જિલ્લામાં દરિયા કાંઠે આવેલા 39 ગામના લોકોને જિલ્લા વહીવટી તંત્ર દ્વારા આગામી દિવસોમાં આવનાર નિસર્ગ વાવાઝોડુંને  ધ્યાનમાં રાખી એલર્ટ કરી દેવામાં આવ્યા છે.આ વવાઝોડુંથી પ્રતિ  કલાક 90 થી 100 કિલોમીટરની ઝડપે પવન સાથે ભારે વરસાદની  આગાહી પણ કરવામાં આવી છે.જિલ્લામાં પરિસ્થિતિને પહોંચી વળવા NDRFની ટિમ પણ તૈનાત કરવામાં આવી છે.

નવસારી જિલ્લાની 52 કિલોમીટરનો દરિયા કાંઠો લાગે છે.ભારતીય હવામાન વિભાગ તરફથી 2થી 4 જૂન દરમિયાન અરબ સમુદ્રમાં સર્જાયેલા ડિપ્રેશનને પગલે નવસારીના દરિયાકાંઠા વિસ્તારમાં નિસર્ગ વાવાઝોડુંનો ખતરો તોળાઈ રહ્યો છે. જેને પગલે નવસારી જિલ્લા વહીવટીતંત્ર સાબદુ બન્યું છે. નવસારી જિલ્લા આવેલા ગણદેવી તાલુકાના 24 અને જલાલપોર તાલુકાના 15 ગામના લોકોને એલર્ટ કરી દેવામાં આવ્યા છે.

આગામી 3 જૂનથી 4 જૂન સમય દરમિયાન નિસર્ગ વાવાઝોડું કાંઠે ત્રાટકે તેવી શકયતા છે.દરિયા કાંઠાના ગામોમાં રહેતા લોકોને વાવાઝોડુંની ગંભીરતા સમજી તંત્ર દ્વારા આપવામાં આવતી સૂચનાનું પાલન કરવા તાકીદ કરાઈ છે.વાવાઝોડું ત્રાટકે તે પહેલાં લોકોને રહેઠાણની મજબૂતીની ખાતરી કરી લેવા અને જો કોઈ ક્ષતિ હોય તો તે દૂર કરી લેવા, તેમજ સમાચાર અને ચેતવણીઓ સતત સાંભળતા રહેવા, રડીયો સેટ ચાલુ રાખવા, સ્થાનિક અધિકારીઓના સંપર્કમાં રહેવા, ઢોર ઢાંખર ને ખૂટથી  છુટા રાખવા,માછીમારોને દરિયામાં નહીં જવા તાકીદ કરાઈ છે. ઉપરાંત બોટ સલામત સ્થળે લાંગરવા, અગિયારાઓને સલામત સ્થળે ખસી જવા,આશ્રય લઈ શકાય તેવા ઉંચા સ્થળ ધ્યાને રાખવા અને અગત્યના ટેલિફોન નંબર હાથવગા રાખવા અનુરોધ કરાયો છે.

જલાલપોર-ગણદેવીના  આ ગામો સચેત રહે
જલાલપોર તાલુકાના દાંતી, ઉભરાટ, દીપલા, વાસી, બોરસી માછીવાડ, દાંડી, સામાપોર, કરાડી-મટવાડ, ઓન્જલ માછીવાડ, કૃષ્ણપુર, ચીજગામ, પનાર, કણીયાટ, ચોરમલા ભાઠા, કનેરા, કલમઠા છાપર, મોરલી ગામને વાવાઝોડુંને લઈ એલર્ટ કરાયા છે. ગણદેવીના ધોલાઈ, બીગરી, પોંસરી, મેંધર, ભાટ, દેવધા, છાપર, ભાઠા, કલમઠા, વાઘરેચ, ગોયંદી -ભાઠલા, વણગામ, ખાપરવાડા, તોરણગામ, માસા, મોવાસા, મોરલી, માછીયાવાસણ, વાડી, ભાગડ, કોથા, સરીબુજરંગ, સરીખુર્દ, વાસણ.

પરિસ્થિતિને પહોંચી વળવા તંત્ર સજ્જ
નિસર્ગ વવાઝોડુંને પહોંચી વળવા તંત્ર દ્વારા તમામ તૈયારીઓ કરી લેવામાં આવી છે.90 થી 100 કિમી પ્રતિ કલાકની ઝડપે પવનની સાથે ભારે વરસાદ પડવાની સંભાવના છે.જેને લઇ જે કાંઠાના ગામોને અસર થવાની છે તમામ ગામના લોકોને સુચના આપી દેવાઈ છે.સાથે જેતે ગામના લોકોની દેખરેખ માટે અને સ્થિતિ અંગે જાણકારી મળતી રહે તે માટે લાયઝનિંગ ઓફિસરની નિમણૂંક પણ આપી દેવામાં આવી છે. - આદ્રા અગ્રવાલ, જિલ્લા કલેકટર, નવસારી.

વાવાઝોડાથી બચવા નવસારીના દરિયા કાંઠે 39 ગામમાં એલર્ટ


નવસારીમાં પ્રથમ લોકડાઉનથી લઈ ને ચોથા લોકડાઉન દરમ્યાન પોસ્ટ ઓફીસ દ્વારા લોકોને નાણા ની અછત ન પડે તે માટે પોસ્ટકર્મી અને ટપાલ વિભાગના કર્મીઓ દ્વારા ઘરે ઘરે જઈ ને ગ્રાહકો અને વિધવા બહેનો ને કુલ્લે રૂ.12.73 કરોડ રોકડા પહોચાડીને સેવા આપવાની કામગીરી કરતા નવસારી પોસ્ટ ઓફીસ ગુજરાત સર્કલમાં પ્રથમ ક્રમે આવતા નવસારી જિલ્લામાં આનદની લાગણી પ્રસરી ગઈ છે.

હાલની COVID-19 કોરોના વાયરસની વૈશ્વિક મહામારીના પગલે દેશવ્યાપી લોક્ડાઉનમાં પ્રજાજનોને જરૂરિયાત મુજબ નાણાની ચુકવણી મેળવવા ઘણી હાલાકીનો સામનો ન કરવો પડે તેના માટે ભારતીય ટપાલ ખાતા અંતર્ગત નવસારી ટપાલ વિભાગે AEPS(આધાર એનેબલ્ડ પેમેન્ટ સિસ્ટમ) શરુ કરવામાં આવી હતી. નવસારી ટપાલ વિભાગના પોસ્ટમેન/બીપીએમ/જીડીએસ દ્વારા પ્રજાજનો ને લોકડાઉન -૧ થી ૪ દરમ્યાન કુલ રૂ.47267476/-નું ચુકવણું જરૂરિયાતમંદો ને ઘેર બેઠા કરવામાં આવેલ છે. નવસારી ડીવીઝનમાં લોકડાઉન સમય દરમ્યાન કુલ્લે 30646 વિધવા બહેનોને રૂ. 8,01,26020 નું ચુકવણું તેમના ઘરે જ કરવામાં આવેલ છે.

અન્ય સેવામાં લોકડાઉન દરમ્યાન દવાનાં પાર્સલોની સુવિધા પ્રાથમિકતાના ધોરણે પોસ્ટ ઓફીસ દ્વારા પૂરી પાડવામાં આવેલ છે. તા.22 મેથી નવસારી વિભાગના તાબા હેઠળની તમામ પોસ્ટ ઓફિસો COVID-19 અંતર્ગત સાવચેતીરૂપ પગલા લઇ તેમજ યોગ્ય સામાજિક અંતર જાળવવાની માર્ગદર્શિકા મુજબ સંપૂર્ણપણે કાર્યરત કરવામાં આવેલ છે. પોસ્ટ ઓફીસમાં આવતા દરેક ગ્રાહકોને કોઈ પણ પ્રકાર ની હાલાકીનો સામનો ન કરવો પડે તે માટે પુરતી કાળજી રાખી સામાજિક અંતર રાખી કતારની વ્યવસ્થા રાખવામાં છે. જેને લઈને નવસારી ડીવીઝને ગુજરાત સર્કલમાં ટોચનું સ્થાન પ્રાપ્ત કર્યું છે.અને ટપાલ સેવા હજુ પણ કાર્યરત જ છે.

બિનજરૂરી સંપર્ક ટાળી સેવા માટે સંપર્ક કરો
લોકડાઉન ના નિયમો નું પાલન કરી, જો શક્ય હોય તો, પોસ્ટ ના નાણાકીય વ્યવહાર ઘેર બેઠા પણ કરી શકો છો. જેથી પોસ્ટ ઓફીસમાં બિનજરૂરી ભીડ ને ટાળી શકાય.પોસ્ટ વિભાગની AEPS સેવાનો લાભ લેવા માટે પ્રણય રસ્તોગી-7746027026 અને નિરંજન ભક્તા- 9833703268 નો સપર્ક કરવો.

નવસારીની પ્રજાએ પૂરતો સહકાર આપતા ગુજરાત વિભાગમાં પ્રથમ ક્રમ મળ્યો છે
નવસારી પોસ્ટ વિભાગ દ્વારા સીનીયર સિટીજન અને ગંગા સ્વરૂપ બહેનોને નાણાની તંગી ન પડે તે માટે અમારા વિભાગનાં પોસ્ટકર્મીઓ તેમના ઘરે જઈને કુલ્લે રૂ.12.73 કરોડ જેટલી રકમ પહોચાડી છે .અમે નવસારીનાં લોકોની સેવા કરવામાં ગુજરાતમાં અવ્વલ રહ્યા છે. આં સેવા સતત ચાલુ જ રહી છે. - ગૌતમ આર.ભાનાણી, સીનીયર.સુપ્રિ.ઓફ પોસ્ટ, નવસારી

લોકડાઉનમાં પોસ્ટ સેવા, રાજ્યમાં નવસારી નંબર-1


નવસારીના રાયચંદ રોડ ખાતે 43 વર્ષ ની પરણીતા તેના પતિ અને પરિવાર સાથે રહે છે. તેણીને 6 માસ પહેલા પેટમાં દુખાવો થયો હતો. અને તેમણે ઘણા તબીબોને બતાવ્યું હતું સારવાર પણ લીધી હતી. પણ તે સારું ન થયું હતું, આ પરણીતાએ બે દિવસ પહેલા કબીલપોર ખાતે આવેલ કેજલ લાઈફ ઇન હોસ્પિટલમાં ફરજ બજવતા ગાયકોનોલોજીસ્ટ ડો.રજનીકાન્ત વાઘેલા પાસે તપાસ કરાવી હતી. 

આ બાબતે તબીબે તેણીનું ચેકઅપ અને સીટી સ્કેન કરાવ્યું હતું જેમાં મહિલાનાં પેટમાં ગર્ભાશય બાજુ ગાંઠ હોવાનું જાણ થઈ હતી, અને કદાચ જીવલેણ રોગની ગાંઠ હોય તેમ શક્યતા જતા આજે 25 મે સોમવારનાં રોજ ડો.રજનીકાંત વાઘેલાની ટીમેં સવારે ઓપરેશન કર્યું અને દોઢ કલાકની સર્જરી બાદ મહિલાનાં પેટમાંથી ગાંઠ સફળતા પૂર્વક કાઢવામાં આવી હતી અને તેનું વજન કરતા આઠ કિગ્રા જેટલું વજન થયુ હતું. નવસારીમાં સર્જરીની પહેલી આવી ઘટના છે.

બે દિવસમાં દર્દી સ્વસ્થ અને સુરક્ષિત
રાયચંદ રોડ ખાતે રહેતી મહિલા બે દિવસ પહેલા અમારા હોસ્પિટલમાં આવી અને તેમણે પેટમાં દુખાવાની ફરિયાદ કરી. તેનું સીટી સ્કેન અને સોનોગ્રાફી કરાવતા અંડાશયમાં 25 x 12 સેમી ની સ્ક્વેર સાઈજની ગાંઠ જોવા મળી. સોમવારે ગાંઠ કાઢવાનું ઓપરેશન થયું દોઢ કલાક સર્જરી કરી,આઠ કિગ્રાની ગાંઠ નીકળી ઉપરાંત ગર્ભાશયની બન્ને બાજુની અલી અને અંડાશય પણ કાઢવામાં આવ્યા છે. ગાંઠને અમુક રોગો છે કે કેમ! તે માટે પેથોલોજી લેબમાં મોકલી છે ત્યાર બાદ રીપોર્ટ આવ્યા બાદ આગળની સારવાર થશે. - ડો.રજનીકાંત વાઘેલા,ગાયનેકોલોજિસ્ટ, કેજલ લાઈફ ઇન, કબીલપોર

નવસારીમાં દર્દીના પેટમાંથી 8 કિગ્રાની ગાંઠ કાઢવાની પ્રથમ ઘટના


મિસ્ટર ઇન્ડિયા સ્પર્ધા 2019 માં ફર્સ્ટ રનર્સઅપ થયેલા જલાલપોર તાલુકાના સુલતાનપુર ગામના યુવાન ઉપર ન્યુઝીલેન્ડમાં બનેલી મિસ્ટર ઇન્ડિયા નામની ડોક્યુમેન્ટરી ફિલ્મને ભારતના પશ્ચિમ બંગાળની ટાગોર આંતરરાષ્ટ્રીય ફિલ્મ ફેસ્ટિવલમાં શ્રેષ્ઠ ડોક્યુમેન્ટરી એવોર્ડ પ્રાપ્ત થયો હતો. સુલતાનપુર ગામના બોરી ફળીયાના વતની અને બારેક વર્ષ અગાઉ ન્યુઝીલેન્ડમાં સ્થાયી થયેલા પ્રતિક પટેલ નામના 31 વર્ષીય યુવાને 2019 માં દિલ્હીમાં યોજાયેલી મિસ્ટર ઇન્ડિયા સ્પર્ધામાં ભાગ લઇ ફર્સ્ટ રનર્સઅપનો ખિતાબ જીત્યો હતો. પ્રતિક પટેલે મેળવેલી આ ગૌરવપદ સિદ્ધિથી પ્રભાવિત થઇ ન્યુઝીલેન્ડની ફિલ્મ મેકર સ્ટોનહેજ ફિલ્મ કંપનીએ પ્રતિક પટેલની મિસ્ટર ઇન્ડિયા નામની ડોક્યુમેન્ટરી ફિલ્મ બનાવી હતી.

જેના ડાયરેકટર જેમ્સ ફેન્ક જેનસેન હતા. આ ડોક્યુમેન્ટરી વિશ્વના 27 દેશોમાં રજૂ કરવામાં આવી હતી. હાલ આ ડોકયુમેન્ટરીનું અમેરિકાના ન્યૂજર્સી શોર ફિલ્મ ફેસ્ટવલ તથા ઇગ્લેન્ડના લંડન સ્થિત ન્યૂ ઇન્ડિ ફિલ્મ ફેસ્ટીવલ તેમજ ભારતના વેસ્ટ બંગાળના ટાગોર આંતરરાષ્ટ્રીય ફિલ્મ ફેસ્ટીવલ જેવા 3 દેશોમાં સિલેકશન થઇ ચૂકયું છે. તે પૈકીના ટાગોર આંતરરાષ્ટ્રીય ફિલ્મ ફેસ્ટીવલ તરફથી તાજેતરમાં જ શ્રેષ્ઠ ડોક્યુમેન્ટરી એવોર્ડ પણ પ્રાપ્ત થયો છે. આ ડોક્યુમેન્ટરીમાં પ્રતિક પટેલ સાથે બોલીવુડ અભિનેતા અરબાઝખાન, ન્યૂઝીલેન્ડના અભિનેતા પીટર ફેની તથા આંતરરાષ્ટ્રીય અભિનેતા કમ મોડેલ કોલીન મથુરા જેફરી જેવા અન્ય ત્રણ ફિલ્મસ્ટાર પણ સામેલ હતા.

આ ડોકયુમેન્ટરી અંગ્રેજી ભાષામાં રજૂ થઇ હતી પરંતુ તેમાં ગુજરાતી અને હિન્દી ભાષાનો પણ સમાવેશ કરવામાં આવ્યો હતો. પ્રતિક પટેલની આ મિસ્ટર ઇન્ડિયા નામની ડોક્યુમેન્ટરી ફિલ્મ વિશ્વના 27 દેશોમાં ભારતનું નામ રોશન કરી રહી છે. જોકે હાલ લોકડાઉન કારણે અન્ય દેશોમાં તેના પરિણામો જાહેર થઇ શકયા નથી, તેમ છતાં બાકીના દેશોમાં પણ આ ડોકયુમેન્ટરી ફિલ્મ એવોર્ડ પ્રાપ્ત કરશે તેવી આશા પ્રતિક પટેલે વ્યકત કરી હતી. નવસારી જિલ્લાના સુલતાનપુરના પ્રતિક પટેલની આ સિદ્ધિથી સમગ્ર નવસારી જિલ્લાએ ગૌરવની લાગણી અનુભવી છે. માત્ર ભારત જ નહીં 27 દેશમાં દર્શાવાયેલી ડોક્યુમેન્ટરીને શ્રેષ્ઠ ડોક્યુમેન્ટરી એવોર્ડ મળતા ઉભરતા કલાકારો માટે પ્રેરણારૂપ બન્યો છે. 

ફિલ્મની તૈયારી માટે સઘન તાલીમ લીધી
મિસ્ટર ઇન્ડિયા ડોકયુમેન્ટરી ફિલ્મની તૈયારીના ભાગરૂપે ડાન્સ, ફેશન કેટવોક, તંદુરસ્તીની તાલીમ, એક પાત્રીય નાટક, સવાલ-જવાબ, જાહેરમાં બોલવુ તેમજ અલગ-અલગ ભાષા બોલવા જેવી અનેક પ્રકારની તાલીમ લીધી હતી. તરાના ઇન્ડિયન રેડિયો ઉપર બે વખત ઇન્ટરવ્યુ પણ આપ્યા હતા. હવે પછીનું મારૂ આગળનું લક્ષ્ય બોલીવુડ તથા હોલીવુડની ફિલ્મોમાં કામ કરવાનું છે. - પ્રતિક પટેલ, મિ.ઇન્ડિયા ડોકયુમેન્ટરી ફિલ્મના અભિનેતા

નવસારીના યુવાન પર બનેલી ડોક્યુમેન્ટરીને ટાગોર આંતરરાષ્ટ્રીય ફિલ્મ ફેસ્ટીવલમાં શ્રેષ્ઠ એવોર્ડ


સંકટ દરમિયાન શરીરને સ્વસ્થ્ય બનાવી રાખવા વ્યક્તિની પોતાની રોગ પ્રતિકારક શક્તિ મજબૂત હોવી જરૂરી છે. ઘરે હાજર સામાન્ય ખાદ્ય પદાર્થો દ્વારા પણ રોગ પ્રતિકારક શક્તિ વધારી શકાય છે. કેન્દ્ર સરકારના આયુષ વિભાગ મંત્રાલયે દેશના વિભિન્ન 16 વૈધોની સલાહના આધારે સ્વાસ્થ્ય માટેની એડવાઇઝરી જાહેર કરી છે.

પ્રશાસન અને સ્વાસ્થ્ય વિભાગે પણ સરકારની જાહેર કરેલી એડવાઇઝરીનું પાલન કરવાનું નાગરિકોને જણાવ્યું છે. નવસારીના કાલિયાવાડી સ્થિત આયુર્વેદિક હોસ્પિટલમાં ફરજ બજાવતા ડોક્ટર ઉર્વીબેન પટેલે જણાવ્યું કે, કેન્દ્રના આયુષ મંત્રાલયની એડવાઇઝરીમાં જે પદાર્થોની સેવનની સલાહ આપવામાં આવી છે તે ઐષધીય ગુણોથી ભરપુર છે.

આ પદાર્થોના કારણે શરીરમાં રોગ પ્રતિકારક શક્તિમાં વધારો થાય છે. જો કોઇ વ્યક્તિને શરદી, ઉધરસના લક્ષણ દેખાય તો તરત ડોક્ટરનો સંપર્ક કરવો જોઇએ. લોકોએ દિવસભર નવશેકુ ગરમ પાણી પીવું, ઘરે રહેવું, બહાર ન નિકળવું તેમજ ઘરે યોગાસન કરવા, પ્રાણાયામ અને ધ્યાન લગાવવાથી ઘણા ફાયદા થાય છે.

આ રહ્યો આયુર્વેદિક ઉપચાર, કરો અમલ
ભોજનમાં હળદર, જીરા, ધાણા પાવડર અને લસણનો ઉપયોગ જરૂર કરવા કહ્યુંં છે. રોજ સવારે 10 ગ્રામ ચ્યવનપ્રાશનુ સેવન કરવા તેમજ ડાયાબિટીસવાળા લોકો સુગર ફ્રી ચ્યવનપ્રાશ લે, તેમજ હર્બલ ચા, તુલસી, લવિંગ, સુકુ આદુ નાખીને દિવસના બે વાર પીવા તેમજ તેમાં ખાંડ અને લીબું પણ નાખીને સેવન કરી શકાય છે. ગરમ દુધમાં હળદર નાખીને દિવસમાં બે વાર સેવન કરવું ખુબ લાભદાયી છે. નાકમાં સવાર સાંજ તલનું તેલ, નારીયેળ તેલ અથવા ઘી લગાવવુ જોઇએ. મોઢામાં એક ચમચી તલનું તેલ કે નારિયેળનું તેલ ભરવુ અને તેને બે થી ત્રણ મિનીટ સુધી અંદર રાખવુ જોઇએ. આ પછી થૂંકી દઇને ગરમ પાણીના કોગળા કરવા જોઇએ. આવુ દિવસમાં ઓછામાં ઓછુ બે વાર કરવા અને ગરમ પાણીમાં ફુદીનો કે અજમો નાખીને સ્ટીમ થેરેપી લેવી- આવુ દિવસમાં એક વખત કરવુ. તેમજ મધમાં લવિંગનો પાઉડર નાખીને દિવસમાં 2 થી 3 વખત સેવન કરવુ તેનાથી ઉધરસમાં આરામ મળે છે તેમ આયુષ વિભાગે જણાવ્યુ છે.

દૂધમાં હળદરનું મિશ્રણ કરીને પીવું, અજમા અને ફુદીનાનું સેવન કરી રોગ પ્રતિકારક ક્ષમતા વધારો


કોરોના વાઇરસ (કોવિડ-૧૯) સામેની લડાઇમાં નવસારી જિલ્લા પ્રશાસન, પોલીસતંત્ર, નગરપાલિકા, પંચાયતો વગેરેની સહિયારી કામગીરીને પગલે જિલ્લામાં કોરોનાનો પોઝિટિવ કેસ નોંધાયો નથી. દરમિયાન લોકડાઉનનાં ૧૫ દિવસ દરમિયાન પોલીસતંત્રે સમગ્ર જિલ્લામાં ખૂબ જ સંયમથી ફરજ બજાવી છે. જો કે, ખોટા બહાના બનાવી લોકડાઉન દરમિયાન લટાર મારવા નીકળતા વાહનચાલકો સામે પોલીસે કડક વલણ અપનાવી જાહેરનામાનો ભંગ કરનાર ૧૮૬૫ જેટલા કાયદેસરની કાર્યવાહી કરી હતી.

નવસારી જિલ્લામાં લોકડાઉનના પંદર દિવસ દરમિયાન પોલીસતંત્રએ કરેલી કામગીરીનો ચિતાર આપતા જિલ્લા પોલીસ અધિક્ષક ડો. ગિરીશ પંડયાએ જણાવ્યું કે,લોકડાઉન દરમિયાન વિવિધ જાહેરનામાના ભંગ બદલ કુલ ૧૫૯૨ કેસ કરવામાં આવ્યા છે. જેમાં ૧૮૬૫ જેટલા લોકો સામે કાયદેસરની કાર્યવાહી હાથ ધરવામાં આવી હતી.

જિલ્લામાં છેલ્લા એક અઠવાડિયાથી ડ્રોન કેમેરાની મદદથી લોકો પર વોચ રખાઇ રહી છે. બિનજરૂરી રીતે એકત્ર થતા લોકો સામે પણ કાયદેસરની કાર્યવાહી કરવામાં આવી રહી છે. જિલ્લામાં અત્યાર સુધીમાં ૯૩ કેસ કરવામાં આવ્યા છે. સોસાયટીઓ તથા મહોલ્લામાં એકત્ર થતા લોકો સામે જાહેરનામાના ભંગ બદલ કેસ કરવામાં આવે છે. શહેરના વિવિધ વિસ્તારો તથા ટ્રાફિક જંકશન પર મૂકેલા સીસીટીવીમાં લોકડાઉન તથા જાહેરનામાનો ભંગ કરનાર ૪૪ જેટલા વાહનચાલકો સામે કાર્યવાહી કરવામાં આવી છે. છેલ્લા ૧૫ દિવસ દરમિયાન ૨૪૭૨ જેટલા વાહનો ડિટેઇન કરવામાં આવ્યા છે.

જિલ્લા પોલીસ અધિક્ષક ડો. પંડયા વધુમાં જણાવ્યું કે, ઝડપાયેલા લોકોને કાગળ પરની કાર્યવાહી કર્યા બાદ જામીન ઉપર છોડી દેવામાં આવે છે. આ લોકોને બીજી વખત લોકડાઉનનું ઉલ્લંઘન ન કરવા સૂચના આપવામાં આવી છે. છેલ્લા ૧૫ દિવસ દરમિયાન જિલ્લામાં રોજ સરેરાશ ૧૫૦ જેટલા લોકોને જાહેરનામાનો ભંગ કરવા બદલ અટક કરવામાં આવે છે.

જિલ્લામાં અફવા ફેલાવનારા ૮ની ધરપકડ
લોકડાઉન દરમિયાન સોશિયલ મીડિયામાં અફવા ફેલાવવા બદલ ૩ કેસ કરવામાં આવ્યા છે. જેમાં ૮ જેટલા લોકોની ધરપકડ કરવામાં આવી છે. ચીખલી તથા ગણદેવી તાલુકાનાં બે ગામોમાં અમુક ચોક્કસ કોમના લોકો કોરોના વાઇરસ ફેલાવે છે તેવી પોસ્ટ વાઇરલ કરનાર બે જણાને ઓળખી કાઢી તેઓની ધરપકડ કરવામાં આવી છે. તેમણે આવી અફવાઓથી લોકોને દૂર રહેવા અનુરોધ કર્યો છે. અફવા ફેલાવનારા સામે છેલ્લા કેટલાક સમયથી કાર્યવાહી કરવા મક્કમ બની રહ્યું છે. આગામી દિવસોમાં આવા તત્ત્વો ભેરવાશે તે નક્કી છે.

નવસારીમાં ૧૮૬૫ની ધરપકડ, ૨૪૭૨ વાહન જપ્ત


આખો દેશ લોકડાઉન છે, લોકો ઘરોમાં છે, ઓફિસો, રેલવે,બસ, દુકાનો બંધ, દિવસે પણ રસ્તાઓ સુમસામ ભાસી રહ્યા છે ત્યારે એવા લોકો પણ આપણી વચ્ચે છે જે પોતાનો પરિવાર અને બાળકોને મૂકીને આપણા માટે ખડેપગે ફરજ બજાવી રહ્યા છે. ઘરની જવાબદારીઓ અને સંતાનોના રડતા ચહેરાને મૂકીને માત્ર દેશ અને આપણા માટે આવી મહિલા કર્મીઓ કોરોનાને માત આપે છે.

2 વર્ષની દીકરીને અમદાવાદ માતાના ઘરે મોકલી

જ્યારથી લોકડાઉન થયું છે ત્યારથી અમારી કામગીરી વધી ગઈ છે. મારી 2 વર્ષની દીકરી હિયાને હાલ મારા માતાના ઘરે અમદાવાદ મૂકી આવી છું. નાની છે એટલે મારા વગર રહી શકતી નથી અને એના પાપા પણ સુરત કામ કરતા હોવાથી એકબીજાથી ખુબ દૂર છે પરંતુ ફરજ પણ અદા કરવી જરૂરી છે. વીડિયો કોલ કરી જોઈ લઉં છું અને દીકરીને યાદ કરતી રહું છું. - શ્વેતા પંકજભાઈ પટેલ, એએસઆઈ, જલાલપોર

અમે બન્ને ફરજ પર, દીકરી નાનીની ગોદમાં

4 વર્ષથી હું અને મારા પતિ અમે બંને પોલીસ વિભાગમાં કોન્સ્ટેબલ તરીકેની ફરજ અદા કરીએ છીએ. મને 6 વર્ષની દીકરી જીયા છે. અમે નોકરી કરીને ઘરે જઈએ અને અમારી દીકરીને કોઈ ચેપ લાગી ન જાય તે માટે અમે વહાલસોયીને મારા માતા પાસે મૂકી આવ્યા છે. એના વગર ગમતું નથી પરંતુ લોકો માટે અમે દિવસ-રાત અમારી તબિયત જોયા વગર ફરજ બજાવીએ છીએ. પરિવાર પછી પહેલા દેશ છે અને એજ અમારી પહેલી ફરજ છે. - બીના ઈશ્વર પટેલ, મહિલા કોન્સ્ટેબલ, વિજલપોર

‘મમ્મી તું પણ મારી સાથે ઘરે જ રહેને’

આરોગ્યકર્મી તરીકે અમારી બેવડી જવાબદારી છે. લોકોના સ્વાસ્થ્ય માટે અમારે ઘરે-ઘરે જઈને તેમની તપાસ કરવાની હોય છે. સગર્ભા અને બાળકોની તપાસ કરવાની હોય છે, ઘરે મારી 12 વર્ષની દીકરી મારી રાહ જોતી હોય છે, ડર પણ લાગતો હોય છે પણ અમે ઘરે બેસી જઈશું તો લોકોનું ધ્યાન કોણ રાખશે. મારી દીકરી પણ મને પૂછે છે કે ‘મમ્મી તું પણ મારી સાથે ઘરે જ રહને’. કદીક આંખમાં આંસુ પણ આવી જાય છે. - જીજ્ઞાશા નવીન બ્રહ્મખત્રી, પીએચસી કર્મી

અમારૂ વિચારીશું તો શહેરનું કોણ વિચારશે

અમે સવારથી લોકો માટે કામ કરતા હોઈએ છે. મારે 3 સંતાનો છે પણ ઘરની જવાબદારી મારા માથે છે એટલે કોરોના વિશે વિચાર્યા વગર સવારથી ભગવાનનું નામ લઈને વિજલપોરને સાફ કરવા નીકળી પડીએ છીએ. લોકો પણ પૂછે છે કે તમને ડર નથી લાગતો પણ જવાબદારી અમને કોરોનાથી લડવાની તાકાત આપે છે. જો અમે અમારું વિચારીશું તો શહેરનું કોણ વિચારશે, એટલે અમે બધું ભૂલીને કામ કરવા નીકળી પડીએ છીએ. - બેબીબેન કુરડીસી, સફાઈકર્મી, વિજલપોર

પતિ નથી છતાં 3 બાળકોને ઘરે મૂકી ફરજ બજાવુ છું

મારા પતિ ઘણા વર્ષો પહેલા ગુજરી ગયા છે એટલે ઘરની જવાબદારી મારા માથા ઉપર છે. ઘરની જવાબદારી મને બધું ભુલાવી દે છે. લોકો ઘરોમાં બંધ છે અને અમે સવારથી જ ગામની સફાઈ કરવા માટે નીકળી પડીએ છીએ. ડર તો ઘણો લાગે છે પણ જો કામ ન કરીએ તો ઘર કોણ ચલાવશે અને અમારું કામ કોઈ ન કરી શકે. જેથી બાળકોને મૂકીને કામ પહેલા અમારી ફરજ છે કે અમે પરિવારનું બહાનું કાઢીને ઘરે નથી બેસી શકતા. - પૂજા જીવરાજ સોનવણે, સફાઈકર્મી, વિજલપોર

આ મહિલા કર્મીઓેના જુસ્સાને સલામ, લોકો માટે ઘર ભૂલી


હાલ નવસારી જિલ્લામાં લોકડાઉનને સફળ બનાવવા પોલીસની સાથે ખભેખભે મિલાવી કામ કરતા 700થી હોમગાર્ડ જવાનોને છેલ્લા બે મહિનાથી વેતન જ મળ્યું નથી. છેલ્લા કેટલાક વર્ષોમાં હોમગાર્ડની ભૂમિકા ખુબ જ વધી ગઈ છે. હાલના કોરોના લોકડાઉનના સમયમાં તો લોકડાઉનને સફળ બનાવવા ઠેર ઠેર હોમગાર્ડ જવાનો ફરજ બજાવતા નજરે પડે છે. દુ:ખદાયક વાત એ છે કે સરકાર આ કપરા સમયમાં હોમગાર્ડ ભણી જ જોવાનું ચૂકી ગઈ છે. આર્થિક અને પારિવારીક જવાબદારીને કોરાણે મુકી ફરજ બજાવનાર હોમગાર્ડને બીરદાવવા રહ્યાં.

નવસારી જિલ્લામાં હોમગાર્ડમાં 700થી વધુ લોકો ફરજ બજાવે છે. આ હોમગાર્ડના જવાનોનો ફેબ્રુઆરી માસ અને ત્યારબાદ માર્ચ મહિનાનો પણ પગાર થયો નથી. લગભગ આખો દિવસ લોકડાઉનમાં ભરગરમીમાં ફરજ બજાવતા આ ગાર્ડને બે માસથી વેતન ન મળતા હાલત કફોડી થઈ ગઈ છે.

જ્યાં સરકાર ખાનગી કંપનીઓને લોકડાઉનમાં વેતન આપવાની વાત કરે છે ત્યાં હોમગાર્ડ તો ફરજ બજાવે છે છતાં નિયમિત વેતન ચૂકવાયું નથી. અહીં ઉલ્લેખનીય છે કે હોમગાર્ડને 304 રૂપિયાનો રોજ ચૂકવાય છે, જેમાં પણ પાંચ-છ વર્ષથી વધારો જ કરવામાં આવ્યો નથી.

પહેલા 6 પછી 8 હવે 12-12 કલાક કામ
આમ તો હોમગાર્ડને અગાઉ 6 કલાક કામ કરાવાતુ હતું, તે બાદમાં 8 કલાક કરાયું હતું. નોંધનીય વાત એ છે કે હાલ લોકડાઉનમાં તો 12-12 કલાક ફરજ નિભાવવી પડે છે. કામ વધ્યું છે ત્યાં પગાર વધ્યો તો નથી પણ નિયમિત પણ થતો નથી, જેનું દુ:ખ છે.

ગ્રાંટ આવતા સાથે વેતન ચૂકવી દેવાશે
બે મહિનાનું વેતન નથી ચૂકવાયું એ સાચુ છે. ગ્રાંટ અંગે અમદાવાદ મેઈન ઓફિસમાં વાત કરી છે, જે આવી જતા તુરંત જ વેતન ચૂકવી દેવામાં આવશે. - મહેન્દ્ર પટેલ, જિલ્લા કમાન્ડન્ટ, હોમગાર્ડ

15 લાખ લોકોને હોમમાં સુરક્ષિત રાખી 8ના બદલે 12 કલાક ફરજ બજાવતા 700 હોમગાર્ડ પગાર વિહોણા


નવસારીનાં ઝવેરી સડકથી ભેસતખાડા રોડ વિસ્તારમાં આવેલ અનાજના ગોડાઉનમાં વહેલી સવારે અનાજના ગોડાઉનમાં મારેલ બે તાળા તોડીને અદર મુકેલ તુવેર અને બાસમતી ચોખાની કુલ્લે 12 કટ્ટા ચોરાઈ ગયા હતા. નવસારીમાં કલમ 144 ને પગલે પોલીસ જયારે ઘરની બહાર બેસેલા લોકોને પણ કોરોના ને લઈને જાહેરનામાં નો ભંગ કરે છે ત્યારે નવસારીમાં ચોરોએ પોલીસ નાં પેટ્રોલિંગનાં ધજાગરા ઉડાડી દીધા હતા.

નવસારીના તિઘરા વિસ્તારમાં રહેતા રાજુ પારસમલ જૈન (રહે તિઘરા રોડ નવસારી )નું ભેસત ખાડા વિસ્તારમાં અનાજનું ગોડાઉન આવેલું છે. જેમાં તેઓ ઘઉં, ચોખા, દાળનાં કટ્ટાઓનું સંગ્રહ કરે છે. ત્યાં આજે બુધવારે સવારે 6 થી 7 વાગ્યાના સુમારે અજાણ્યા લોકોએ ગોડાઉનમાં મારેલ બે દરવાજાનાં તાળા તોડી ગોડાઉનમાં મુકેલ આશરે 10 તુવેર ની દાળનાં કટ્ટા અને 2 બાસમતી ચોખાના કટ્ટા મળી કુલ્લે 12 જેટલા કટ્ટાઓ કિંમત રૂ.22 હજાર કોઈ વાહનમાં મૂકી લઈ ગયા હતા.

સવારે 7-૩૦ વાગ્યા નાં સુમારે ગોડાઉનનાં બારણા ખુલ્લા જોતા સ્થાનિકોએ ચોરી થયા બાબતે ગોડાઉનનાં માલિકને જાણ કરી હતી. આ બાબતે નવસારી ટાઉન પોલીસ મથકે ફરિયાદ કરવાની તજવીજ હાથ ધરી છે. એક માસ પહેલા પણ ઝવેરી સડક વિસ્તારમાં આવેલ અનાજ નાં ગોડાઉનમાં પણ ચોરી થઇ હતી અને અનાજનાં કટ્ટાઓ પણ ચોરી ગયા હતા, ત્યાર બાદ બીજા માસમાં બીજી ચોરી થઈ હોવાની માહિતી મળી છે.

બોલો ! નવસારીમાં લોકડાઉનમાં અનાજના ગોડાઉનનાં લોક તૂટ્યાં


કોરોનાને લઈને નવસારી જિલ્લામાં અંદાજે 400 જેટલી બોટ કિનારે પરત આવી છે, જેમાં આવેલા અંદાજે 2 હજારથી વધુ માછીમારોને હોમ ક્વોરન્ટાઈન કરવા પડ્યા છે. કોરોનાને કારણે જ્યાં જમીન ઉપર નોકરી ધંધો કરતા લોકોને નુકસાન થયું છે ત્યાં બીજી તરફ પાણી(દરિયો)માં રોજીરોટી કમાતા લોકો પણ મુશ્કેલીમાં મુકાયા છે. દરિયાકિનારે આવેલા નવસારી જિલ્લામાં હજારો લોકો દરિયામાં ફિશિંગ કરવા જાય છે, તેઓ તકલીફમાં મુકાઈ ગયા છે.

માછીમાર સૂત્રોમાંથી મળતી માહિતી મુજબ જિલ્લામાંથી સમુદ્રમા મચ્છમારી કરવા અનેક બોટ ગઈ હતી પરંતુ કોરોનાને લઈ અંદાજે 380થી વધુ (400 જેટલી)બોટ પરત જિલ્લાના દરિયાકિનારે આવી ગઈ છે. આ બોટમાં સવાર 3800થી વધુ માછીમારો પણ પરત આવ્યા છે. આ માછીમારોમાં જિલ્લા અને રાજ્ય બહારના પણ છે પરંતુ અંદાજે (ચોક્સસ આંક નહીં) 2 હજારથી વધુ માછીમારો તો જિલ્લાના જ પરત આવ્યા છે. આ પરત આવેલા જિલ્લાના માછીમારોની કોરોના તકેદારી અર્થે તપાસ કરી 14 દિવસના હોમ ક્વોરન્ટાઇનમાં રાખવામાં આવ્યા છે.હજુ કોઈ માછીમારમાં કોરોનાના લક્ષણ દેખાયા નથી.

જિલ્લામાં ક્યાં કેટલી બોટ પરત આવી
કૃષ્ણપુર 210થી વધુ, ઓંજલ-માછીવાડ 50થી વધુ, બોરસી-માછીવાડ 3, ધોલાઈ અને ભાટ 108થી વધુ

સાવચેતી માટે મહિનો વહેલી બોટ લવાઈ
કોરોનાને લઈ અમારે સાવચેતીરૂપે અમારી બોટ લગભગ એક મહિનો વહેલી લાવવી પડી છે. ઓંજલમાં જ 50 બોટ આવી છે. માછલીઓનું પણ નુકસાન થયું છે. બોટ દીઠ અંદાજે બેથી અઢી લાખ રૂપિયાનું નુકસાન થયું છે. - ભાવેશ ટંડેલ, બોટ માલિક, ઓંજલ માછીવાડ

બોટ દીઠ 2.25 લાખ લેખે 9 કરોડનું નુકસાન
નવસારી જિલ્લાના માછીમારોને કોરોનાથી ભારે નુકસાન થયું છે. બોટ દીઠ 2.25 લાખનું નુકસાન ગણીએ તો 400 બોટનું 9 કરોડ નુકસાન થયું એમ કહી શકાય. આ ઉપરાંત ઘણી બોટ તો ઓખા પણ લાગરવામાં આવી છે. જ્યાં પણ માછીમારો હોમ ક્વોરન્ટાઈન કરાયા છે.

છૂટી છવાઇ બોટ હજુ પરત આવી રહી છે
નવસારી જિલ્લામાં જે માછીમારો હોમ ક્વોરન્ટાઇન કરાયા છે તેમના ઘણા ઓછાનો 14 દિવસના ઓબ્ઝર્વેશન પિરિયડ પૂરો થયો છે,જોકે આગામી બે ત્રણ દિવસમાં ઘણાનો પૂરો થશે,હજુ ય છૂટીછવાઈ બોટ આવી રહી છે. મંગળવારે ત્રણ બોટ જલાલપોર તાલુકામાં આવી હતી.

નવસારીમાં કોરોનાને લઈ 400 ફિશિંગ બોટ પરત