10 July 2019

શાળા પરિસરમાં ચાલતું શેલ્ટર હોમ વિવાદમાં


નવસારી લક્ષ્મી ટોકીઝ નજીક પ્રાથમિક શાળામાં શરૂ કરાયેલા શેલ્ટર હોમ સામે વિરોધ ઉઠયો છે. આ વિસ્તારના ચૂંટાયેલા કાઉન્સિલરે જ શાળામાં શેલ્ટર હોમ રાખવાનો વિરોધ કર્યો છે.

સુપ્રિમ કોર્ટની ગાઈડલાઈન મુજબ કોઈપણ વ્યક્તિ 'આશ્રયસ્થાન'વિનાનો રહેવો જોઈએ નહીં. આશ્રયસ્થાન વિનાના વ્યક્તિ માટે શહેરોમાં આશ્રયસ્થાન (શેલ્ટર હોમ) બનાવવાના દિશાનિર્દેશ અપાયા હતા. આ દિશાનિર્દેશ હેઠળ અહીંની નવસારી પાલિકાએ શહેરમાં શેલ્ટર હોમનું મકાન બનાવવાનો નિર્ણય લીધો હતો. જોકે નવુ મકાન બને તે પહેલા કામચલાઉ ધોરણે લક્ષ્મી ટોકીઝ નજીક કન્યાશાળા 4ના મકાનમાં શેલ્ટર હોમ શરૂ પણ કરી દીધુ હતું.

અહીં કન્યાશાળા 4ની સાથે મિશ્રશાળા 3ના બાળકો પણ ભણે છે અને ત્યાં કેટલાક આશ્રયસ્થાન વિનાના પણ રહે છે. જોકે શાળાના મકાનમાં શેલ્ટર હોમ શરૂ કરવા સામે આ વિસ્તારના ચૂંટાયેલા પાલિકાના મહિલા કાઉન્સિલર પ્રભાબેન વલસાડીયાએ વિરોધ કર્યો છે. મંગળવારે મળેલી પાલિકાની એક્ઝિક્યુટીવ કમિટીની બેઠકમાં પણ પ્રભાબેને જ્યાં નાના બાળકો ભણે છે ત્યાં શેલ્ટર હોમ શરૂ કરવા સામે સવાલ કરી વિરોધ દર્શાવ્યો હતો.

દશેરા ટેકરીમાં વિરોધ થયો હતો
નવસારી પાલિકાએ દશેરા ટેકરી વિસ્તારમાં શેલ્ટર હોમનું નવું મકાન બનાવવાનો નિર્ણય કર્યો હતો અને તેની જાહેરાત પણ કરી હતી. જોકે આ વિસ્તારના રહીશોએ ત્યાં શેલ્ટર હોમ બનાવવાનો ભારે વિરોધ કર્યો હતો.