4 July 2019

નવસારીના એપાર્ટમેન્ટમાં વોશિંગ મશીનમાં ધડાકો, ફાયર સેફ્ટીનો કરેલો સર્વે ફક્ત દેખાવ!


બુધવારે બપોરે આશાનગરના એક એપાર્ટમેન્ટના ૧૧મા માળે આવેલા ફ્લેટમાં અચાનક વોશીંગ મશીન ફાટવાનો બનાવ બન્યો હતો. મશીન ફાટતા આગ ફાટી નીકળી હતી. જેના કારણે એપાર્ટમેન્ટના રહીશો નીચે ઉતરી આવ્યા હતા. પાલિકાના ફાયર ફાયટરોએ ઘટના સ્થળે દોડી આવી આગને કાબુમાં લીધી હતી. આ ઘટનામાં સદનસીબે જાનહાનિ ટળી હતી. ઉલ્લેખનીય છે કે, એપાર્ટમેન્ટમાં ફાયર સિસ્ટમ હોવા છતાં તે કામ કરતી ન હોવાથી આગને કાબુમાં લેવા માટે રહીશોએ પાલિકાની ફાયરની ટીમને બોલાવી પડી હતી.

આશાનગરના સનસાઇન એપાર્ટમેન્ટના ૧૧માં માળે હિરાક ભરતભાઇ ભરૂચાના ઘરે બુધવારે બપોરે વોશીંગ મશીન ફાટતા આગ લાગી હતી. જેના પગલે ઘરના સદસ્યો સહિત એપાર્ટમેન્ટના તમામ રહીશો નીચે ઉતરી આવ્યા હતા. આગ લાગતા જ  એપાર્ટમેન્ટના રહીશોએ પાવર સપ્લાય બંધ કરી દેતા મોટી હોનારત સર્જાઇ ન હતી.

ઘટનાને પગલે નવસારી પાલિકાના પ્રમુખ અને ચીફ એન્જીનીયર રાજુ ગુપ્તા સાથે જીઇબીના કર્મચારીઓ પણ પહોચી ગયા હતા. અને સમગ્ર ઘટનાનો તાગ મેળવ્યો હતો. જ્યાં સનસાઇન એપાર્ટમેન્ટમાં ફાયર સિસ્ટમ નકામી હોવાનું સામે આવ્યુ હતુ. સાથે તે એપાર્ટમેન્ટના વાયરો પણ ખુલ્લા મુક્યા હોવાનું નજરે પડ્યું હતું.

ફાયર સેફ્ટીનો કરેલો સર્વે ફક્ત દેખાવ!
સુરતના તક્ષશીલા અગ્નિકાંડમાં ૨૦થી વધુ બાળકોએ જીવ ગુમાવ્યો હોવાની ઘટના બાદ નવસારી પાલિકાએ શહેરમાં ફાયર સેફ્ટી અંગે સર્વે કર્યો હતો. જ્યાં ફાયર સેફ્ટીની સુવિધા ન હોય ત્યાં પાલિકાએ નોટીસ આપી હતી. પરંતુ આશાનગરના સનસાઇન એપાર્ટમેન્ટમાં ફાયર સેફ્ટી સુવિધા હોવા છતાં તે કાર્યરત ન થતા ૧૧માં માળે વોશીંગ મશીન ફાટતા લાગેલી આગ પર કાબુ મેળવવા માટે નવસારી ફાયર ફાયટરને બોલાવી પડી હતી. ત્યારે નવસારી પાલિકાએ શહેરમાં ફાયર સેફ્ટીનો સર્વે કર્યો હતો તે શું ફ્કત દેખાવ હતો?

જનરેટર રૂમની બાજુમાં આઠ રાંધણ ગેસના સિલિન્ડર મળ્યા!
આ ઘટના બાદ ફાયરની ટીમે એપાર્ટમેન્ટમાં તપાસ કરતા એપાર્ટમેન્ટની નીચે આવેલા જનરેટર રૂમની બાજુમાંથી આઠ રાંધણ ગેસના સિલિન્ડર મળી આવ્યા હતા. જેને ત્યાંથી હટાવી લેવા માટે જણાવ્યું હતું. પરંતુ આ રાંધણ ગેસના સિલિન્ડર કોના હતા, શા માટે ત્યાં મુક્યા હતા તેની તપાસ ફાયર વિભાગે કરી ન હતી.