10 July 2019

કાલીયાવાડી કોળીવાડમાં વરસાદી પાણીના નિકાલની જગ્યાએ પુરાણ


નવસારીના અડીને આવેલા કાલીયાવાડીના કોળીવાડ ખાતે રહેતા 8 પરિવારોના ઘરનાં વાડામાંથી વરસાદી પાણીનો નિકાલ થતો હતો. એ જગ્યા ઉપર જમીન માલિકે દિવાલ બનાવી પુરાણ કરી દીધું હતું, જેને પગલે છેલ્લા 7 વર્ષથી કેટલાક પરિવારના ઘરમાં વરસાદી પાણી ભરાઈ જાય છે.

કાલીયાવાડી કોળીવાડ ખાતે 8 પરિવાર રહે છે. તેમના ઘરની પાછળ આવેલા વાડામાંથી વરસાદી પાણી જવા માટેનો રસ્તો હતો. આ જમીનનું વેચાણ થતા જમીનનાં માલિકે 2012માં દિવાલ બાંધી પુરાણ કરી દીધું હતું. જેને કારણે વરસાદી પાણી નિકાલનો રસ્તો બંધ થયો હતો, જેના કારણે પરિવારોએ વાડાના ભાગમાં પુરાણ કરી દીધું હતું. જેથી ઈશ્વરભાઈ પટેલ અને રમીલાબેન પટેલના ઘરના વાડામાં વરસાદી પાણી ભરાય છે. વરસાદી પાણીનો ભરાવો થતા તેમણે બાથરૂમ અને શૌચાલયને ઘરનાં આગળનાં ભાગમાં ખસેડવાની ફરજ પડી છે. ચોમાસામાં ભારે વરસાદ પડતા ઘરની અંદર પાણી ભરાઈ છે.

ઘરમાં સાપ આવી જાય છે
વાડામાં પાણી ભરાવાથી અમારે બાથરૂમ અને શૌચાલય પુરાણ કરીને ઊંચા કરવા પડ્યા છે. પાણી ભરાવાથી ઘરમાં સાપ પણ આવી ગયો હતો. આ પાણીનો નિકાલ કરવા માટે ગ્રા.પં. યોગ્ય કરે તે જરૂરી બન્યું છે.  રમીલાબેન પટેલ, અસરગ્રસ્ત, કાલીયાવાડી-કોળીવાડ

7 વર્ષથી વરસાદી પાણીનો ભરાવો
અમારા વાડાનું પાણી નિકાલવાળી જગ્યાએ ખાનગી જમીન માલિકે દિવાલ બાંધી દેતા અમારા ઘરના વાડામાં વરસાદી પાણીનો ભરાવો 7 વર્ષથી થઇ રહ્યો છે. વધુ વરસાદ પડતા પાણી ઘરમાં આવી જાય છે. અમારે શૌચાલય વાડામાંથી ખસેડીને ઘરના આંગણામાં બાંધવું પડ્યું છે. - ઈશ્વર પટેલ, અસરગ્રસ્ત

અંત લાવવા પ્રયાસ કરીશું
અમને આ મુશ્કેલીની જાણ છે. અમો ઘરમાલિકને જણાવ્યું કે ઘરમાંથી પાઈપલાઈન નાંખીને આ વરસાદી પાણીની લાઈનને ગટરમાં જોડાણ આપી દઈએ. તેઓ આ વાત સમજતા નથી. જમીનના માલિકે દિવાલ બાંધતા તેને પણ જણાવ્યું છે. જરૂરી કાર્યવાહી હાથ ધરીને મુશ્કેલીનો અંત લાવવા પ્રયાસ કરીશું. - પરેશ પટેલ, પૂર્વ સરપંચ-હાલના સરપંચપતિ, કાલીયાવાડી