9 July 2019

વિજલપોર રેલવે ઓવરબ્રિજ માટે હજી જમીન સંપાદિત થઇ નથી ત્યાં ટેન્ડર નીકળી પણ ગયું!


વિજલપોરના રેલવે ઓવરબ્રિજમાં હજુ જમીન સંપાદનની પ્રક્રિયા આગળ ધપાવાઈ નથી ત્યાં ઓવરબ્રિજના કામ માટેનું ટેન્ડર નીકળી ગયું છે. વિજલપોર રેલવે ફાટક ઉપરથી ઓવરબ્રિજ બનાવવાની વાતોા 8-10 વર્ષથી ચાલે છે. છતાં આજદિન સુધી બ્રિજનું કામ શરૂ થયું નથી. હાલ જ્યારે રેલવે ફાટક ઉપર ટ્રાફિકની સમસ્યા વધી છે ત્યારે રેલવે ઓ‌વરબ્રિજ બનાવવાની માગ પ્રબળ બની છે.

દરમિયાન રેલવે ઓવરબ્રિજના કામ માટેના ટેન્ડરો નીકળી ગયાની જાણકારી મળી છે. મહેસાણાની એક પાર્ટીના સૌથી નીચા ભાવ રૂ. 40.08 કરોડ (7.55 ટકા ઉંચા) હોવાની પણ આધારભૂત જાણકારી મળી છે. અહીં ઉલ્લેખનીય છે કે વિજલપોરના રેલવે ઓવરબ્રિજ માટે વધુ જમીન સંપાદન કરવી પડી એમ છે. આ સંપાદનની કામગીરી હજુ પ્રાથમિક કક્ષાએ જ છે અને નક્કર કામગીરી શરૂ થઈ નથી. આમ છતાં સરકારે ઓ‌વરબ્રિજ માટે ટેન્ડરિંગની પ્રક્રિયા પણ શરૂ કરી દીધી છે.

પશ્ચિમે કામ શરૂ કરી દેવાશે?
વિજલપોરના રેલવે ઓવરબ્રિજ માટે હજુ જમીન સંપાદન કરાઈ નથી ત્યાં બ્રિજનું કામ શરૂ કરવાનો સરકારે ઈરાદો જાહેર કરી દીધો છે. આ અંગે મળતી માહિતી મુજબ મહત્તમ સંપાદન પૂર્વ વિભાગમાં જ કરવું પડશે, પશ્ચિમ ભાગે તો ખૂબ ઓછુ સંપાદન છે. આ સ્થિતિમાં શક્ય છે કે તંત્ર પશ્ચિમ વિભાગે બ્રિજનું કામ શરૂ કરી શકે છે.

ટેન્ડર 'એપ્રુવલ'માં છે
રેલવે ઓવરબ્રિજના ટેન્ડર નીકળી ગયા છે એ વાત સાચી છે પરંતુ હજુ 'એપ્રુવલ' માં છે. ઉપરના લેવલેથી કામગીરી થઈ રહી છે. જમીન સંપાદનની કામગીરી પણ સાથોસાથ જ ચાલશે. - ધર્માબેન ભટ્ટ, નાયબ કાર્યપાલક ઈજનેર, નેશનલ હાઈવે (પેટા ‌વિભાગ)

કામ જલદીથી શરૂ કરાય એ જરૂરી
રેલવે ઓવરબ્રિજ માટે જમીન સંપાદનનું કામ જલદીથી પૂર્ણ કરાય અને બ્રિજનું કામ જલદીથી શરૂ કરાય તે બાબતની રજૂઆત અમે સંબંધિત વિભાગમાં કરનાર છે. આ કામ વિજલપોરની ટ્રાફિક સમસ્યા હળવી કરવા ખૂબ જ જરૂરી છે. - જગદીશ મોદી, પ્રમુખ, વિજલપોર પાલિકા