11 July 2019

નવસારીમાં પીવાના પાણીની સમસ્યા હલ કરવા થાણા, સરબતિયા અને ટાટા તળાવની કાયાપલટ કરી દેવાશે


નવસારીના દુધિયા તળાવ, દેસાઈ તળાવ ઉપરાંત શહેરના અન્ય ત્રણ તળાવ સરબતિયા તળાવ, થાણા તળાવ અને ટાટા તળાવની અંદાજે 4 કરોડ રૂપિયાના ખર્ચે કાયાપલટ કરી પીવાના પાણી માટે સંગ્રહલક્ષી બનાવાશે. આ કામને પાલિકાની એક્ઝિક્યુટીવ કમિટીએ મંજૂર કરી દીધુ છે.

નવસારી શહેરની નહેર આધારિત મધુર જળ યોજનામાં ચાલુ સાલ શહેરના બે તળાવોની પાણીની સંગ્રહક્ષમતા ઓછી હોવાના કારણે ભારે મુશ્કેલી પડી હતી અને શહેરમાં પાણીકાપ 7-8 મહિનાથી મુકવામાં આવ્યોછે. પાણીની સમસ્યા હલ કરવા અગાઉ જ પાલિકાએ જલાલપોરના દેસાઈ તળાવ સાથે થાણા તળાવને, દુધિયા તળાવને સરબતિયા તળાવ અને ટાટા તળાવ સાથે જોડવાનો નિર્ણય લીધો હતો અને તેનું ટેન્ડરિંગ પણ થઈ ગયું છે.

તળાવો જોડવાનો નિર્ણય તો લીધો પરંતુ આ ત્રણ તળાવો થાણા તળાવ, સરબતિયા તળાવ અને ટાટા તળાવ (શાકમાર્કેટ નજીક)ને દુધિયા તળાવની જેમ પીવાના પાણીના સંગ્રહલાયક હાલ ન હોય તે બનાવવા જરૂરી છે. માટે તળાવોને ઉંડા કરી પીવાના પાણીના સંગ્રહલાયક બનાવવાનો નિર્ણય લીધો છે. જે માટે 4 કરોડ રૂપિયાનો ખર્ચ થશે. જેમાં ટાટા તળાવમાં 2 કરોડ, થાણા તળાવમાં દોઢ કરોડ અને સરબતિયા તળાવમાં 45 લાખનો ખર્ચ થશે. આ પ્રોજેકટનો રિપોર્ટ કન્સલ્ટન્સી સ્થપતિ ઈન્ડિયાએ આપ્યો છે. જે કામ પાલિકાની એક્ઝિક્યુટીવ કમિટીમાં મંજૂર કરવામાં આવ્યું છે.

ત્રણેય તળાવમાં લેકફ્રન્ટ પ્રોજેકટ
જે ત્રણ તળાવોની કાયાપલટ થનાર છે. એમાં ત્રણેય તળાવોમાં લેકફ્રન્ટ પ્રોજેકટ કરાયો છે. સરબતિયા અને થાણા તળાવમાં પૂર્ણ થયો છે. જ્યારે ટાટા તળાવમાં તેનું આયોજન કરાયું છે. આ તળાવો હાલ માત્ર જળસંચય, બ્યુટીફિકેશન પૂરતા જ સિમિત છે.

નહેરનું રોટેશન લંબાઈ તો પણ વાંધો ન આવશે
ડેમમાં ઓછુ પાણી હોવાના કારણે તાજેતરમાં નહેરનું પાણી ઘણાં દિવસો બાદ મળે છે જેથી પાણી યોજનાના હયાત બે તળાવોમાં પાણી ખુટી જતા મુશ્કેલી પડે છે. હવે વધુ ત્રણ તળાવો પાણી યોજના સાથે સંકળાતા નહેરનું પાણી વિલંબથી મળે તો પણ વાંધો આવશે નહીં.

સરકાર પાસે ગ્રાંટ માંગવામાં આવશે
તળાવના આ પ્રોજેકટથી ડ્રેનેજ, વરસાદનું પાણી તળાવમાં આવશે નહીં અને શહેરના પીવાના પાણી માટે ઉપયોગી બનશે. આ માટે જે ખર્ચ થનાર છે તે માટે સરકાર પાસે ગ્રાંટ માંગવામાં આવશે. સરકાર તળાવની યોજનામાં ગ્રાંટ આપે છે. પ્રેમચંદ લાલવાણી, ચેરમેન, એક્ઝિ. કમિટી, નવસારી પાલિકા

કઈ કામગીરીથી શું ફાયદો થયો
  • ત્રણેય તળાવમાં પ્લાસ્ટીક પાથરી H.D.P.E લાઈનિંગ કરાશે, જે દુધિયા તળાવમાં કરાયું હતું. 
  • અંદાજે 1થી દોઢ મીટર તળાવ ઉંડા કરાશે. 
  • પીચીંગની કામગીરી પણ થશે. 
  • તળાવને ડીવોટરીંગ કરી સુકુ કરાશે. 
  • પ્રોજેકટથી તળાવનું પાણી જમીનમાં પચશે નહીં. 
  • બહારનું પાણી અંદર આવશે નહીં અને અંદરનું પાણી બહાર જશે નહીં. 
  • આયોજન : પીવાના પાણીના સંગ્રહાલય બનાવવા પ્લાસ્ટિક પાથરવા એચડીપીઈ લાઈનિંગ કરાશે