5 July 2019

ડ્રેનેજમાં 150 ફૂટનું ડેમેજ, લોકો ફરી સલવાયા


નવસારી શહેરના મુખ્ય માર્ગ નીચેથી પસાર થતી વિજલપોરની ડ્રેનેજમાં 150 ફૂટની 'મેગા ડેમેજ' (ભંગાણ) બહાર આવ્યું છે અને તેને લઈને તૂટી ગયેલા 25 પાઈપો બદલવા પડશે. આ મેગા ડેમેજની મરામત શરૂ કરતા મુખ્ય માર્ગ બંધ થતા હજારો વાહનચાલકો મુશ્કેલીમાં મુકાયા છે. નવસારી કોટન મિલથી રેલવે સ્ટેશન જતા માર્ગ નીચેથી પસાર થતી વિજલપોર શહેરની ડ્રેનેજ લાઈન સ્ટેશન મસ્જિદ વિસ્તારમાં કેટલાક દિવસથી ચોકઅપ થઈ ગઈ છે. આ ચોકઅપ લાઈનની ચકાસણી કરતા પાલિકાને ડ્રેનેજમાં ભંગાણ દેખાયું હતું.

આ ડ્રેનેજના તૂટી ગયેલા પાઈપોની જગ્યાએ નવા પાઈપ નાંખવાની કામગીરી ત્રણ-ચાર દિવસથી શરૂ કરાઈ છે. આ કામગીરી દરમિયાન ડ્રેનેજમાં 150 ફૂટનું મેગા ડેમેજ (મોટુ ભંગાણ) બહાર આવ્યું છે અને એક પછી એક નવા પાઈપો નાંખવા પડી રહ્યા છે. સાડા 6 ફૂટથી વધુ લંબાઈના 22થી વધુ પાઈપો નાંખવા પડશે. ડેમેજ ડ્રેનેજમાંથી પસાર થતુ પાણી અન્ય લાઈનથી જલાલપોર તરફ ડાયવર્ટ થયું છે.

ડ્રેનેજના આ મેગા ડેમેજે નવસારી-વિજલપોરના પશ્ચિમ ભાગનો સિનારીયો અને રોજનીશી જ બદલી નાંખી છે. વિજલપોરથી નવસારી રેલવે સ્ટેશનનો માર્ગ ડ્રેનેજની કામગીરીથી બંધ થતા અહીંથી પસાર થતા હજારો વાહનચાલકો મુશ્કેલીમાં મુકાઈ રહ્યા છે. આ વાહનચાલકોનો સઘળો ભાર વિજલપોર રેલવે ફાટકેથી પસાર થતા રોડ ઉપર ગયો છે જેને લઈને ફાટકે દિવસમાં અવારનવાર ટ્રાફિકની સમસ્યા સર્જાઈ રહી છે. જે વિસ્તારમાં ડ્રેનેજનું કામ થઈ રહ્યું છે ત્યાંના રહીશોની તો હાલત ખરાબ થઈ ગઈ છે.

અમારી હાલત તો કફોડી છે
અમારા વિસ્તાર નજીક જ ડ્રેનેજનું કામ ચાલી રહ્યું હોય અમારી હાલત તો ભારે કફોડી છે. જો દર્દીને દવાખાને લઈ જવું હોયતો અહીં વાહન આવે તેમ પણ નથી. માર્ગ લપસણો પણ બન્યો છે. મુસ્લિમ સોસાયટી, સૌરાષ્ટ્ર સોસાયટી, દેવચંદ ચાલ, હિરામેન્શન, લાલચાલ વગેરેમાં રહેનારાની હાલત ખરાબ છે. - ઈબ્રાહીમ સૈયદ, રહીશ, મુસ્લિમ સોસાયટી, નવસારી

મોટા ભંગાણનું કારણ શું?
વિજલપોરની 20 વર્ષ જૂની ડ્રેનેજ લાઈનમાં પડેલા ભંગાણનું ચોક્કસ કારણ જાણી શકાયું નથી. એક કારણ નજીકથી પસાર થતી નવસારીની લાઈનમાંથી સતત પાણી ઝરતા માટી ધસી પડી છે અને તેના કારણે પાઈપલાઈન ખવાઈ ગઈ હોવાનું જણાવાય છે. એક કારણ લાઈન જૂની હોવાનું જણાવાય છે. જોકે આમજનતા નંખાયેલ પાઈપની કવોલિટી, થયેલ કામ ઉપર પણ આંગળી ચીંધે છે.

વરસાદે સ્થિતિ બગાડી
ચોમાસામાં જ ડ્રેનેજ ડેમેજ થતા વરસાદે સ્થિતિ વધુ બગાડી છે. ડ્રેનેજનું કામ કરવામા પણ વરસાદ અવરોધ કરી રહ્યો છે. બીજુ કે વરસાદી પાણી વિજલપોરના રેલવે ગરનાળામાં ભરાતા ત્યાંથી વાહનોની અવરજવર બંધ થતા ટ્રાફિકની સમસ્યા વકરી છે.

મેગા ડેમેજ 18 લાખથી વધુનું પડશે
વિજલપોરની ડ્રેનેજમાં પડેલું મોટુ ભંગાણ પાલિકાને ખર્ચાળ પણ પડશે. 22થી વધુ મોટા પાઈપ નાંખવા ઉપરાંત લેબર ખર્ચ અને તમામ ખર્ચ મળી 18 લાખ રૂપિયાથી વધુ ખર્ચ થનાર હોવાનું પાલિકાના સૂત્રો મારફત જાણવા મળ્યું છે.

7-10 દિવસ કામ ચાલવાની ધારણા
20 વર્ષ જૂની ડ્રેનેજની લાઈનમાં પડેલા ભંગાણનું કામ શરૂ થઈ ગયું છે. 11 પાઈપ નંખાઈ ગયા છે, હજુ કામ જારી છે. અઠવાડિયા 10 દિવસમાં કામ પુરું કરી દેવાની ધારણા છે. વરસાદને લઈ વહેલું મોડુ થઈ શકે છે. - શશી પટેલ, ઈજનેર, વિજલપોર પાલિકા