6 July 2019

ટ્રાફિક સમસ્યાથી ફૂટપાથ બન્યો રસ્તો, ફૂટપાથ ઉપરથી વાહનોની અવરજવર શરૂ થઇ


વિજલપોરમાં વકરેલી રેલવે ફાટક વિસ્તારની ટ્રાફિક સમસ્યાએ અહીંના 4 થી 6 ઈંચ ઉંચાઈએ બનાવેલા ફૂટપાથને પણ વાહન ચાલકો એ રસ્તો બનાવી દીધો છે.

વિજલપોરમાં ચોમાસામાં વરસાદ પડતાં રેલવે ફાટક નજીકના ગરનાળામાં પાણી ભરાઈ જાય છે, જેને કારણે અહીંથી થતી વાહનોની અવરજવર બંધ થઈ જાય છે.જેથી ફાટકના રસ્તે વાહનોનો ધસારો વધી જાય છે. હાલમાં વળી નવી સમસ્યા ઉભી થઇ છે.

વિજલપોરથી નવસારી સ્ટેશન જતા માર્ગ ઉપર સ્ટેશન મસ્જિદ નજીક ડ્રેનેજમાં મોટું ભંગાણ પડ્યું છે. તેનું રીપેરીંગ કામ શરૂ કરતાં સ્ટેશન માર્ગ બંધ થયો છે, જેને લઈને ઉક્ત માર્ગનો ઘણો વાહન વ્યવહાર વિજલપોરની રેલવે ફાટકના માર્ગે જ ડાયવર્ટ થયો છે, જેથી વિજલપોર ફાટકે હાલ ટ્રાફિક સમસ્યા વકરી છે.

ફાટક નજીક ના માર્ગ ઉપર અવારનવાર દિવસ દરમિયાન ટ્રાફિક જામ થાય છે.અહીં ભારે ટ્રાફિકના કારણે માર્ગ ઉપર થી પસાર થવું મુશ્કેલ થતા નાછૂટકે અનેક વાહનચાલકો એ અવરજવર માટે નજીકના ફૂટપાથ નો ઉપયોગ કરવા માંડ્યો છે. સામાન્યતઃ ફૂટપાથ પગપાળા ચાલવા માટે જ હોઈ છે પરંતુ વિજલપોર ફાટક વિસ્તારમાં પગપાળાની સાથે વાહનો પણ પસાર થતા જોવા મળે છે. બીજા શબ્દોમાં કહીએ તો ફૂટપાથ પણ અહીં રસ્તો જ બની ગયો છે.