8 July 2019

જલાલપોરમાં ભર બપોરે બંધ ઘરમાંથી 5 લાખની મતાની ચોરી


નવસારીમાં ચોરીની ઘટના સતત બની રહી છે. જલાલપોર વિસ્તારમાં આજે રવિવારે સવારે ગૌરી શંકર મહોલ્લા ખાતે રહેતું મિસ્ત્રી દંપતી સામાજિક કામ અર્થે બહાર ગયો હતો. આ તકનો લાભ લઈને અજાણ્યા તસ્કરોએ ઘરના પાછળના દરવાજાની સ્ટોપર કોઈ સાધન વડે તોડીને ઘરમાં પ્રવેશીને રૂ. 2.5 લાખના સોનાના દાગીના અને રૂ. 2.50 લાખ રોકડા મળી કુલ રૂ. 5 લાખની મતાની ચોરી કરી ગયા હતા.

જલાલપોરના ગૌરીશંકર મહોલ્લા ખાતે શાકમાર્કેટ પાસે નટવરલાલ પ્રભુભાઈ મિસ્ત્રી પત્ની સાથે રહે છે. તેમનો એક પુત્ર બરોડા અને એક વિદેશ રહે છે. તેઓ લેથ મશીનનું કારખાનું ધરાવે છે. આજે રવિવારે તેઓ સવારે 7 વાગ્યે વલસાડ ખાતે સામાજિક પ્રસંગ હોય પતિ-પત્ની ગયા હતા. જ્યાંથી તેઓ પ્રસંગ પતાવીને સાંજે 6.45 વાગ્યાનાં અરસામાં તેઓ ઘરે આવ્યા હતા.

તેમણે ઘરનું તાળું ખોલ્યું હતું પરંતુ દરવાજો અંદરથી બંધ હોય તેઓએ પડોશીઓને જાણ કરી હતી. તેમણે પડોશીઓની મદદથી ઘરનો દરવાજો તોડીને જોતા ઘરનો પાછળનો દરવાજો ખુલ્લો હતો અને ઘરમાં તપાસ કરતા કબાટ તૂટેલી હાલતમાં જોયા હતા. તેમણે કબાટમા તપાસ કરતા સોનાના દાગીના કિંમત રૂ. 2.50 લાખ તેમજ ઘરના રીપેરિંગ માટે લાવેલા રૂ. 2.50 લાખ રોકડા પણ ગાયબ હતા. તેમણે તુરંત જલાલપોર પોલીસ મથકમાં તેમના ઘરે ચોરી થઈ હોવાની જાણ કરી હતી. જેથી પોલીસે ઘટનાસ્થળે પહોંચી તપાસ હાથ ધરી હતી.

આ વિસ્તારમાં અગાઉ પણ ચોરીની ચાર ઘટના
જલાલપોરમાં આ જ વિસ્તારમાં અગાઉ પણ ભર બપોરે ચાર ચોરીની ઘટના બની હતી. આ તમામ ચોરીની મોડસ ઓપરેન્ડી એકસરખી જ છે. ચોરી કરતા પહેલા દરવાજો અંદરથી બંધ કરી દે છે અને ઘરની લાઈટ ચાલુ કરીને બિન્દાસ્ત ચોરીને અંજામ આપે છે.

તસ્કરો બંધ ઘરમાંથી શું શું ચોરી ગયા?
મિસ્ત્રી પરિવારના ઘરમાંથી તસ્કરો સોનાનાં બે સેટ, સોનાની બંગડી (2 નંગ), 1 નંગ સોનાની ચેન, 3 નંગ વીટી મળી કુલ રૂ. 2.50 લાખના દાગીના અને રૂ. 2.50 લાખ રોકડા ચોરી ગયા હતા.

કેવી રીતે ચોરી કરવામાં આવી?
જલાલપોર ખાતે થયેલી ચોરીમાં તસ્કરોએ ઘરના પાછળના ભાગે આવેલી દિવાલથી પ્રવેશ કરીને પાછળનો દરવાજો તોડવાની કોશિશ કરી હતી પરંતુ દરવાજો તૂટ્યો ન હતો. તસ્કરોએ બાગના કામ માટે મુકેલી કોદાળી વડે સ્ટોપર ખોલીને પ્રવેશ કર્યો હતો.