8 July 2019

નવસારીના વોર્ડ નં. 11ના પોશ વિસ્તારમાં ઠેર ઠેર પાણી ભરાયાં


નવસારીમાં હાલમાં પડી રહેલા વરસાદને કારણે વોર્ડ નં. 11માં આવેલ પોશ વિસ્તારમાં ઠેકઠેકાણે વરસાદી પાણી ભરાયાં હતાં. આ પાણી ભરાવાના મુખ્ય કારણમાં વરસાદી પાણીના નિકાલ માટેની જગ્યા ઉપર પાલિકા દ્વારા યોગ્ય વ્યવસ્થા કરાઈ નથી. આ ભરાયેલા પાણીનો યોગ્ય નિકાલ ન થાય તો અનેક સમસ્યા ઉભી થાય એમ છે. આ વિસ્તારના નગરસેવકોએ વારંવાર નગરપાલિકામાં વરસાદી પાણીના નિકાલ માટે રજૂઆત કરી હતી પરંતુ કોઈ પગલાં ન ભરાતાં પોશ વિસ્તાર પાલિકાના પાપે બેટ બની ગયો છે.

નવસારી શહેરમાં આવેલા વોર્ડ નં. 11ના પોશ વિસ્તારમાં છેલ્લાં 10 વર્ષમાં બહુમાળી ઈમારતોનું નિર્માણ થયું છે. જેને પગલે બાંધકામ થતા પાણીનાં નિકાલ માટેની ખાડી હતી તે સમયાંતરે સાંકડી થઈ ગઈ હતી. હાલમાં વરસાદી પાણીની ખાડીમાં નાના સિમેન્ટના ભૂંગળામાં સમાઈ ગઈ છે. જેના પગલે આ વિસ્તારમાં નવા બનેલાં 40થી વધુ એપાર્ટમેન્ટ બેટમાં ફેરવાયા છે. આ વિસ્તારમાં જૈન સમાજનું દેરાસર (બાવન જિનાલય), લેઉઆ પાટીદાર સમાજની વાડી આવેલી છે.

નગરના મોભીઓ તેમજ સામાન્ય મધ્યમ વર્ગના રહીશો રહે છે. હાલમાં નવસારીમાં છેલ્લા ચાર દિવસથી પડી રહેલા અવિરત વરસાદને કારણે આ પાણીના નિકાલ માટેની જગ્યા ન હોવાને કારણે આ પાણી ખાલી પ્લોટ અને રસ્તા ઉપર ઘેરાઈ ગયું છે. આ વિસ્તારના નગરસેવકો દ્વારા પાલિકામાં વારંવાર રજૂઆત કર્યા બાદ પણ પગલાં ન લેવાતાં આજે આ વિસ્તાર બેટમાં ફેરવાયો છે. જેને પગલે આ પાણીનો નિકાલ ક્યારે થશે એ સવાલ સ્થાનિકોમાં ચર્ચાઈ રહ્યો છે.

પાણીનો નિકાલ ન થતાં રોગચાળાનો ભય
વોર્ડ નં. 11ના પોશ વિસ્તાર પાણીના યોગ્ય નિકાલને અભાવે બેટ બન્યા છે. પાણીના નિકાલના અભાવે પાણીજન્ય રોગચાળો ફેલાવાની દહેશત અહીં રહેતા સ્થાનિકોમાં ફેલાઈ છે.

4 વર્ષથી રજૂઆત કરી છે પણ ધ્યાન નથી અપાયું, પાલિકાના શાસકો જ બેદરકાર
નવસારી શહેરનો વોર્ડ નં. 11 વિકાસ પામતો વિસ્તાર છે, તેના ઉપર વિશેષ ધ્યાન આપવું જોઈએ. છેલ્લા 4 વર્ષની સામાન્ય સભાથી લઈને પાલિકામાં મૌખિક તેમજ લેખિત રજૂઆત કરવામાં આવી છે. આ વોર્ડ અમારો (કોંગ્રેસ)નો વિસ્તાર હોવાને કારણે કે હાલનાં પાલિકાના શાસકોની અણઆવડતને આ પરિસ્થિતિનું નિર્માણ થયું એ પ્રશ્ને છે. - ધવલકીર્તિ દેસાઈ, નગરસેવક, વોર્ડ નં. 11