના જ છે. ઓકટોબરમાં નવસારીમાં 31 અને વિજલપોરમાં ડેંગ્યુના 26 કેસ નોંધાયા હતા.

આમ તો નવસારી પંથકમાં છેલ્લા કેટલાક વર્ષોથી ડેંગ્યુના કેસો બહાર આવતા જ રહ્યા છે પરંતુ ચાલુ સાલે તો રીતસર રેકર્ડ તોડી નાંખ્યો છે. ચાલુ સાલ જાન્યુઆરીથી 15મી નવેમ્બર સુધીમાં સરકારી ચોપડે શંકાસ્પદ 457 સેમ્પલની ચકાસણી કરાઈ હતી. તેમાંથી 118 ડેંગ્યુ પોઝીટીવ આવ્યા છે. ઉલ્લેખનીય વાત એ છે કે 118માંથી 70 ડેંગ્યુના કેસો તો એક જ ગત ઓકટોબરમાં જ નોંધાયા હતા. મોટાભાગના (90 ટકા) કેસો ઓગસ્ટથી નવેમ્બરમાં નોંધાયા છે. ગત 2017ના વર્ષમાં શંકાસ્પદ 199 સેમ્પલોની ચકાસણીમાંથી 30 કેસ ડેંગ્યુના પોઝીટીવ આવ્યા હતા. આમ ચાલુ સાલ ડેંગ્યુના કેસોમાં ભારે વધારો થયો એ નિર્વિવાદ વાત છે. ભૂતકાળમાં ન થયા હોય એટલા કેસો ચાલુ સાલ થયાની શક્યતા છે.

ડેંગ્યુના કેસો જિલ્લામાં જે નોંધાયા છે તેમાં મહત્તમ કેસો વિજલપોર અને નવસારી અર્બનમાં નોંધાયા છે. 118માંથી 97 કેસો આ બે શહેરમાં નોંધાયા છે. જેમાં 56 કેસો (જિલ્લામાં અડધા) તો વિજલપોરમાં જ છે. નવેમ્બર માસમાં 15 તારીખ સુધીમાં જિલ્લામાં કેસ ઘટી 13 ડેંગ્યુ પોઝીટીવ આવ્યા છે. ડેંગ્યુના કેસોમાં વધારા માટે સ્થળાંતર, સુરતમાં લોકોની આવ-જા ઉપરાંત સ્થાનિક કક્ષાએ પણ ડેંગ્યુના મચ્છરોનો ઉપદ્રવ જવાબદાર છે. ખાસ કરીને લોકો પાણીનો સંગ્રહ કરે છે ત્યાં ઉપદ્રવ જોવા મળે છે.

જિલ્લા મેલેરિયા અધિકારી ડો. પિનાકીન પટેલે જણાવ્યું કે, ‘ડેંગ્યુના કેસો ચાલુ સાલ વધ્યા છે એ વાત સાચી છે. તેને કાબૂમાં લેવા પ્રચાર કરી માહિતી અપાઈ છે. નવસારી-વિજલપોરમાં સર્વેની અને દવાનો છંટકાવ કરાયો છે. નવેમ્બરમાં કેસમાં ઘટાડો થયો છે.’

વિજલપોર ‘સંવેદનશીલ’ પણ પાલિકામાં સ્ટાફ નથી
ડેંગ્યુના વધુ કેસો વિજલપોરમાં બહાર આવ્યા છે. છતાં વિજલપોરમાં આરોગ્ય-મેલેરિયાનો અલાયદો સ્ટાફ નથી. સેનેટરી વિભાગ જ કામગીરી કરે છે. જોકે અર્બન હેલ્થ સેન્ટર જરૂર છે. આ અંગે વિજલપોર પાલિકા પ્રમુખ જગદીશ મોદીને પૂછતાં તેમણે જણાવ્યું કે, ‘અમે પાલિકામાં વધુ મહેકમ અંગેની માગ કરી જ છે.’

સરકારી-ખાનગી ચકાસણીમાં તફાવત કેમ ?
સરકારી ચોપડે 118 કેસો ચાલુ સાલ નોંધાયા છે. જોકે હકીકતના આંકડા વધુ હોઈ શકે છે. ખાનગી આંક કેટલાક સરકારી ચોપડે ન પણ નોંધાયા હોઈ શકે ! ખાનગીમાં બુમરાણ વધુ છે. જોકે સરકારી સૂત્રો એમ જણાવે છે કે સરકારી અને ખાનગી ચકાસણીમાં તફાવત હોય છે. ખાનગીમાં જે ચકાસણી કરાય છે તેમાં ‘રેપીડ કિટ’નો વપરાશ થતો હોવાનું જોવાય છે. જ્યારે સરકારી ચકાસણી ‘એલીઝા’માં થાય છે. રેપીડ કિટની ચકાસણીમાં વધુ ચોકસાઈ રહેતી ન હોવાનું સરકારી સૂત્રો જણાવે છે. કેટલાક વાયરલ ફીવરના કેસો પણ ‘ડેંગ્યુ’માં ખપાવાતા હોવાનો આક્ષેપ કરાઈ રહ્યો છે.