6 July 2019

નવસારી સિવિલ હોસ્પીટલમાં માનવતા મરી પરવારી, ચાલી નહીં શકતા દર્દીને વરસાદમાં લઈ જવાયા


સિવિલ હોસ્પીટલમાં ચાલતી લાલીયાવાડી સામે આજે વધુ એક કિસ્સો સામે આવ્યો હતો. જેમાં બે દર્દીઓની સાથે તેના પરિવારજનોએ પણ ભારે પરેશાની ભોગવવી પડી હતી. જેમાં એક ઘટનામાં વ્હીલચેર પર આવેલા દર્દીને લઈ જવા છત્રી ન હોય તેને વરસતા વરસાદમાં ભીંજાતા લઈ જવાયો તો તુરંત જ ડોક્ટરને તેની કાર સુધી મૂકવા વોર્ડબોય છત્રી સાથે જતો નજરે ચઢ્યો. તો બીજી ઘટનામાં લેબરપેઇનથી પીડાતી ગર્ભવતી મહિલાને માટે સ્ટ્રેચર લાવવાનું કહેતા વોર્ડબોયે આ તેનું કામ નથી તેમ કહી ચાલતી પકડાતાં જે રીક્ષામાં આ મહિલાને લવાઈ તે રીક્ષા ચાલક તથા તેના પતિએ તેને ઓપરેશન થીયેટર સુધી લઈ જવી પડી હતી.

સરકારી હોસ્પીટલમાં ગરીબ દર્દીઓ જ આવતા હોય ડોક્ટરો તથા સ્ટાફ તેમની સાથે અમાનવીય વર્તન કરતાં હોવાની બૂમો ઉઠી છે. નવસારી સિવિલ હોસ્પીટલમાં પણ બે ઘટના આજે સામે આવી છે. પોતાને સંવેદનશીલ કહેવડાવતી સરકારના રાજમાં સિવિલ હોસ્પીટલમાં અસંવેદનશીલ ઘટના છતાં યોગ્ય પગલાં ન લેવાયાનું સામે આવ્યું છે.

સિવિલ હોસ્પીટલમાં દાખલ એક બીમાર વ્યક્તિ ચાલી શકતા ન હોય તેને વરસતા વરસાદમાં વ્હીલચેર પર ભીંજાતા લઈ જતાં દ્રશ્યો કેમેરામાં કંડારાયા હતા. તો તુરંત જ સિવિલના ડોક્ટર પોતાની કાર સુધી જવા માંગતા હોય વોર્ડબોય તેને છત્રી લઈને કાર સુધી મૂકવા જતાં જોવાયા હતા. ત્યારે પ્રશ્ન એ થાય કે ખરી છત્રીની જરૂર દર્દીને કે ડોક્ટરને છે. આ બાબતે ડોક્ટર સામે જરૂરી કાર્યવાહી કરાય તેવી માંગ પણ ઉઠવા પામી છે.

તો બીજી એક ઘટનામાં એક ગર્ભવતી મહિલાને લેબર પેઈન થતાં તે તુરંત રીક્ષામાં સિવિલ હોસ્પીટલમાં તેના પતિ સાથે આવે છે. સિવિલના ઇન્ડોર વિભાગના દરવાજા પાસે રીક્ષા ઊભી રાખી તેના પતિએ તુરંત વ્હીલચેર લાવવાનું ત્યાં હાજર વોર્ડબોયને કહેતા તેમણે આ તેનું કામ નથી તેવો નફ્ફટભર્યો જવાબ આપીને ચાલતી પકડી હતી. મહિલાની હાલત જોઈ રીક્ષા ચાલકને દયા આવતા તેણે તથા હોસ્પિટલના વોચમેન કે જેનું કામ નથી છતાં મદદ કરી સ્ટ્રેચર લાવી મહિલાને ઓપરેશન થીયેટર સુધી લઈ ગયા હતા.

સિવિલ હોસ્પીટલમાં છત્રી ન હોય દર્દીને ભીંજાતા જ લઈ જવા પડે: ઈ.આરએમઓ
આ બાબતે સિવિલ હોસ્પિટલના ઈ.આરએમઓ ડો. પટેલને પૂછાતા તેમણે સિવિલમાં સરકાર છત્રી આપતી નથી તેવો મોઘમ જવાબ આપ્યો હતો. અમારી પાસે છત્રી નથી તેથી દર્દીને આજ રીતે લઈ જવી પડે છે. તેમ કહેતા તમારા જવા માટે વોર્ડબોય છત્રી લઈને કેમ દોડયા તેમ પૂછાતા જ વાતને કાપી કાઢી હતી. તો વોર્ડબોય બાબતે તપાસ કરી પગલાં લેવાનું પણ કહ્યું હતું.

મહિલાને લેબરપેઇન વધી જતાં 108ની રાહ ન જોઈ રીક્ષામાં લાવ્યા હતા
નવસારીના રીક્ષા ચાલકે જણાવ્યુ કે મહિલાને લેબરપેઇન વધી જતાં 108ની રાહ જોઈ ન હતી અને મારી રીક્ષામાં જેમતેમ કરી વિજલપોરનું ગરનાળું પસાર કરી લઈ આવ્યો હતો. જો કે વોર્ડબોયે આ તેનું કામ નથી તેમ કહી જતાં રહેતા રીક્ષા ચાલકે સ્ટ્રેચર લાવી મહિલાને ત્રીજા માળે પહોચાડી હતી.

જવાબદારો સામે કડક પગલાં લેવાની ખાત્રી આપતા ધારાસભ્ય પિયુષ દેસાઈ
આ બાબતે નવસારીના ધારાસભ્ય પિયુષ દેસાઈએ આ અમાનવીય કૃત્યને વખોડીને જવાબદારો સામે કડક પગલાં લેવાની ખાત્રી આપી હતી. તેમણે સિવિલની બંને બીલ્ડીંગો વચ્ચે શેડ બનાવવાની વાતો પણ કરી જેથી દર્દીઓ વરસાદમાં ભીંજાય નહી.